Ուսումնական օրացույց, ռոդարիական շաբաթ
Primary tabs
«Երեխայի ստեղծագործելը առաջին տեղում պետք է լինի` անկախ նրա գործունեության ձևից՝ կլինի այն նկարչություն, երաժշտություն, պլաստիկա, թատրոն, խաղ, մարզանք, գիտելիք, աշխատանք: Երեխան մշակույթ և արժեքներ սպառող չէ, այլ ստեղծող»: (Ջ. Ռոդարի)
Ռոդարիական օրերին երեխաները անընդհատ ստեղծագործում էին: Խաղալով ռոդարիական հնարքներով ու այդ հնարքները դնելով ցանկացած գործունեության հիմքում` տեսնում էի, որ նպաստում եմ սովորողներիս մտքի, ստեղծագործական երևակայության, խոսքի զարգացմանը, շփվելու ունակությանը և միջանձնային հարաբերությունները կարգավորելու հմտությանը: Խոսքը երեխայի ընդհանուր զարգացման խթանն է: Սովորողների լեզվական ունակությունների, գրավոր ու բանավոր խոսքի և տրամաբանական մտածողության զարգացումը ծրագրի հիմնական նպատակներից մեկն է: Ռոդարիական օրերը սկսեցինք հին խաղերից, հարցերով ու պատասխաններով գրությունների խաղից: Այս խաղը մեծ ոգևորություն առաջացրեց, սովորողներին հատկապես դուր եկավ խմբային աշխատանքը, այդ աշխատանքի արդյունքում ստեղծված փոքրիկ պատմվածքները և համագործակցության մթնոլորտում աշխատելը:
Գրավոր խոսքը զարգացնելու համար մեր առաջին առցանց քննարկումն արեցինք, կարդացինք «Ալիսա-գլորիկ» հեքիաթը և «Կարծիք» բաժնում գրեցինք մեկնաբանություններ: Հաջորդ օրը դասարանում բացեցինք մեկնաբանությունները ու սկսեցինք միասին խմբագրել կարծիքները, սովորողները սկսեցին նկատել մեկը մյուսի սխալները, և ուղղեցինք բոլոր վրիպումներն ու սխալները: Հետո «Ալիսա-գլորիկ»-ը գլորվեց ու հասավ խոհանոց: Տեխնոլոգիայի ժամին պատրաստեցինք Ալիսա-գլորիկներ ու սկսեցինք հորինել տարբեր պատմություններ, նյութը մեզ հնարավորություն տվեց զարգացնել բանավոր խոսքը, տեխնիկական հմտությունները, գրավոր նկարագրի և հմտության տիրապետումը, նկարագրել ու բնութագրել մեր հերոսին, վերլուծել կերպարը:
Ամեն երեխա հեքիաթասաց դառնալու, աուդիոգրքի հեղինակ դառնալու, հեքիաթով «խաղալու» հնարավորություն է ունենում: Ռոդարիի «Ծիածան» բանաստեղծությունը սովորելիս ամեն երեխայի հանձնարարեցի նկարել բանաստեղծության տարբեր տողեր ու տեսարաններ և նկատեցի, որ մի քանի ամիսների ընթացքում սովորողներն ավելի լավ են տիրապետում paint ծրագրին. նկարներն ավելի պարզ էին, գեղեցիկ ու ստեղծական:
Ռոդարիի «Երկիր, որտեղ ամեն ինչ կլոր էր» հեքիաթը կարդացինք մաս առ մաս՝ ընդհատված ընթերցանության մեթոդով: Սա մեր երկրորդ առցանց քննարկումն էր, կարծում եմ՝ սա ավելի ստացված քննարկում էր, որովհետև արդեն ունեինք մուտքագրելու կարողություն և հմտություն: Տեխնոլոգիայի ժամին նկարեցինք երկիր, որտեղ ամեն ինչ կլոր էր:
Այսպիսով՝ հարկ է նշել, որ ծրագրում ներառված այս բաղադրիչն արդարացված է: Այն զարգացնում է խոսքի մշակույթը, ստեղծագործելու հմտությունը, շփման կարողությունները և տեխնոլոգիական գիտելիքները:
- Բացվել է 2104 անգամ
