Ուսումնական ճամփորդություն. պարապմունքը կաբինետից տեղափոխվում է մասնագիտական միջավայր

Որքան էլ հետաքրքիր լինի առարկայական դասընթացը, միևնույնն է, սովորողը
կարիք ունի փոփոխությունների` նոր գիտելիքների, փոխհարաբերությունների: Ուսումնական պրոցեսը, որ մեր «Մխիթար Սեբաստացի» կրթահամալիրում կազմակերպվում է ուսումնական օրացույցով նախատեսված բազմաթիվ ստուգատեսների, նախագծերի իրականացմամբ, մի նոր, ավելի հետաքրքիր վիճակի է հասնում, երբ դասը լսարանից տեղափոխվում է մեկ այլ միջավայր` թանգարան, ցուցահանդես, թատրոն, այլ դպրոց և վերջապես` բնություն:
Ուսումնական ճամփորդությունները` որպես ուսումնական նախագծեր, կարևոր դեր են կատարում սովորողների աշխարհայացքի ձևավորման համար: Ոչ ֆորմալ կրթության այս ձևը նպաստում է նոր փոխհարաբերությունների, նոր գիտելիքների և կարողությունների ձևավորմանը: Սովորողը դպրոցից դուրս հանդիպում է տվյալ բնագավառի լավագույն մասնագետներին, լսում է նրանց խոսքը, որը նպաստում է նաև նրա մասնագիտական կողմնորոշմանը:
Նախօրոք քննարկվում է տվյալ ճամփորդության նպատակը, խնդիրները, կազմակերչական հարցերը: Սովորողները համացանցից նյութեր են հայթայթում, պատրաստվում են ճամփորդությանը: Շատ կարևոր է, որ սովորողը ընկալի տվյալ ճամփորդության կաևորությունը և այն չդիտի որպես հերթական ժամանց:
Ճամփորդության ընթացքում սովորողը նյութը յուրացնում է գործնական կիրառման մեջ, հասկանում է ստացած գիտելիքի նշանակությունը: 

Ուսումնական ճամփորդությունները և դիտումները կազմում են ֆիզիկայի դասընթացի կարևոր մասը: Ճամփորդությունները կարող են լինել ինչպես սովորական, այնպես էլ վիրտուալ՝ աստղացուցարանում: Գիշերային դիտումների համար, բացի կրթահամալիրի տանիքից, կարող են նաև կազմակերպվել գիշերակացով ճամփորդություններ՝ աստղադիտակով:

Ուսումնական ճամփորդությունները ուսումնական տարբեր ուղղություններով (սպորտային, էկոլոգիական, մշակութային, հայրենագիտական և այլն) աշխատանքների համատեղում է:

Ուզում եմ նկարագրել Միջին դպրոցում սովորողների ընտրությամբ «Աստղագետ-ֆիզիկոս» խմբի մի քանի ուսումնական ճամփորդությունների մասին:
Խումբը 6-ից 8-րդ դասարանցիներով ձևավորվեց 2015-2016 ուսումնական տարում, երբ ներկայացվեց ծրագիրը:

Իհարկե, դպրոցում աշխատանքը շատ հետաքրքիր է, բացի կաբինետից, պարապմունք-քննարկումներն անց են կացվում կրթահամալիրի աստղացուցարանում, որտեղ սովորողներն իրենց զգում են ինչպես տիեզերքում: Սովորողները ստեղծեցին խմբի բլոգը, համացանցից տեղեկություններ հավաքեցին և լուսաբանեցին բլոգում, կատարեցին տարբեր հոդվածների, նյութերի թարգմանություններ: Բայց այս ամենից զատ, մեր ուսումնական գործունեության մեջ մեծ տեղ է հատկացվում ուսումնական ճամփորդություններին:

Առաջին անգամ, երբ այցելեցինք տիեզերքի թանգարան, սովորողները նախօրոք ծանոթացան Գրիգոր Գուրզադյանի կյանքին և գործունեությանը, կարդացին նրա էսենները: Թանգարանում մեզ սիրով դիմավորեցին: Առաջատար մասնագետ Աշոտ Զախարյանը մանրամասն նկարագրեց թանգարանի ստեղծման պատմությունը, ծանոթացրեց աստղադիտակների աշխատանքի հետ, տիեզերական թռիչքի մասնակցած և Երկիր վերադարձած գունդ-կապսուլայի հետ:
Սա մեր առաջին, բայց իհարկե ոչ վերջին ճամփորդությունն էր Տիեզերքի թանգարան: Մենք այստեղ հաճախ ենք «հյուընկալվում»: Ամեն անգամ հանդիպում ենք նոր մասնագետների, ստանում ենք նոր գիտելիքներ և նոր տպավորություններ:
Հաջորդ անգամ տիեզերքի թանգարանում մենք հանդիպեցինք Գրիգոր Գուրզադյանի որդու՝ նույնպես նշանավոր աստղագետ Վահագն Գուրզադյանի հետ: Նա մեզ ուսումնական պարապմունքի իր ձևն առաջարկեց` դաս-մրցույթ:
Այդ օրը տիեզերքի թանգարան էին հրավիրվել նաև Գառնիի թիվ 1 հիմնական դպրոցի սովորողները:

Հետաքրքրիր է հանդիպումը գիտնականի հետ: Վահագն Գուրզադյանը սիրով սովորողներին ներկայացրեց թանգարանը, գիտաշխատող Սերգեյ Միրզոյանը պատմեց հայ գիտնականների կողմից ստեղծված և տիեզերական տարածությունները ուսումնասիրած սարքերի աշխատանքների մասին: Իսկ գիտնական-հնագետ Կարեն Բայրամյանը ժամանակագրական էքսկուրս կատարեց և ներկայացրեց աստղագիության զարգացումը Հայաստանում:
Պարապմունքի երկրորդ մասում կազմակերպվեց ուրախ դաս-մրցույթը մեր կրթահամալիրի և Գառնիի սովորողների խմբերի միջև:
Սովորողները ակտիվ պատասխանում և քննարկում էին Գուրզադյանի տված հարցերը, իսկ մրցանակը տիեզերագնացի գլխարկն էր, որով իրական տիեզերագնացը աշխատել էլ տիեզերքում: Այն բաժին ընկավ մեր կրթահամալիրի սովորող Նորայր Գալիկյանին: Նա ձեռքով «ողջունեց տիեզերքից»:
Գառնեցիներն էլ դատարկաձեռն չմնացին: Որպես խրախուսական մրցանակ՝ ստացան Գրիգոր Գուրզադյանի գրած գրքերից մեկը:
Պայմանավորվեցինք հետագա այցելությունների մասին: Վահագն Գուրզադյանը խոստացավ աջակցել մեզ մեր աստղադիտակի վերանորոգման հարցում. և այդ գործը հիմա ընթացքի մեջ է:
Հաճելի և օգտակար ճամփորդություն էր: Սովորողների համար էլ կարևոր էր ժամանակակից գիտնականների հետ հանդիպումը: Մենք էլ գառնեցիներին հրավիրեցիցք մեր կրթահամալիր՝ մեր աստղացուցարանում միասին տիեզերքի միասին ֆիլմեր դիտելու: Պայմանավորվեցինք Գառնի թիվ 1դպրոց մեր այցելության մասին:

Իսկ առիթը չուշացավ` հաջորդ ճամփորդությունը արդեն նախատեսված էր դեպի Գառնի`հանդիպում մեր հին ծանոթների հետ և այցելություն սեյսմիկ կայան: Նպատակ ունեինք Գառնիի թիվ 1 հիմնական դպրոցում ներկայացնելու «Հանրակրթական Էկոտուր» ստուգատեսը, դպրոցի սովորողներին ևս մասնակից դարձնելու մեր բնապահպանական հերթական ստուգատեսին: Գառնի թիվ 1 հիմնական դպրոցում մեզ սիրալիր ընդունեցին որպես հին ծանոթների, ուշադիր լսեցին մեր ելույթը, հետաքրքրվեցին մեր առաջարկած բնապահպանական ծրագրերով և որոշեցին անպայման մասնակցել Էկոտուր 2016: Մենք ձեռք բերեցինք նոր գործընկերներ և փորձի փոխանակման լավ օրինակ:
Իսկ հետո շարժվեցինք դեպի Գառնիի Սեյսմիկ կայան: Իսկ այստեղ մեզ նոր հանդիպում էր սպասվում:
Գառնիի Սեյսմիկ պաշտպանության կենտրոնը Հայաստանում միակը չէ: Մեր տարածաշրջանում կա չորս այսպիսի կենտրոն, որից մեկն էլ գտնվում է Արցախում:
Ասպարեզի առաջատար մասնագետ Սերոբ Դարբինյանը հենց մուտքի մոտ ներկայացավ և սովորողներին ուղեկցեց ժամանակակից սարքերով ապահովված ընդարձակ նիստերի դահլիճ:
Նոր միջավայրին սովորողները արագ ընտելացան, Սերոբ Դարբինյանի երկրաշարժների մասին ներկայացրած նյութը բազմաթիվ հարցերի տեղիք տվեց: Նա մանրամասն ներկայացրեց, թե ինչ պետք է անել երկրաշարժից առաջ, երկրաշարժի ժամանակ և հետո: Պատմեց, թե Հայաստանում ինչպիսի ավերիչ երկրաշարժեր են եղել, խոսեց վերջին, Սպիտակի երկրաշարժի մասին: Խորհուրդ տվեց սովորողներին ուշադիր լինել մեծերի, ծնողների սխալ արարքների, պատկերացումների վրա և թույլ չտալ թուլացնել այն շենքերի պատերն ու հիմքը, որտեղ ապրում են: Նկարագրեց Հայաստանում և աշխարհում սեյսմակայունությունը բարձրացնելու նպատակով նորագույն տեխնոլոգիաները: Այնուհետև նա մեզ ուղեկցեց այն լաբորատորիան, որտեղ շուրջօրյա աշխատանք է կատարվում: Այստեղ հետևում են ինչպես Հայաստանի, այնպես էլ տարածաշրջանի և ամբողջ աշխարհի սեյսմիկ վիճակին: Գրանցող սարքերի աշխատանքին մենք նույնպես հետևեցինք: Երիտասարդ մասնագետը սիրով պատմում էր իրենց աշխատանքների կարևորության մասին, պատասխանեց սովորողների բազմաթիվ հարցերին:
Սերոբ Դարբինյանը խոստացավ այցելել մեր կրթահամալիր, սովորողների համար դասախոսություն կարդալ երկրաշարժերի մասին և գործնական միջոցառում կազմակերպել: Վերջում նա մեզ սեյսմիկ պաշտպանության մասին գիրք և պլակատներ նվիրեց: Քննարկվեց նաև Գառնիի սեյսմիկ կենտրոնի տարածքում ամառային վրանային ճամբար հիմնելու հարցը, որը նույնպես աջակցություն ստացավ:
Սովորողները շնորհակալություն հայտնեցին հետաքրքիր և հագեցած օրվա համար և վերադարձանք Երևան: Վերադարձին` կանգառ Չարենցի կամարի մոտ, սրթսրթացնող սառը քամի, մշուշոտ, մառախլապատ Արարատ...

Ճամփորդությունների ժամանակ էլ ավելի սերտ փոխհարաբերություններ են ստեղծվում սովորողների, ինչպես նաև սովորողների և ուսուցչի միջև: Սովորողը այլ հայացքով է ընկալում մարդկային հարաբերությունները, հանդիպում է իր հասակակիցների հետ, նոր փորձ է կուտակում:
Ճամփորդություններից հետո սովորողներն իմի են բերում իրենց տպավորությունները, ստացած գիտելիքները, կարողությունները` դրանք ներկայացնելով իրենց բլոգներում, կրթահամալիրի կայքերում:

Ուսումնական ճամփորդությունների ծրագրում հաջորդներն են օդերևութաբանական կայանը, Սանահինում Միկոյանների տուն-թանգարանը, Քարահունջը, Բյուրականի աստղադիտարանը։

Համար: 

Կարծիք

Ճամփորդությունները ինձ օգնում են պատմության, աշխարհագրության, ֆիզիկայի գործոնեության մեջ: Պատմությանը օգնում է նրանով, որ սկսում եմ իմ անցած դասերը ավելի լավ հասկանալ, ավելի խորը ճանաչել: Աշխարհագրությանը օգնում է նրանով, որ սկսում եմ աշխարհագրական դիրքի մասին լավ իմանալ, սկսում եմ իմ հայրենիքը ավելի մոտիկից ճանաչել, թե որը որտեղ է գտնվում: Ֆիզիկային այն ամենաշատն է օգնում, քանի որ ամեն քայլափոխը ուսումնասիրում է ֆիզիկան: Ճամփորդության ժամանակ մենք շրջում են լճերով, գետերով հանդիպում ենք տարբեր երևույթների և ամեն մի երևույթ սկսում ենք ավելի լավ ճանաչել:

Ճամփորդությունները տալիս են ինձ,վիրտուալ պատկերների իրական ծանոթացում։Ճամփորդությունները օգնում են դժվարություններ հաղթահարելու փորձ ձեռք բերել։Ճամփորդությունների ընթացքում ուսուցիչների հետ շփում լինում է ընկերակա,որը մեզ օգնում միջավայրում ավելի ազատ լինել։Ճամփորդության շնորհիվ կտրվում ենք առորյաից ։Ճամփորդությունները մեզ օգնում են մեր իմացած տեսնելու շնորհիվ կատարելագործել և պատկերացնելով ստանալ կարողություններ և նոր գիտելիքներ։

Ճամփորդության ես չեմ մասնակցել, բայց իմ կարծիքով ճամփորդության ժամանակ աշակերտը հնարավորություն է ունենում ստանալ գիտելիքները գործնականում կիրառելու հմտություն: Աշակերտները ուսուցիչների հետ ավելի ընկերական են լինում և տվյալ առարկային ավելի սիրով են մոտենում: Այս դպրոցում մենք հնարավորություն ենք ունենում զբաղվել մեր սիրելի աշխատանքով և հնարավորություն ենք ունենում ծանոթանալ գիտնականների հետ:

Ինձ ճամփորդությունները տալիս են ազատ լինելու հնարավորություն,լսելու տարբեր պրոֆեսիոնալ մասնագետների խոսքը:Ես շատ եմ սիրում մասնակցել եռօրյա,հնգօրյա ճամփորդությունների, քանի որ կտրվում եմ համակարգչից,հեռախոսից,տնից, դասերից: Երբ ճամփորդում եմ թանգարաններ,իմ գիտելիքները ավելի են զարգանում, և գիտելիքս արտացոլում եմ իմ բլոգում և ենթակայքում:Եթե ճամփորդում եմ իմ դպրոցով, հասակակիցներով,համոզված եմ լինում,որ օրս շատ հետաքրքիր կանցնի: Շատ եմ սիրում երբ ճամփորդությունից վերադառնում եմ տուն, բլոգումս և ենթակայքում լուսաբանում եմ իմ ճամփորդությունը:

Ճամփորդոթյունները իմ կարծիքով համ օգտակար, են համ հետաքրքիր: Մինչ ճամփորդության գնալը, դու սովորում ես գիտելիքներ, որոնք կապ ունեն ճափորդության հետ: Երբ արդեն գնում ես ճափորդության, դու քո գիտելիքներն ես ստուգում, այսինքն` ամփոփում ես և կարողանում ես փորձել քո ընկերների հետ, թե ով ավելի շատ բան գիտի:

Ուսումնական ճամփորդությունները սովորողին շատ բաներ են սովորեցնում, նախ սովորողը սովորում է ճանապարհը, ինչպես հասնել այնտեղ, տեղանքն է ուսումնասիրում, ծանոթանում է տեղանքի պատմությանը, գիշերակացով ճամփորդությունների ժամանակ սովորում են առաջին բուժօգնության կանոնները, ինչպես խարույկ վառել, անտառում որ սնկերն են թունավոր, որը՝ ոչ, ծարավ լինելու դեպքում ինչն է հագեցնում ծարավը։ Գործնականում աշակերտները ավելի շատ բան են սովորում։

Ճամփորդությունները գիտելիք կարող են տալ, բայց ոչ այնքան ինչքան որ սովորողը կստանա դասարանում։ Ճամփորդությւոններով երեխաները ավելի շատ կյաքնի փորձ են ձեռք բերում (կրակ վառել, ցախ կոտրել և այլն․․․) իսկ դպրոցական գիտելիք այդքան էլ շատ չեն ստանում և ինչ էլ ստանում են լիարժեք չի տպավորվում, քանի որ երեխան չի գալիս դասի որպեսի լսի ինչ֊որ տեղեկություններ, նա պարզապես գալիս է ճափորդության։ Կարելի է ասել որ ճափորդությւոնները իրենց հետքը թողնում եմ, բայց ոչ լիարժեք ․․․

Իհարկե ես համաձայն եմ այս նոր նախագիծը իրականացնել: Կարծում եմ շատ ավելի հաճելի է դասը յուրացնել բնության գրկում կամ այլ դպրոցի աշակերտների հետ: Նրանք ինչ իմանան կփոխանցեն մեզ, իսկ մենք նրանց: Մի խոսքով կլինի գիտելիքի փոխանակում: Կ ծանոթանալ և կլինեն ընկերներ: Ինչու ոչ նաև աշակերտները կոգեևորվեն և ավելիսիրով կսովորեն այն ինչ պետք է սովորեն դասարանում: Ցանկացա առանձնացնել այս հատվածը` (Ճամփորդությունների ժամանակ էլ ավելի սերտ փոխհարաբերություններ են ստեղծվում սովորողների, ինչպես նաև սովորողների և ուսուցչի միջև: Սովորողը այլ հայացքով է ընկալում մարդկային հարաբերությունները, հանդիպում է իր հասակակիցների հետ, նոր փորձ է կուտակում): Ինձ շատ դուր եկավ այս վերլուծությունը:

Ուսումնական ճամփորդությունները օգնում են ստացած ՛՛թեորեմական՛՛ գիտելիքները օգտագործել պրակտիկայում։ Ճամփորդությունը օգնում է սովորողին տպավորել ստացած գիտելիքը ուղեղում և օգտագործել առօրյայում։ Ուսումնական ճամփորդությունների ժամանակ տղան դառնում է տղամարդ,քանի որ ճամփորդությունները կոփում են մեր դիմադրողականությունը,սովորեցնում դիմակայել տարբեր իրավիճակների և ապրել ամեն պայմանում։ Ճամփորդությունների ժամանակ սովորում ենք օգնել մեկս մյուսին և ինքներս հայթհայթել այն ինչ պետք է։ Ուսումնական ճամփորդությունները նաև շատ լավ օգնում են մեր ինքնաճանաչողականությանը,քանի որ ճամբարների և ճամփորդություների ժամանակ դուրս ենք գալիս մեր տան հարմարավետ միջավայրից և արդեն երես առ երես հանդիպում բնությանը։ Ճամփորդությունները նաև շատ լավ միջոց են նոր ընկերներ ձեռք բերելու։

Ես կարծում եմ,որ ուսումնական ճափորդությունները շատ կարևոր են աշակերտների համար,նրանք ճամփորդություններից շատ բաներ են սովորում,ճանաչում են հայաստանը ավելի լավ,եթե ճափորդությունը լինում գիշերակցով այսինքն մեկ կամ ավելի գիշերներով,երեխաները շբվում են իրենց ուսուցչուհիների հետ ավելի մոտիկից և ստղեծում են ընկերական միջավայր:Աշակերտները ձեռք են բերում նոր ընկերներ:Ճափորդույթուններին մասնակցելով մենք շատ բան ենք իմանում այն տեղի մասին որտեղ որ ճամփորդելու ենք և այդպես շատ ճամփորդելով աշակերտը ձեռք է բերում շատ գիտելիք:Ես ճամփորդություններում ամենաշատը սիրում եմ երեկոյան ժամը,երբ խարույկ ենք վառում,նստում շուրջը մեր սիրելի ընկեր Նելլին կիթառ է նվագում ու երգում և օրը անցնում է շատ ուրախ և հետաքրքիր:

Ես այս հոդվածի հետ համամիտ եմ:Իմ կարծիքով դասերը անցկացնելը ուրիշ միջավայրում շատ հետաքրքիր և շատ օգտակար է:Կարծում եմ չորս պատերից դուրս աշխատելով,ուսումնասիրելով և սովորելով ավելի մեծ ձեռքբերումների ենք հասնում,քան ուրիշ դպրոցների սովորաղները,ովքեր ամեն օր սովորական դասագրքերի դասերը անգիր են ուղղակի անում:Ճամփորհդելը շատ լավ կողմեր ունի ինչպիսիք են օրինակ` նոր վայրեր ուսումանսիրելը,նոր մարդկանց հետ շփվելը,ինքնավստահություն ձեռք բերելը և այլն:Այս տարվա մեջ մի քանի դասեր ունեցել ենք,որոնք անցկացրել ենք դպրոցից դուրս և շատ հետաքրքիր են ստացվել:Օրինակ մեր ռուսերենի և անգլերենի ուսուցչուհիների հետ դասը անցկացրել էինք <<Ազգային պատկերասրահ>>-ում և այնտեղ ցանոթացանք նոր նկարիչների,նոր կտավների հետ:Իմ կարծիքով ամենից հետաքրքիր ձևը ճամփորդելու դա բնության գրկում է,երբ հանդիպում են մարդը և բնությունը:

Ուսումնական ճամպորդությունները ոչ բոլորի համար է ուսումնական: Շատ աշակերտներ կարծում են, որ այն ուղակի խաղալու համար է, չգիտակցելով, որ այո այն շատ գիտելիք է տալիս մեզ բոլորիս գոնե մի քիչ: Տիկին Հասմիկը հոդվածում նշում է, որ երբ մի խմբով ճանհապարհորդեցինք դեպի Գառնիի թիվ 1 դպրոց, այնտեղ շատ ընկերներ ձեռք բերեցինք: Համաձայն եմ այս մտքի հետ, ուսումնական ճամպորդությունները հնարավորություն են տալիս մեզ ձեռք բերելու նոր ընկերներ: Համաձայն չեմ այն մտքի հետ, երբ ասում է, որ ճամպորդությունից առաջ երեխաները տեղեկություն են հավաքում տվյալ վայրի մասին: Սակայն կարծում եմ, որ դա այդքան էլ այդպես չէ, ոչ բոլորն են տեղեկություն հավաքում, սովորում: Ճամպորդության ժամանակ սովորողները սովորում են ուսումանսիրել, հետազոտել: Ես ինքս նույնպես շատ եմ սիրում ճամպորդել, քանի որ ինձ համար այն հնարավորություն է ուսումանսիրել և իմանալ ավելին քան ես գիտեմ, թեկուզ բնության մասին:

ՈՒսումնական Ճամփորդութունները օգնում են ստանալ նոր գիտելիքներ և օգնում են օգտագործել գիտելիքները իրենց նպատակով: Իմ կարծիքով ուսումնական ճամփորդությունը օգնում են ուսումնասիրել: Ուսումնական ճամփորդությունները զանգացնում են խմբում աշխատելու ունակությունը: Ես անձամբ շատ եմ սիրում ուսումնական ճամփորդություննեը և շատ եմ սիրում աշխատել խմբով: Նաև ուսումնական ճամփորդությունները օգնում են ձեռք բերել նոր հետաքրքրություններ: Նաև ես շատ եմ սիրում, որ ուսումնական ճամփորդությունները լինում են գիշերակացով, որովհետև այպես ես ավելի շատ ժամանակ եմ ունենում ուսումնասիրելու համար: Նաև ուսումնական ճամփորդությունները անտառներում սովորեցնում եմ գոյատևել վայրի տեղերում, սովորեցնում են կրակ վառել, վրան խփել և այլ:

Իմ կարծիքով ճանփորդություները երեխային չէն կարող տալ այն ինչ կորող ես իմանալ դասի ժամանակ։Ճամփորթույան ժամանակ մարդը կարող է սովորել թէ ինչպես պետք քեզ անտառում,սարերում և այլն։ Ճամփորդության ժամանակ տղան դառնում է տղամարդ,այտեղ մարդ կարող է ամեն ինչ ինքն փորձել և սովորել։Իսկ դպրոցում չէս կարող այդպիսի պրակտիկա ունենալ։Դպրոցում պետք չէ վրան դնել կամ էլ խարույկ վառել։

Ուսումնական ճամփորդությունները օգուտ է տալիս մեզ։Մենք ճանաչում ենք նոր վայրեր և ձեռք ենք բերում մի շարք հմտություններ։Օրինակ մենք դարնում ենք հարմարվող և ձեռք ենք բերում դիմադրողականություն։Ամեն մի ճամփորդությունից հետո մենք ձեռք ենք բերում նոր գիտելիք։

Իմ կարծիքով ճամփորդությունները տալիս են հաճույք, ինքնավստահություն և ազատություն: Եթե ճամփորդությունները լինում են գիշերակացով, երեխաները սկսում են շփվել իրար հետ և ուսուցիչների հետ: Ժամանակ են անցկացնում բնության գրկում, և շատ բաներ են իմանում այդ վայրի մասին: Իսկ երբ գալիս է երեկոն, երեխաները և ուսուցիչները սկսում են խարույկ վառել: Մինչև այդ ինչ որ կանանց խումբ սկսում է պատրաստել կարտոֆիլը: Երբ խարույկը պատրաստ է լինում, սիրելի ընկեր Նելիի կիթառի նվագակցությամբ մենք սկսում ենք երգել: Մոտ 30 րոպե երգում ենք, իսկ հետո գալիս է կարտոֆիլը: Շատ հաճելի է անցնում բնության գրկում ուսուցիչների և երեխաների հետ:

Ճամփորդության գնալիս մենք գնում ենք այնպիսի տեղեր ուր մենք չենք եղել: Ճամփորդության գնալիս մենք սովորում են ավելին: Ճամփորդությունը ավելի խորացված ուսուցում է: Սովորողները ճամփորդությունից վերադառնալիս գրում են այն ամենը թե ինչ սովորեց այդ մի քանի ժամվա ընթացքում կամ նույնիս մի քանի օրվա ընթացքում: Ճամփորդության մեջ կա մի հետաքրքրություն, որը սովորողին իր մոտ է քաշում: Ինձ շատ են դուր գալիս արշավները: Արշավները փոքր ինչ նման են աշխարհագրական ճամփորդություններին, քանի որ մենք արշավելիս զգում ենք մեր երկրի աշխարհագրական դիրքը:

Կարծիք ավելացնել

Plain text

  • No HTML tags allowed.
  • Web page addresses and e-mail addresses turn into links automatically.
  • Lines and paragraphs break automatically.
CAPTCHA
Խնդրում եմ մուտքագրել պատկերված տեքստը
Image CAPTCHA
Enter the characters shown in the image.
  • Deutsch
  • 日本語
  • Հայերեն
  • English
  • Georgian
  • Русский