Դասարանը որպես ջերմոց- լաբորատորիա

«Մխիթար Սեբաստացի»  կրթահամալիրում սկսել եմ աշխատել 2017-2018  ուսումնական տարվանից՝ որպես դասվարի օգնական: Առաջին անգամ էի մտնում խումբ՝ նոր միջավայր, երեխաներ, սպասող հայացքներ: Եվ այսպես սկսվեց իմ մուտքը մեր կրթահամալիր:

Լսել էի, որ կրթահամալիրը մեծ ջերմոց- լաբորատորիա ունի: Ես միշտ մեծ ցանկություն եմ ունեցել բույսեր աճեցնել, բայց, չգիտես ինչու,  չի հաջողվել: «Մխիթար Սեբաստացի» կրթահամալիրն  ընձեռեց այդ հնարավորությունը՝ տալով և՛ անհրաժեշտ միջավայր, և՛ անհրաժեշտ միջոցներ։ Երբ առաջին անգամ այցելեցի ջերմոց-լաբորատորիա, ինձ հիացրեց տիկին Շողիկի վերաբերմունքը բույսերի նկատմամբ: Այնքա՜ն քնքշություն ու սեր կար, որ ես էլ ակամա սիրեցի այդ ամենը ու որոշեցի  ստեղծել մեր Դասարանական ջերմոցը:

Ու սկսեցի հետաքրքրվել: Իմացա, որ բույսերը հանդիսանում են բուսաբանական ուսմունքի կողմից ուսումնասիրվող կարևոր օբյեկտ։ Կենդանի էակների, այդ թվում և մարդու գոյությունն անհնարին կլիներ առանց բույսերի, որով և որոշվում է նրանց առանձնահատուկ դերը երկրագնդի վրա կյանքի համար։ Հենց բույսերի գործունեության շնորհիվ է առաջացել մթնոլորտը, որը պարունակում է թթվածին և նրանց գոյության շնորհիվ այն պահպանվում է շնչառության համար բարենպաստ վիճակում։ Սենյակային բույսերը պատկանում են տարբեր ընտանիքների: Կան գեղեցիկ ծաղիկներով, բազմերանգ և տարբեր ձևերի տերևներով սենյակային բույսեր։ Ու սկսեցինք…

Նախագիծը սկսեցինք իրականացնել 5 տարեկան սովորողների հետ: Այս նախագիծը սկսելուց առաջ շատ կարևոր է հաշվի առնել սովորողի տարիքային սահմանը և ֆիզիկական ունակությունները: Բույսերի հանդեպ խնամքը ՝ երեխաների հոգում բարության ու հոգատարության սերմերից մեկն է, որ պետք է դրվի մանկության տարիքում:

Քանի որ  Ջերմոց-լաբորատորիան գտնվում էր Քոլեջում, այն մեզ հնարավորություն էր տալիս շատ հաճախ այցելել: Եվ այսպես սկսվեց մեր համագործակցությունը տիկին Շողիկի հետ: Սկզբում սովորողների հետ դդմացան արեցինք: Խոշորացույցի օգնությամբ  դդմի կորիզներն ուսումնասիրեցինք՝ ի՞նչ գույնի, ձևի, չափի են: Ո՞ր երկրաչափական պատկերին են նման: Ի՞նչ օգտակար հատկություն ունեն թե՛ դդումը, թե՛ դդմի կորիզները: Ինչպես ցանկացած աշխատանքում, այստեղ նույնպես, առաջին հերթին, անհրաժեշտ է  սիրով և հոգատարությամբ աշխատել: Սահմանեցինք հերթապահություն, և սովորողներն ամեն օր  ջրում և խոշորացույցով հետևում էին: Եվ վերջապես՝ սպասված լավ լուրը:  Դդումները սկսեցին ծլել:

Նախագծի իրականացումը շարունակական աշխատանք է,  բազմափուլ պրոցես է, և յուրաքանչյուր փուլ ուղեցկվել, ուղեկցվում է որոշակի աշխատանքով: Յուրաքանչյուր սովորող ունի իր թաղարը:

Նախապատրաստական փուլ:

• Ըստ նախագծի սովորողները դասարանում առանձնացրել են մի անկյուն՝  փորձելով բույսերի աճեցման համար նպաստավոր պայմաններ ստեղծել։
• Պատրաստել են անհրաժեշտ որակի հող, թաղարներ, պլաստմասե ծաղկամաններ, հող փորելու գործիքներ և ցնցուղ՝ ջրելու համար:
• Սովորողները նախապես ուսումնասիրել են այդ բույսերը, նրանց անվանումները:

Աշխատանքային փուլ:

Յուրաքանչյուր սովորող հերթով մոտենում, թաղարի մեջ անհրաժեշտ քանակությամբ հող է լցնում, այնուհետև իր նախընտրած բույսը տնկում, վրան էլ ամրացնում է իր անունը: Պատրաստի թաղարը տեղափոխում է դասարանական Ջերմոց -լաբորատորիա, ամեն օր խնամում և ջրում:

Նախագծի ընթացքում հանդիպած դժվարությունները:

• Դժվարություն է ներկայացնում բույսերը փոշուց մաքրելը, բույսերը տեղափոխում ենք մեր բակ,մաքրում ենք ցնցուղով՝ զգուշորեն լվանալով բույսերի թերթիկները:
• Փորձել ենք աճեցնել Ալոե, սակայն դեռ չի հաջողվել:

Նախագծի արդյունքում արձանագրած ձեռքբերումները:

• Սովորողներից Մարկ Խաչատրյանը , տանը նույնպես փորձեց ստեղծել իր թաղարը:
• Սովորողների մոտ ավելանում է պատասխանատվության զգացումը, քանի որ իրենց աշխատանքից են կախված իրենց տնկած բույսերի աճն ու զարգացումը:
• Սովորողները ստանում են ծաղիկների խնամքի վերաբերյալ անհրաժեշտ հմտություններ։

Մայրիկատոնին ընդառաջ սովորողներն անակնկալ պատրաստեցին մայրիկներին: Համագործակցելով տիկին Շողիկի հետ՝ նախապես ծաղիկների կտրոններ վերցրեցինք և բաժակների մեջ տնկեցինք: Գեղեցիկ ձևավորեցինք և մեր մայրիկներին նվիրեցինք:

Բացի նրանից, որ կարողանում ենք բույսերը ճիշտ խնամել, մենք գիտենք մեր Ջերմոցի բոլոր բույսերի անվանումները, նրանց տեսակները, օգտակար լինելը: Սովորողները հատկապես  հավանում են կալանխոեն:  Սենյակային պայմաններում նույնիսկ կարողացել ենք աճեցնել Սիրիական  վարդ, որը հետո տեղափոխեցինք մեր Քոլեջի տնկարան: Բացի բույսերից ստեղծեցինք նաև բանջարանոց: Դեռ մի քանի օր է, բայց մեծ սիրով ենք խնամում: Ի դեպ, մեր բանջարանոցում մենք ունենք լոլիկ, լոբի,դդում, վարունգ, պղպեղ:

Հպարտ եմ, որ  սեբաստացի եմ…