Էլեկտրոնային բացիկների ստեղծում

Ուսուցումը հետաքրքիր և կենդանի դարձնելու համար շատ կարևոր է այն  կազմակերպել երեխայի հետաքրքրություններին համապատասխան:  Հատկապես կրտսեր դպրոցում‚ որտեղ բոլոր առարկաները դասավանդում է դասվարը‚ ուսումնական նախագծերով աշխատելն ավելի արդարացված է: Նախագիծը կազմվում է այնպես‚ որ  այն ներառի ուսումնական բոլոր բնագավառները‚ ունենա ընդհանուր ուղղվածություն և նպատակ:

Սովորաբար ծրագիրը‚ նախագիծը քննարկում ենք ուսումնական կենտրոնում‚ ուսուցողական ծրագրի դասավանդողների խմբով: Ընտրվում են թեմաներ‚ որոնք ներառված են կրթահամալիրի ուսումնական օրացույցում‚ համապատասխանում են հանրակրթական պետական չափորոշիչներին‚ արտացոլում են կրթահամալիրի զարգացման ծրագրի պահանջները:  Իսկ քանի որ կրթահամալիրը մեդիակրթություն իրականացնող հաստատություն է‚ յուրաքանչյուր նախագիծ իրագործվում է թվային զանազան միջոցների կիրառմամբ:

Համակարգչային  հմտությունները սովորողների մոտ ձևավորվում են համակարգչային ծրագրերի ամենօրյա օգտագործմամբ:  Դրա շնորհիվ  ուսումնական գործունեության ընթացքում ստեղծվում են էլեկտրոնային տարաբնույթ նյութեր՝ ֆիլմեր‚ ընթերցարաններ‚ հարցազրույցներ‚ հոլովակներ‚ բացիկներ և այլն:

Կրտսեր դպրոցում սովորողներն ավելի շատ աշխատում են Paint նկարչական‚ MovieMaker մոնտաժային ծրագրերով: Չորրորդ դասարանի սովորողն արդեն հեշտությամբ կարողանում է Movie maker ծրագրով  փոքրիկ ֆիլմեր‚ կարաոկեներ‚ աուդիոգրքեր  ստեղծել:  Համատեղ աշխատանքի արդյունքում և՛ սովորողը‚ և՛ ուսուցիչը փորձում են արդեն յուրացրած ծրագրերն օգտագործել նորովի և ստեղծել ավելի գրավիչ ու հետաքրքիր նյութեր:

Մենք որոշեցինք այդ ծրագրերի միջոցով ստանալ շարժապատկերներ: Հենց այդպիսի մի փորձնական աշխատանքի արդյունքում էլ ստեղծվեցին մեր ամանորյա ուրախ բացիկները‚ որոնք մեծ հետաքրքրություն և աշխուժություն առաջացրեցին շատերի մոտ (նմուշ 1‚  նմուշ 2):

Հետո`  «Հանրակրթական Դիջիտեքի» ուսումնական բաց մեդիապարապմունքին փորձեցինք ներկայացնել շարժվող բացիկներ ստեղծելու  մեր փորձը:

Ինչի՞ց սկսել:

Նախ ընտրվում է թեման‚ որով պետք է ստեղծվի «շարժվող» բացիկը: Հանրակրթական Դիջիտեքի՝ արդեն խորհրդանիշ դարձած դդումը այդ շաբաթվա մեր ուսումնական գործունեության հիմնական թեման էր:

Սովորողները դդում բանջարեղենի‚ նրա օգտակար հատկությունների մասին  հետաքրքիր տեղեկություններ էին հավաքել՝ օգտվելով համացանցից‚ ծնողների ու հարազատների հարցազրույցներից‚  դդումով ուտեստների հետաքրքիր բաղադրատոմսեր էինք գտել:

Դդում կերպար ստեղծելու համար  հորինեցինք «ռոդարիկներ» (երևակայական պատմություններ)‚ տարբեր «դդմապատմություններ», աքրոստիկոսներ:

Հետո որոշեցինք մեր հորինած պատմությունները պատկերել շարժական  բացիկների տեսքով:

Ինչպե՞ս ստեղծել բացիկը:

Օգտագործվող թվային միջոցներ՝ անհատական նոթբուք-նեթբուքներ

Կիրառվող ծրագրեր՝ Paint; MovieMaker

Աշխատանքի ընթացքը։ Բացիկը ստեղծելու համար սովորողը շարժապատկերի բովանդակությունը բաժանում է նախապես  ծրագրած մասերի:  Paint ծրագրով քայլ - քայլ  նկարում է բոլոր կադրերը և բոլոր նկարները պահպանում մեկ թղթապանակում: Նկարները պահպանելու համար նպատակահարմար է դրանք անվանել հաջորդական թվերով‚ որպեսզի հետագայում հեշտ լինի  կցել իրար:

MovieMaker ծրագրով ստեղծված նկարները հաջորդաբար կցում է իրար: Ավելացնելով ծրագրի՝ կադրերն արագացնող գործիքը (էֆեկտ)‚ նկարներն արագ-արագ  հաջորդում են իրար և տպավորություն է ստեղծվում‚ որ  պատկերը շարժվում է:

Կցում է  համապատասխան երաժշտությունը և ֆիլմը պահպանում: Ստացվում է անիմացիոն‚ երաժշտական‚ ուրախ բացիկ:

Նման առաջադրանքները զարգացնում են սովորողների մաթեմատիկական մտածողությունը‚ երևակայությունը‚ ձևավորում են գեղագիտական ճաշակը:

Մեր ուրախ դդմաբացիկները կարող եք դիտել այստեղ:

 

Համար: 
  • Deutsch
  • 日本語
  • Español
  • Հայերեն
  • English
  • Georgian
  • Русский