Մշակույթը զարգանում է ցուցասրահներում և համերգասրահներում

Արձագանք ավերակների հաղթահարման կոչին և այդ թեմայով առցանց քննարկմանը։

Երևանի հարավարևմտյան զանգվածի Բ1 թաղամասի «Մխիթար Սեբաստացի» կրթահամալիրի Գեղարվեստի դպրոցի նկուղային տարածքում ցուցասրահ-թանգարան բացելու նախագիծ

Միայն համեմատության համար նշենք, որ հարևան Վրաստանից  մոտ10 անգամ պակաս պատկերասրահներ  ունենք, որոնք չպատճառաբանված ու չհիմնավորված հարկային բեռի տակ են պատկերասրահների մասին օրենքի բացակայության պատճառով: Առաջադեմ երկրները ապահովում են  հարկային կամ չհարկվող, պետական աջակցությամբ, նպաստավոր պայմաններ պատկերասրահների գործունեության համար, քանի որ մշակույթը զարգանում է ոչ թե նախարարություններում, այլ պատկերասրահներում, համերգասրահներում:

«Մխիթար Սեբաստացի» կրթահամալիրի գեղարվեստի ավագ դպրոցի հյուրատանը, հանգրվանում են ամենատարբեր երկրներից  միջազգային ճանաչում ունեցող հայտնի արվեստագետներ, որոնք սովորողների հետ նախագծեր են իրականացնում և հաճախ նվիրում իրենց աշխատանքները դպրոցին, ինչը վաղուց անհրաժեշտություն է առաջացրել ընդլայնելու ցուցադրության տարածքը և աշխատանքների պահպանման համար տարածք ունենալու խնդիր է առաջացրել: Ելնելով «Ուժեղ ծայրամաս` ուժեղ կենտրոն» ունենալու, մշակութային կյանքի ապակենտրոնացման  ժամանակի թելադրանքից՝  անհրաժեշտ ենք համարում «Մխիթար Սեբաստացի» կրթահամալիրի գեղարվեստի դպրոցի 800քմ նկուղային տարածքը վերածել ժամանակակից արվեստի ցուցասրահ թանգարանի:

Հարկ է նշել, որ ժամանակակից արվեստում ամենատարածված ցուցադրություններից է ինստալյացիան, որոնցից  մեր արվեստում ոչինչ չի պահպանվել և մեր առաջնահերթ խնդիրներից  է համագործակցությամբ AIKA-ի ՝ Արվեստի Քննադատների Ազգային ասոցիացիայի, ՆՓԱԿ –ի և այլ պատկերասրահների և արվեստագետների հետ, պահպանել ցուցահանդեսներից  հետո կորչող ինստալյացիաները, ինչպես նաև հնարավորության դեպքում վերականգնել մի շարք կորսվածներ: Պատկերասրահը կապահովի ինչպես գեղարվեստի դպրոցի զարգացման հեռանկարը, այնպես էլ Երևանի ծայրամասերից  մեկում մշակութային կյանքի ակտիվացումը: