Հետազոտական աշխատանքները` Ավագ դպրոցում սովորողի գործունեության ձև

Համաձայն կրթհամալիրում գործող Սովորողի գործունեության ձևերի կարգի՝ Ավագ դպրոց վարժարանի սովորողները իրենց ուսումնական գործունեության ընթացքում պետք է կատարեն  ուսումնահետազոտական աշխատանք:

«Արվեստ» դասընթացի համար երկրորդ կիսամյակում 10-րդ և 11-րդ դասարաններում ևս կիրառվում է գործունեության այդ ձևը:

Որպես հետազոտական թեմաներ՝ առաջարկեցի դասընթացի ծրագրով այդ պահին ուսումնասիրվող թեմաներից, նաև եղան սովորողներ, ովքեր առաջարկեցին իրենց հետաքրքրող թեման:

Թեմաները տեղադրեցի բլոգում՝ սովորողներին հանձնարարելով «կարծիքներ» բաժնում թողնել իրենց ընտրած թեմայի վերնագիրը: Այս տարբերակով սովորողն ունի ազատ ընտրության հնարավորություն,  ավելին՝ այդ ընտրությունը հրապարակային է, ինչպես նաև խուսափում ենք նույն թեմայի կրկնությունից:

Մշակեցի հետազոտական աշխատանքների համար ներկայացվող պահանջներ, որոնք սովորողների աշխատանքը պետք է համակարգեին, ունենային որոշակի կողմնորոշիչ մեկնակետեր, ինչպես նաև բացառեին արտագրությունը:

Սովորողների հետ աշխատանքները կատարվում են փուլերով.

• դասավանդողի էլ. հասցեին աշխատանքի նախնական տարբերակի ուղարկում
• շտկում
• վերամշակում
• բլոգներում հրապարակման փուլ:

Չնայած սովորողները հաճախ կարող են դժգոհել հետազոտական աշխատանքների ծավալից, սակայն իրենք են պատասխանատու իրենց ջանքերի և ժամանակի պլանավորման, ղեկավարման և գնահատման համար:  Այսինքն՝ հետազոտական աշխատանքը ինքնակրթությանը նպաստող արդյունավետ ձերից մեկն է:

Հետազոտական աշխատանք կատարելով՝ սովորողը.

•  ձեռք է բերում տարբեր աղբյուներից օգտվելու հմտություններ
•  զարգացնում է վերլուծական միտքը
•  ձեռք է բերում կարևոր ինֆորմացիա (տեքստի ընթերցում և աշխատանք տեքսի հետ)
•  իր՝ համեմատելու կարողություններն է ձևավորում:

Ներկայացնում եմ սովորողներից մի քանիսի աշխատանքները, որոնք հետաքրքիր են խոսքի մշակման, ինքնուրույն վերլուծության, տարբեր աղբյուրներից օգտվելու կարողությունների տեսանկյունից, ինչպես նաև տալիս են լիարժեք ինֆորմացիա թեմայի մասին.

·         Արիստիդ Մայոլ

·         Սյուռեալիզմ: Ռենե Մագրիտ

·         Ռոմանական արվեստ