Սովորողի աշխատանքի կազմակերպումը ուսումնական բլոգի միջոցով

Հրապարակային, հասանելի, ուսումնական օրացույցով նախատեսված նախագծեր, ուսումնական նյութեր, բնագիտական փորձեր, ֆոտոշարեր, տեսաֆիլմեր, ռադիոնյութեր, օտարալեզու ուսումնական փաթեթներ... Ահա այն ամենը, ինչ իր մեջ ներառում է երրորդ դասարանցու անհատական ուսումնական բլոգը, մեդիատարածք, որտեղ պարզից էլ պարզ երևում են սովորողի  անհատականացված ուսուցումն ու նրա զարգացման փուլերը:

Ուսումնական բլոգի գործածման ժամանակացույց

Կրթահամալիրում սովորողներն իրենց անհատական բլոգները սովորաբար  բացում են երրորդ դասարանում, սակայն մենք երկրորդ դասարանում խիզախեցինք, և 2015-2016 ուստարում  ութ սովորողներ ունեցան իրենց անհատական, ուսումնական բլոգները՝ կրթահամալիրի օրացույցով հաստատված նախագծային ուսուցմանը համապատասխանեցված բաժիններով,  ընտանեկան ու անհատական աշխատանքներով տեսանելի մի տարածք, որտեղ սովորողի գործունեությունն է, երևում է ընտանիքի մասնակցությունը, սովորող-ծնող-դասավանդող կապը: Իրար շարունակաբար հաջորդող մեդիատարածքներ են էլեկտրոնային փոստը, դպրոցի ենթակայքը, անհատական բլոգը և դասարանական բլոգը՝ որպես հավաքանի: Սա է այն հարթակը, որտեղ ծավալվում է սովորողի ուսումնական գործունեությունը ուսումնական ողջ տարվա ընթացքում: Երրորդ դասարանում դասարանական բլոգն արդեն դառնում է ընթերցարան-գիրք, որտեղ ամփոփվում են սովորողների ընթացիկ նախագծերը:

Բլոգը՝ հեռավար ուսուցման հարթակ

Սովորողի անհատական բլոգային աշխատանքն ավելի տեսանելի դարձավ 2015-2016 ուստարվա հունվարին, երբ օդակաթիլային վիրուսի տարածման պատճառով ՀՀ ԿԳ նախարարի հրամանով պետական հանրակրթական դպրոցներում դասերը դադարեցվեցին, իսկ կրթահամալիրում ուսուցման ձևը փոխվեց, և սովորողները սկսեցին աշխատել հեռավար-առցանց: Հեռավար ուսուցումն իրականացվեց երեք շաբաթ: Բերեմ հեռավար ուսուցման փաթեթի օրինակներ սովորողների անհատական բլոգներից:

• Աննա Հովհաննիսյան 
  Թումանյանական օրեր՝ «Ծիտը»
  Օրիգամի «Մուկ»
• Անժելա Դադոյան 
  Թումանյանական օրեր՝ «Մի բաց նամակ ամենքին», «Անբան Հուռին»
  Հարցազրույց մայրիկի հետ
• Էրիկ Կակոյան 
  Բնագիտատեխնիկական ստուգատես՝ Բնագիտական փորձ, Զարգացնող խաղեր,
  Մարզական ստուգատես՝ Մարզվենք միասին 
  Ընտանեկան ընթերցումներ՝ «Սուտլիկ որսկանը»

2016-2017 ուսումնական տարվա սեպտեմբերին ևս 14 սովորողներ ունեցան իրենց  անհատական բլոգները: Յուրաքանչյուր սովորող իր բլոգում կարողանում է տեղադրել նյութեր՝ տեսանյութեր, նկարներ, տեքստեր, կարողանում է ավելացնել բաժիններ:

«Սովորող-սովորեցնող» սեբաստացի բլոգերները Տաթև Թամազյանի և Մերի Գրիգորյանի երկրորդ դասարանցիներին ներկայացրին իրենց  բլոգների շնորհանդեսը: Նրանք իրենց մեդիահմտությունները փոխանցեցին կրտսեր ընկերներին:

Նոր բլոգների շնորհանդես՝ ներկայացնում են բլոգավար-սովորողները:

Սովորողի ուսումնական բլոգի կառուցվածքը

«2016-2017 ուստարի» թղթապանակն իր մեջ ներառում է սովորողի  ուսումնական ողջ գործընթացը:

Սովորողների բլոգներից առանձնացված են ուսումնական նախագծերը՝ Ես և ինձ շրջապատող միջավայրը, Կոմիտասյան օրեր, Խնկոյանական օրեր, Սեբաստացու օրեր, Ռոդարիական օրեր, ստուգատեսները՝ Դիջիթեք 2017, Բնագիտատեխնիկական, Մարզական, ուսումնական գործունեության ոլորտները՝ Ուսումնական ճամփորդություններ, ուսումնական արձակուրդ՝ Աշուն, Ձմեռ:

Սովորողների բլոգներից նյութերի ընտրանի՝

• Խնկոյանական շիլաշփոթ
• Ուսումնական Աշուն 1
• Փոքրիկ իշխանը ներկայացման մասին
• Աշնանային հեքիաթներ
• Թվերի զրույցը
• Ձմեռն իմ ականջին շշնջաց
• Ակրոստիկոսներ
• Ամանորը այլ երկրներում
• Երևակայական պատմություններ

Այսպես, երկրորդ դասարանից սովորողներին բլոգավարության հմտություններին ծանոթացնելը համարում եմ արդյունավետ, քանի որ

• Երրորդ, չորրորդ դասարաններում բլոգային աշխատանքն առավել հաճախական է դառնում, սովորողներն արդեն ունենում են այդ հմտությունները և կարողանում են արագ կատարել իրենց աշխատանքը:
• Սովորողներն արդեն գիտակցում են իրենց մասնակցությունը մեդիամիջավայրի զարգացման գործում:
• Աշխատանքը սովորողի հետ դառնում է առավել արդյունավետ թե՛ ժամանակի խնայողության, թե՛ ուսումնական գործընթացն ավելի ճկուն դարձնելու տեսանկյունից:

Որպես ամփոփում հավելեմ՝ այս տարի կրթահամալիրում կազմակերպված Գիտագործնական հավաքի կլոր սեղանին իմ սովորողների հետ ներկայացանք հենց այս թեմայով՝ Սովորողի աշխատանքի կազմակերպումը ուսումնական բլոգի միջոցով։