Նաիրա Հարությունյան

Մեդիատեխնոլոգիաները Գանյան դպրոցում

Ամփոփելով այս ուսումնական տարվա ընթացքում «Գանյան» դպրոցում կատարված աշխատանքները` պետք է արձանագրել,  որ մեդիահմտությունների յուրացման առումով մենք մեծ քայլերով տարեցտարի առաջ ենք գնում: Եվ հիմնականում դա արտացոլվում է նաև սովորողի և դասավանդողի հետաքրքրությամբ դեպի թվային տեխնոլոգիաները: Իհարկե, մարդը միշտ պետք է անի  այն, ինչ սիրում է: Սակայն կարող եմ ասել, որ եթե կարողանում ես ինչ-որ բան լավ անել, ապա սկսում ես սիրել այն: Դրանով է պայմանավորված նաև մեր սովորողների հետաքրքրությունը դեպի համակարգիչը: Պետք է փաստենք, որ համակարգիչն արդեն դիտում ենք որպես զուտ գործիք մեր մտքի և մտահղացումների իրականացման ճանապարհին: Վերանում է այն լարվածությունն ու ենթագիտակցական վախը, որով առաջ նստում էինք համակարգչի դիմաց: Այսինքն` սովորողն արդեն տիրապետում է և գիտի վերաբերվել թվային միջոցներին: Դա երևում է նաև նրանից, որ մենք, ավելի ու ավելի շատ օգտագործելով համակարգիչն ու թվային միջոցները, ավելի քիչ ենք փչացնում ու վնասում այն: Եթե մինչ այդ երեխաները ձգտում էին դեպի համակարգիչը` ժամանցային ծրագրերով աշխատելու համար, ապա այժմ առաջինը, ինչ նրանք անում են, ինտերնետից նյութեր ներբեռնելն ու իրենց հետաքրքրող ինֆորմացիան ստանալն է: Եթե մինչ այդ նրանք սովորում էին ինչ-որ համակարգչային կիրառական ծրագրեր` պարզապես դրանք սովորելու համար, ապա հիմա այդ ծրագրերը օգտագործում են` իրենց մտահղացումները ներկայացնելու համար: Հիմնականում մեր նպատակն այն է, որ օգտագործելով թվային տեխնոլոգիաները` սովորենք, թե ինչպես կարելի է սովորել, քանի որ այսօրվա առաջավոր ծրագիրը կարող է արդեն վաղը պետքական չլինել: Եվ կարծես թե այս առումով էլ մենք ունենք որոշակի հաջողություններ:  

Մի փոքր, բնականաբար, ավելի դանդաղ, բայց հաստատուն  է ընթանում նաև դասավանդողների կողմից թվային միջոցների յուրացումը: Նրանք ևս ակտիվորեն օգտագործում են ինտերնետն ու մեր կամ այլոց կողմից ստեղծված շատ ծրագրեր` ուսուցումը ավելի արդյունավետ դարձնելու նպատակով:

Ես կարծում եմ, որ այսօր Հայաստանում եզակի երևույթ է նաև այն, որ մեր սովորողները, սկսած 2-րդ դասարանից, կարողանում են օգտվել էլեկտրոնային փոստից, ինտերնետում նկարներ դիտել, տեքստեր մուտքագրել և այլն: Կարծում եմ, որ կրթահամալիրում անընդհատ նորացվող թվային տեխնիկան և վերապատրաստումները հնարավորություն են տալիս մեզ անընդհատ ձեռք բերելու նոր հմտություններ, փոխանցելու դրանք մեր սովորողներին, որի արդյունքում նրանք արդեն կյանք կմտնեն այսօր արդեն  անհրաժեշտ գիտելիքներով ու հմտություններով:

Նաիրա Հարությունյան