Միավորված նախագծերը` հեղինակային կրթական ծրագրի ձեռքբերում

Հեղինակային կրթական ծրագրով ձեռքբերում կամ դրան ուղղված քայլ եմ համարում այս ամիս իրականացրած երկու նախագիծ` 

• «Ուսումնական Արագածոտն. «Կարդում ենք Տերյան, Թումանյան, Չարենց»
• Արևելքի օրեր

Նախագծերը միավորել են տարբեր սովորողների, գործընկերային են, հեղինակային ծրագիր են ներկայացնում՝ հրապարակված արդյունք են ունեցել:

Կարծում եմ` նախագծերի ​արդյունավետությունը պայմանավորված էր նաև աշխատանքի ճիշտ բաժանումով: Ամեն մեկն ուներ և անում էր իր գործը: Անչափ կարևոր էր Լուսինե Սարգսյանի` որպես կազմակերպչի ունեցած դերակատարումը:

«Ուսումնական Արագածոտն. «Կարդում ենք Տերյան, Թումանյան, Չարենց» նախագիծն աննախադեպ էր մի քանի առումներով`

• նախագծի իրականացման վայրերը տարբեր են եղել.
• տարբեր են եղել ընթերցվելիք հեղինակները` Տերյան, Թումանյան, Չարենց.
• ներկայացվել են տարբեր ծեսեր (Բարեկենդան, Տրնդեզ) և ծիսական տարբեր պարերգեր.
• տարբեր աշխատանքային խմբեր են մասնակցել.
• համտեղվել-միավորվել են տարբեր նախագծեր. նախագծի ընթացքն ուղեկցվել է գործընկերային փոխադարձ այցելություններով։

Նախապատրաստական աշխատանքները միաժամանակ ընթացել են Երևանում` մեր Ավագ դպրոցում և, ըստ նախապես պայմանավորվածության, Աշտարակի որևէ դպրոցում: Ընդ որում, ամեն անգամ փոխվել են և՛ Ավագ դպրոցի նախագծային խմբերը, և՛ Աշտարակինը: Ամեն անգամ նախապես ընտրվել է մեկ հեղինակ և ազգային մեկ ծես: Նախապատրաստական փուլից հետո հանդիպել ենք, ներկայացել ենք և ներկայացրել, միասին քայլել ենք, արտասանել ենք, երգել ու պարել ենք:

«Արևելքի օրեր» նախագիծն  իր սկզբանե բազմաշերտ էր և իրականացվել է մի քանի ուղղություններով`

• արևելյան գրականության ընթերցումներ. Արևելյան պոեզիա, Օրհան Վելի
• արևելյան գրականության նմուշների թարգմանություն. Նազիմ Հիքմեթ Ռան, Օլխան Վերի, Բեժան Մատուռ.
• տեղեկատվական անիմացիոն ֆիլմերի թարգմություն. Իրան, Թուրքիա,  Վրաստան.
• արևելյան ֆիլմերի դիտում-ներկայացում. իրանական, թուրքական, վրացական.
• արևելյան երաժշտական խմբերի մասին նյութերի թարգմանություն. Mor ve Ötesi, O-Hum, Mgzabrebi.
• արևելյան արդի գրականության՝ կարդացած գրքերի մասին ուսումնասիրություն. Էլիֆ Շաֆակ, Զոյա Փիրզադ։

Նախագիծն իրականություն է դարձել երկարաժամկետ նախագծերի միավորման արդյունքում`

• Լապտեր TV նախագիծ
• «Լապտեր» պատանեկան հանդես
• «Ֆիլմադարան» տեսաբլոգ
• «Մանչուկ TV» թարգմանական տեսաբլոգ 
• «Ռոքադարակ» թարգմանական բլոգ
• «Մտադարակ» պատանեկան ամսագիր

Ընդհանուր դիտարկումներ

• միավորված նախագծերն աշխատանքը գրավիչ են դարձնում.
• միավորված նախագծերը թարմություն ու նոր շունչ են հաղորդում երկարաժամկետ նախագծերին` ապահովելով երկարաժամկետ նախագծերի շարունակականությունը և զարգացումը.
• միավորված նախագծերը ինքնակրթության և հետաքրքրությունների նոր` ընդարձակ դաշտ են բացում.
• միավորված նախագծերը նախասիրությունների զարգացման հարթակ են դառնում.
• միավորում են մեծ թվով սովորողների, դասավանդողների և համագործակցային են։

Եվ վերջում` նախագիծ ասվածը անփոփոխ չէ և չպետք է լինի: Այն, ինչպես ինքը` մարդը, անընդհատ վերափոխվելու և զարգանալու խնդիր ունի, հակառակ դեպքում կդեգրադացվի: Բայց ծայրահեղության էլ չպիտի հասնենք` անելով միայն այն, ինչ նախագծում գրված է:

Նախագիծը, իմ համոզմամբ, նախահաշվարկ չէ և չի էլ կարող լինել, որովհետև, ի տարբերություն, չոր հաշիվների ու հաշվարկների, մենք գործ ունենք Մարդու` երեխայի, դեռահասի հետ: Գործ ունենք նրանց նախասիրությունների, հետաքրքրությունների, բնավորության առանձնահատկությունների հետ, որոնք հաճախ կարող են ուսուցչի նախապես «գծած» նախագիծը «շեղել» և տանել իրենց նախընտրած ուղղությամբ: Եվ դա, ինչ խոսք, լավ է: