Մերի Առաքելյան
Արմինե Աբրահամյան

Մեդիայի կիրառումը երաժշտական գործունեության մեջ

Կրտսեր դպրոցում երաժշտություն առարկան գործունեության մի ձև է, որի նպատակը սովորողի երաժշտական ունակությունների բացահայտումն ու գեղագիտական ճաշակի ձևավորումն է: Այն «Իմացումի հրճվանք» ծրագրի կարևոր բաղկացուցիչն է և իրականացվում է դասավանդողների` երաժշտության մասնագետի և դասվարի համագործակցության արդյունքում: Երաժշտություն առարկան ներառում է գործունեության մի քանի ձևեր, որոնցից մեկն էլ երաժշտության ունկնդրումն է: Ճանաչողական նպատակ ունենալուց բացի, երաժշտության ունկնդրումը սովորողի հոգևոր դաստիարակության և ճաշակի զարգացման լավագույն միջոցներից մեկն է: Ունկնդրումն առավել արդյունավետ և գրավիչ դարձնելու համար այն կարելի է համադրել ստեղծագործական մեկ այլ պրոցեսի հետ (նկարչություն, ծեփագործություն, պար և այլն): Ժամանակակից մեդիամիջոցների ամենօրյա գործածությունը    երաժշտության ունկնդրումից բացի, հնարավորություն է ընձեռում լսողությամբ ընկալված երաժշտական նյութը վերածել տեսապատկերի (ֆոտոնկարաշարեր, համակարգչային նկարներ, կոմպոզիցիաներ), ինչն ավելի ընկալելի և պատկերավոր է դարձնում նյութը` գրավիչ դարձնելով ունկնդրման ընթացքը:   Սակայն երաժշտության ունկնդրումն ինքնանպատակ չէ: Այն չի սահմանափակվում զուտ  լսողական ընկալմամբ, այլ  լողությամբ ընկալված նյութը  մշակվում է` նպաստելով սովորողի ստեղծագործական ունակությունների դրսևորմանը և ինչո՞ւ չէ նաև ինքնաարտահայտմանը:

Սովորողն աշխատանքի ընթացքում հնարավորություն է ունենում կիրառել ձեռք բերած մեդիահմտությունները և միևնույն ժամանակ կատարել ստեղծագործական աշխատանք, որը կարող է ուսումնական նյութ դառնալ ուրիշների համար: Ի վերջո չհեռանալով իրեն այդքան հետաքրքրող զբաղմունքից` համակարգչով աշխատելուց, նա միաժամանակ կատարում է իրեն հետաքրքիր և օգտակար աշխատանք : Չէ ո՞ր աշխատանքի ընթացքն  է նպաստում նյութի բովանդակության  լիարժեք ընկալմանը: Թեպետ տվյալ դեպքում կարևորը բուն ընթացքն է և այն բերկրանքը, որը մարդ ստանում է միայն ստեղծագործելիս:

Աշխատանքի թեման`  Անտոնիո Վիվալդի,  «Տարվա եղանակները» 
Աշխատանքի ընթացքը`

• ծանոթացում ունկնդրվող նյութին
• երաժշտության ունկնդրում
• վերլուծություն
• համեմատում, դիտարկում
• զգացողությունների վերարտադրություն պատկերի միջոցով
• պատկերների դասավորություն` երաժշտության ընթացքին և բնույթին համապատասխան