Ընտանեկան ուսուցման արտակարգ ստուգատես...

Կրթահամալիրում հեռավար-առցանցի այս շրջանը սովորողների համար լրացուցիչ կրթություն չէ, սա ուսուցման եղանակ է՝ Կրթության մասին ՀՀ օրենքով որոշված, Հանրակրթության մասին օրենքի փոփոխություններում արձանագրված, ՀՀ կառավարության «Հայաստանի Հանրապետությունում արտակարգ դրություն հայտարարելու մասին» որոշումով հիմնավորված։ Ասել է թե՝ սովորողի ընտրությամբ չէ. ով կրթահամալիրի որևէ դպրոցի, քոլեջի սովորող է, նա մասնակից է ուսուցման այս շրջանի և գնահատվում է ըստ իր մասնակցության։

Խոսքը կրթահամալիրում իրականացվող բոլոր կրթական ծրագրերի մասին է՝ 2-5 տարեկանների խնամքի և զարգացման, 5 տարեկանների ուսուցման, 1-3-րդ դասարանների, 4-5-րդ դասարանների, 6-8-րդ դասարանների, 9-րդ դասարանի, 10-12-րդ դասարանների։  Ուսուցման հեռավար ձևից կրթական ծրագիրը չի փոխվում, բայց փոխվում է ողջ կազմակերպումը՝ օգտագործելով այս եղանակի բոլոր առավելությունները և չեզոքացնելով վտանգները, կառավարելով ռիսկերը։ Մի բան է մնում անփոփոխ, որ մերը հեղինակային մանկավարժություն է, և հեղինակը՝ յուրաքանչյուր մանկավարժական աշխատողը։ Հեռավար ուսուցում է՝ ուսուցում տանը՝ օգտագործելով նաև տնային ամբողջ զինանոցը՝ նյութական, մարդկային՝ մասնագետ ծնողների, պապ ու տատի, գնացող-եկող մարդկանց, որ ինքնամեկուսացված չեն։ Սա տարատարիք ուսուցում է, ինչի օրինակները տեսնում ենք... Հաջողությունը երաշխավորված է, քանի որ մեզանում ընդունված սովորող-սովորեցնողի մեթոդը տուն է մտել։

Հեռավար ուսուցման մեր ծրագիրը բաց է, հրապարակված ոչ միայն մեր mskh.am-ի հարթակներում՝ կայքում, ենթակայքերում, ուսումնական բլոգներում ուսուցիչների և սովորողների, այլ նաև «Հայկական կրթական միջավայր» պորտալի «Հեռավար ուսուցման համալիր» էջում, որ ԿԳՄՍ նախարարությունն է ներկայացրել, սոցցանցերում. կարող են մասնակցել այլ դպրոցների սովորողներ, ուսուցիչների, խմբեր։ Մեզ արդեն դիմել են կրթահամալիրի ՖԲ էջով, կրտսեր դպրոցում կցումներ են արվում հերթով, միջին և ավագ դպրոցներում, քոլեջում գրանցվում են դասարաններում, խմբերում, կրթահամալիրում վերապատրաստված ուսուցիչները դիմում են ուղիղ կրթահամալիրի իրենց ընկերներին...

Քանի որ օգտագործում ենք, պիտի օգտագործենք հեռավար ուսուցման նոր գործիքներ, ուրեմն խոսքը նաև մասնագիտական զարգացման մասին է, որ պիտի արվի ամեն օր, ինքնակրթության ու մասնագիտական զարգացման պարապմունքների՝ որպես կամավորական և վճարովի աշխատանք։ Հատկապես մանկավարժության, մենթորական լաբորատորիաների ղեկավարները, ինքնակրթությամբ առաջ ընկնող ուսուցիչները իրենց փորձի մասին, թեկուզ փոքր, պիտի պատմեն։ Լավ է, որ Հեռավար ուսուցման համալիր էջում կան, կլինեն նաև աշխատանքային նոր գործիքներ. ծանոթացեք դրանց, ցույց տվեք, որ առաջինն ենք նաև սովորելիս:

Սա նաև մեր հեղինակային TV-ները գործի դնելու հարթակ է. և՛ ներկայացնելու են այս նոր կազմակերպումը, և՛ սպասարկելու են դրան։ Քանդակի դպրոցից Վիգենը և Դավիթը վճռական սկսել են... Կրկնում ենք մեր դիմումը TV-ներին. կարող ենք հնարավորությունները մեկտեղել։

Սա մի շրջան է, որ սովորողները պիտի շատ կարդան՝ տպագիր, թե էլեկտրոնային լավագույն գրքերը, գեղարվեստական և ոչ միայն... Պիտի դիտեն լավագույն ֆիլմերը, լսեն լավագույն երաժշտություն՝ դրանով իրենց միջավայրը դարձնելով հակաբացիլ։ Ես հենց ընտանեկան ընթերցումը, դիտումը, ունկնդրումը, քննարկումը նկատի ունեմ...

Եվ ամեն օր պետք է «Դպիր» գան հեռավար-առցանց ուսուցման խնդիրները, առաջարկները, լուծումները, այլոց և սեփական փորձը, մանկավարժության-մենթորական լաբորատորիաների մշակումները, փորձի ուսումնասիրություն-վերլուծություն-ամփոփումը։ Ակտիվ պիտի թարմանա մեր մեդիագրադարանը, լրանա հեռավար ուսուցման նոր փաթեթներով։

Եվ վերջում։ Կրթահամալիրի ֆիզիկական միջավայրում բոլոր պարապմունքները դադարեցված են, միայն հեռավար ուսուցման և կրթահամալիրի ֆիզիկական միջավայրի խնամքի, բարելավման հետ կապված աշխատանքներն են արվում հիմա։ Գարունը չի ենթարկվում արտակարգ դրության ռեժիմին, պարետին։ Խոսքը հերթապահություն սահմանելու մասին չէ. շփումը նվազագույնի հասցնելով՝ բոլորս աշխատանքի մեջ ենք, այն աշխատանքի, որ առանց հավաքների, մեծաքանակության, պիտի ֆիզիկական միջավայրում արվի՝ պահպանելով հիգիենայի բոլոր կանոնները։ Դա նախ՝ պարտիզապուրակային գործունեությունն է, որ ինքնուրույն-մենակ աշխատանքի լավ հնարավորություն է, ու պիտի արվի հիմա. ապրիլի 14-ին արդեն գարնանային աշխատանքի առաջին շրջանը անցած կլինի։ Հետո՝ մեր կրթական օբյեկտներում նյութական բարելավման այն աշխատանքները, որ պայմանավորվել ենք, որոշել ենք, ու պիտի արվեն։ Բա ե՞րբ արվեն, եթե ոչ հիմա։

Երրորդը ընդունելության հետ կապված աշխատանքներն են, էլի առցանց, բայց որոշակի, կարգապահ պետք է ներկայացնել ընդունելության պայմանները, պահանջները, մատչելի 6 տարեկանների ծնողներին, 2-12-րդ դասարան, քոլեջ դիմող սովորողներին։

  • Deutsch
  • 日本語
  • Հայերեն
  • English
  • Georgian
  • Русский