Բացերը լրացնելու շրջան է

Հեռավար-առցանց ընտանեկան դպրոցից հետո, կարծում եմ, կլինեն ուսուցման գործիքներ և ծրագրեր, որոնք ուղղակի խոտանելու կարիք կլինի, որովհետև այս պայմաններում մենք ուսումնական գործունեության կազմակերպման համար պարզ և հետաքրքիր տարբերակներ գտանք։

«Հարթակում ուսուցիչն է» նախագիծ

Ողջույն: Ես Մանուշակ Աբրահամյանն եմ: Աշխատում եմ «Մխիթար Սեբաստացի» կրթահամալիրում որպես դասվար, ղեկավարում եմ Հյուսիսային դպրոց-պարտեզի 3-1 դասարանը։ Ինչպես գիտեք, «Մխիթար Սեբաստացի» կրթահամալիրը հեղինակային մանկավարժություն ստեղծող, իրականացնող և տարածող կրթական հաստատություն է։ Այստեղ գործող այլընտրանքային մանկավարժական սկզբունքները հնարավորություն են տալիս կրթական ծրագրերը կազմակերպելու ոչ միայն ֆիզիկական միջավայրում, այլև վիրտուալ՝ գործունեության կազմակերպումն այդկերպ հարմարացնելով յուրաքանչյուր սովորողի անհատական նախասիրություններին։ Հեղինակային մանկավարժության կարևոր սկզբունքներից մեկը երեխայի անձի զարգացումն է։ Երեխան ինքն է կառուցում իր անձը, իսկ մենք՝ ուսուցիչներս, օգնում ենք նրանց՝ ստեղծելով նպաստավոր միջավայր, հնարավորություններ յուրաքանչյուրի ազատ արտահայտման համար։

Երբ հանրապետությունում հայտարարվեց արտակարգ դրություն, կարելի է ասել՝ հանրակրթական մյուս հաստատությունները պարալիզացվեցին։ Ինչո՞ւ, քանի որ նրանք չունեին համապատասխան փորձ, ռեսուրսներ հեռավար ուսուցում կազմակերպելու մասով։ Ի տարբերություն մյուս հաստատությունների, կրթահամալիրում վաղուց է իրականացվում մեդիակրթություն, ուսուցման գործընթացի  հիմքում ընկած են նախագծային ուսուցումն ու բլոգավարությունը։ Մենք այդ հնարավորությունն օգտագործեցինք։

Որպես սեբաստացի ծնող, ուսուցիչ, շրջանավարտ՝ ես ժամանակ չեմ ունեցել տագնապ զգալու, քանի որ հենց առաջին օրերից, երբ կրթական հաստատություններում ուսումնական արձակուրդի հաշվին փորձեցին ժամանակ շահել, մեր կրթահամալիրում ուսումնական գործընթացը  չդադարեց։ Հենց առաջին օրից մեր ուսումնական գործունեությունը տեղափոխեցինք առցանց հարթակ։  Մեզ մնում էր նախագծերում որոշակի փոփոխություններ և լրացումներ անել, այսինքն՝ ֆիզիկական միջավայրից գործունեության կազմակերպումը տեղափոխել վիրտուալ տարածք։ Առցանց ուսուցման փորձ ունեցել ենք նաև 2016 թ.-ի ձմռանը։ Միևնույն ժամանակ արդեն քանի տարի կրթահամալիրում գործում է հեռավար դպրոցը, մենք ունենք տասնյակ սովորողներ, ովքեր, չլինելով հանրապետությունում, մասնակցում են մեր ուսումնաական գործընթացին։ 

Այս կազմակերպումը նոր բացահայտումների, ինչու ոչ՝ նաև ինքնակրթվելու լայն հնարավորություն տվեց, միևնույն ժամանակ ոչ թե խլեց, այլ սահմանափակեց կամ սահմանեց մարդկանց հետ հաղորդակցվելու իր կանոնները, որովհետև զրույց, քննարկումներ ունենում ենք վիրտուալ տարածքում։

Քանի որ հեռավար ուսուցումն իրականացվում է բացառապես ընտանիքում, ծնողը հանդես է գալիս որպես ուսուցիչ, իսկ ուսուցիչը՝  ուսումնական գործընթացը կազմակերպող խորհրդատու, օգնական։ Կրթահամալիրային նախագծերում ընտանիքի ներառմանը նպաստում է սովորող-ծնող-ուսուցիչ անմիջական կապը։ Այդ համագործակցության ընթացքում ծնվում և իրականացվում են շատ հետաքրքիր նախագծեր։ Ցանկացած դժվարություններ միասին հաղթահարելը, սովորողին, ինչու չէ՝ նաև ծնողին ոգևորելը, ձեռք բերված հաջողությունները միասին տոնելը ամենամեծ հաջողությունն է։ Շատ ծնողներ զբաղվածության պատճառով նախկինում ժամանակ չեն ունեցել ուսումնական գործընթացի մասնակիցը դառնալու, իսկ հիմա այդ բացը լրացնելու լավագույն շրջանն է, շատ լավ հնարավորություն է ստեղծվել։ Ընտանիքի ներգրավվածությունը ուսումնական գործընթացում նպաստում է սովորողի ուսումնական պաշարի հեշտ յուրացմանը։

Երեխան՝ սովորողը, մեծ ուրախություն է ապրում, երբ իր ծնողը՝ մայրը կամ հայրը, ինչու չէ՝ նաև ընտանիքի մյուս անդմաները ներգրավվում են իր ուսումնական գործընթացի մեջ, մասնակից դառնում դրան։ Իր հետ միասին երգում են, խաղում են, նոր հետաքրքիր փորձ են իրականացնում, ընթերցում են, պատմում են։ Շատ հետաքրքիր տեսանյութեր են ստեղծվում ընտանիքներում, ու այդ ամենը արտացոլվում է սովորողի բլոգում։ Շատ ծնողներ ուրախությամբ նշում են, որ կազմակերպման այս ձևը իրենց էլ շատ նոր հնարավորություններ տվեց. նրանք նոր հմտություններ ու կարողություններ ձեռք բերեցին՝ օգնելով երեխային բլոգավարության հարցում, տեսանյութեր, ձայնանյութեր մշակելու, հրապարակելու վիրտուալ հարթակներում։ Եվ որ ամենակարևորն է՝ այս ամենը իրականացնում է ոչ միայն սովորողը, այլ դրան մասնակից են դառնում ընտանիքի անդամները, դառնում  են սովորող՝ յուրացնում նոր հմտություններ։

Հեռավար ուսուցման այս ընթացքը հնարավորություն է տալիս սովորողների նախասիրությունները դրսևորելու, քանի որ ամեն սովորող իր ընտանեկան նախագծով է հանդես գալիս։ Այս ընթացքում եղան սովորողներ, որ իրենց այլ, չգրանցված նախասիրությունները բացահայտեցին։ Կան սովորողներ, որոնք հնարավորություն ունեցան այս փուլում ինքնարտահայտվելու, առաջ քաշելու անհատական նախագծեր, դրանք զարգացնելու։

Երբ վարակն անցնի, ու դպրոցները վերսկսեն իրենց բնականոն աշխատանքը ֆիզիկական  միջավայրում, երբ մարդկանց առօրյան վերականգնվի, մարդիկ ավելի կգնահատեն իրար հետ անցկացրած յուրաքանչյուր վայրկյանը, ակնթարթը, նրանք կփորձեն վայելել իրար, ընկերներին, հարազատներին, վայելել ու գնահատել իրենց սիրելի գործով զբաղվելու հնարավորությունը։

Հեռավար-առցանց ընտանեկան դպրոցից հետո, կարծում եմ, կլինեն ուսուցման գործիքներ և ծրագրեր, որոնք ուղղակի խոտանելու կարիք կլինի, որովհետև այս պայմաններում մենք ուսումնական գործունեության կազմակերպման համար պարզ և հետաքրքիր տարբերակներ գտանք։ Կարծում եմ՝ այս պայմանները, այս հնարավորությունները նոր մանկավարժություն են ստեղծում այս փուլում, այս շրջանում և՛ հանրակրթական դպրոցների համար, և՛ ինչու չէ՝ կրթահամալիրի համար նոր ծրագրեր յուրացնելու, նոր մանկավարժական մեթոդներ կիրառելու հնարավորություն են տալիս։ Փնտրելով, ամեն ինչ հարմարեցնելով այս պայմաններին՝ մենք անընդհատ գտնում ենք, անընդհատ փորձում ենք, անընդհատ ներմուծում ենք մանկավարժական նոր մեթոդներ, նոր գործիքակազմ մեր գործունեության կազմակերպման համար։

Ուսումնական բնագավառ, դասընթաց: 
Տեսանյութի հեղինակ: 
Կրթական աստիճան: 
  • Deutsch
  • 日本語
  • Հայերեն
  • English
  • Georgian
  • Русский