«Աստղագիտություն» դասընթացը 9-րդ դասարաններում
Primary tabs
Այս ուսումնական տարում՝ նոյեմբեր և դեկտեմբեր ամիսներին, 9-րդ դասարանցիների համար 2 ամիս տևողությամբ կազմակերպվեց «Աստղագիտություն» դասընթացը:
Դասընթացի նպատակն էր սովորողներին հաղորդել աստղագիտական համապարփակ գիտելիքներ, ինչպես նաև նրանց ներկայացնել աստղագիտության արդի խնդիրներն ու գիտական վերջին ձեռքբերումները:
Դասընթացի յուրահատկությունն այն էր, որ աստղագիտությունը սովորողներին ներկայացվում էր 4 հիմնական միջոցներով.
- աստղագիտական երևույթների քննարկումը՝ «ֆիզիկա» առարկայից նրանց արդեն իսկ ձեռք բերած գիտելիքների միջոցով
- աստղագիտական երևույթների մատուցումը առօրյայից բերվող օրինակներով` դրանց ու աստղագիտական երևույթների միջև զուգահեռներ անցկացնելով
- արդեն իսկ բացատրված նյութին վերաբերող ֆիլմ-դասընթացի օգնությամբ` աստղացուցարանում, ինչպես նաև հարթ էկրանին ցուցադրվող ֆիլմերով
- սովորողները հանձնարարված թեմաներով իրենք են պատրաստում ֆիլմեր, պրեզենտացիաներ, որոնք ներկայացնում և քննարկում են:
Դասընթացի անցկացման ասյպիսի ձևը հնարավորություն է տվել երկու ամսվա ընթացքում ուսումնասիրել աստղագիտական թեմաների լայն տիրույթ` տիեզերքի առաջացման վարկածներից մինչև հնարավոր կյանքն այլ մոլորակներում , ինչպես նաև կյանքի համար անհրաժեշտ պայմանները:
Աստղացուցարանի և ֆիլմերի ցուցադրման շնորհիվ հնարավոր է եղել ամբողջ դասարանի ուշադրությունը սևեռել ուսումնասիրվող նյութի վրա (անկախ նախկինում «Ֆիզիկա» առարկայի նկատմամբ ունեցած հետաքրքրությունից կամ առաջադիմությունից) և տեսողական հիշողության շնորհիվ բացատրված նյութն ամրապնդել: Բացի այդ՝ բոլոր սովորողները փոքր խմբերով ստացել կամ ընտրել են աստղագիտական թեմաներ, պատրաստել ու ներկայացրել են դրանց վերաբերող իրենց պատրաստած նյութը: Սա հնարավորություն է տվել սովորողների մոտ զարգացնել համագործակցությունը և խորացնել սովորած նյութը սեփական մտքերով վերաձևակերպելու կարողությունը:
Բացի այդ՝ «Տիեզերք» ակումբի հետ համատեղ ստեղծվել է աստղագիտական ֆիլմերի հարուստ տեսադարան, որը հնարավորություն է տվել աստղագիտությամբ հետաքրքրվող սովորողներին ինքնուրույն ստանալ նոր գիտելիքներ, իսկ առաջացած հարցերի դեպքում՝ դիմել և ստանալ ամբողջական պատասխան:
Հետաքրքրությունն աստղագիտության նկատմամբ այնքան մեծ է եղել, որ որոշ դեպքերում սովորողները կատարել են նաև մյուս խմբերին տրված հանձնարարությունները:
Դատելով աշակերտների կողմից այս դասընթացի մասին եղած արձագանքներից ` կարծում եմ, որ այս փորձը կարելի է համարել հաջողված և կարելի է փորձել նոր զարգացումներ գտնել: Այդպիսի զարգացում կարող է լինել ավելի ցածր դասարաններից սկսած «Աստղագիտության» տարբեր դասընթացների՝ աստղացուցարանում անցկացվող դասաժամերի կազմակերպումը, ինչը կարող է սովորողների վրա մեծ տպավորություն թողնել:
Հաշվի առնելով, որ աստղացուցարանում ցուցադրվող ֆիլմերը սովորողների համար ամենատպավորիչն էին, նոր ֆիլմերի ձեռքբերման դեպքում հնարավոր է նաև բնագիտական այլ առարկաների դասավանդման մեջ ներառել համապատասխան ֆիլմերի ցուցադրումն աստղացուցարանում:
- Բացվել է 1991 անգամ
