Մարզական «Իմացումի հրճվանք». 2019-2020 ուստարի

 «Իմացումի հրճվանք» ծրագրում ֆիզկուլտուրան կազմակերպվում է ամենօրյա պարապմունքներով, որոնք ներառում են մարմնամարզական վարժություններ, շարժուն խաղեր, հեծանիվ: Ծրագրի մաս են նաև քայլարշավները, բարձունքեր արշավելը, որոնց ընթացքում սովորողները ծանոթանում են անվտանգ գործունեության տարրերին (ուսումնական պլան, կետ 25):

«Իմացումի հրճվանք» կրթական ծրագրի երկրորդ դասարանում սովորողների մարզական գործունեությունը կազմակերպվում է ըստ ուսումնական պլանի, կարգի:

2019-2020 ուսումնական տարվա ընթացքում մարզական գործունեությունը ներառել է հետևյալ բաղադրիչները՝

  • ամենօրյա մարզական դադար-ընդմիջումներ,
  • մարմնամարզական պարապմունքներ,
  • բակային, ազգային խաղեր,
  • բարձունքի հաղթահարման ճամփորդական նախագծեր։

Իհարկե, այս բոլոր բաղադրիչներին մանրամասն կանդրադառնամ, սակայն, հարկ է ավելացնել, որ թագավարակը առաջ բերեց ևս մեկ բաղադրիչ՝ ընտանեկան մարզական դպրոցները:

Եվ այսպես, ուսումնական օրվա ընթացքում մարզական դադար-ընդմիջումներ մի քանի անգամ կարող էինք ունենալ: Առաջին մարզումը առավոտյան ընդհանուր պարապմունքի ընթացքում էր, երկրորդը՝ ուսումնական առաջին պարապմունքից հետո, իսկ հաջորդը՝ ըստ օրվա և իրավիճակի: Մարզական ընդմիջումները կազմակերպվում էին և՛ դասասենյակում, և՛ բակ-պարտեզում: Այն, սովորաբար, տևում էր մինչև 5 րոպե, ներառում էր նախավարժանք, ուրախ ռիթմիկ-պարային վարժություններ: Ընդմիջման մի հատված սովորողներն էին կազմակերպում, մինչև 20 րոպե տևողությամբ խաղեր էին կազմակերպում տարբեր խմբերով: Դասասենյակում սիրելի անկյուններից էր մարզագորգը, իսկ ահա բակ-պարտեզում ավելի ակտիվ խաղեր էին խաղում:

Հաջորդ բաղադրիչը մարզական պարապմունքներն են: Այս ուսումնական տարվա ընթացքում Արևելքի երկրորդ դասարանցիները շաբաթական երկու դասաժամով մարզական պարապմունքներ են անցկացրել Մայր դպրոցի մարզադահլիճում: Արևելքից քայլքով անցել են դեպի Մայր դպրոց տանող ճանապարհը: Պարապմունքների ընթացքում շարային ու մարմնամարզական վարժություններից բացի գլուխկոնծիներ են կատարել, գլորվել են առաջ ու հետ, ցատկել են բատուտի վրա:

Մարզական պարապմունքն հիմնականում ունեցել է հետևյալ կառուցվածքը՝

  • մարզական քայլք Արևելքից Մայր դպրոց.
  • հագուստ փոխելը հանդերձարանում (հանդերձարանային կանոնների պահպանում).
  • շարային վարժություններ.
  • դարձումներ.
  • քայլք, վազք.
  • շարափոխումներ.
  • նախավարժանք.
  • մարմնամարզական վարժություններ.
  • գլուխկոնծիներ, ցատկեր, թռիչքներ, գլորումներ.
  • սողանցումներ նստարանի վրայով.
  • ձգումներ մարզապատին (շվեդական պատ).
  • խաղեր (էստաֆետային, ազգային)։

Հունվարյան մարզական ստուգատեսի շրջանակում սովորողները ցուցադրել են իրենց մարզական կարողությունների մի մասը:

Բացի դասարանական մարզական պարապմունքներից առաջին և երկրորդ դասարանցիների հետ համատեղ կազմակերպել ու մասնակցել ենք մարզատոների, որի շրջանակում խաղացել ենք էստաֆետային խաղեր:

Սովորողների մարզական գործունեությունը նախագծային ուսուցման մի բաղադրիչն է դարձել: Դդմատոնն ու մարզատոնը, ինչպես այս տեսաֆիլմում, հանդես են եկել միասնական:

Հաջորդ բաղադրիչը բակային, ազգային խաղերն են: Իհարկե, մարզական պարապմունքին մշտապես որևէ ազգային խաղ էլ ենք խաղացել: Այս ընթացքում յուրացրել ու խաղում էինք «Աղջիկ փախցնոցի», «Ասեղ, թել, հանգույց», «Մուկ ու կատու», «Վերև-ներքև», «Ծուղրուղու» խաղերը: Թվարկածներս մեր դասարանի սիրելի խաղերից են:

Այս ուսումնական տարում խաղացել ենք բակային խաղեր՝ «Բռնոցի», «Պահմտոցի», խաղեր գնդակով, օղակով ու ցատկապարանով:

Բարձունքի հաղթահարման ճամփորդական նախագծերի շրջանակում սովորողները ոչ միայն քայլում, հաղթահարում են տարբեր բարձունքներ, այլև նախապատրաստվելիս ճամփորդական կանոններ են մշակում, որոնց պահպանումը անվտանգության երաշխիքն է:

Ընտանեկան հեռավար-առցանց ուսուցման ընթացքում սովորողների մարզական գործունեությունը կազմակերպվել է ընտանիքում: Որպես օգնություն-աջակցություն՝ հրապարակվել է մարզական տեսադասերի փաթեթը: Մարզական գործունեությունը ընտանեկան դպրոցում յուրաքանչյուր շաբաթվա, օրվա կարևորագույն բաղադրիչներից է: Սովորողները պարբերաբար ներկայացրել են հատվածներ իրենց մարզական առօրյայից: Մարզական միջավայր են հանդիսացել տուն-բնակարանները, բակ-այգիները: Սովորողները ցուցադրել են նաև հեծանվավարության իրենց հմտությունները:

Ընտանեկան հեռավար-առցանց մարզական գործունեությունն ընդգրկում է հետևյալ ուղղությունները՝

  • ընտանեկան մարզումներ. նախավարժանք, մարմնամարզական վարժություններ, այդ թվում՝ գլուխկոնծիներ.
  • բակային մարզումներ. վազք, մարզասարքերով պարապմունքներ.
  • հեծանվավարություն.
  • ռոդարիական մարզախաղեր.
  • մարզական-ուսումնական խաղեր։

Ընտանեկան մարզումներ՝

Բակային մարզումներ՝

Հեծանվավարություն՝

Ռոդարիական մարզախաղեր՝

Մարզական-ուսումնական խաղեր՝

Մարի Եղիազարովա «Մարզվում ենք ու սովորում անգլերեն» #1, «Մարզվում ենք ու սովորում անգլերեն» #2

Մայիսյան բարձունքի նվաճումներն իրականացվել են ընտանեկան դպրոցներում:

Կրթական աստիճան: 
  • Deutsch
  • 日本語
  • Հայերեն
  • English
  • Georgian
  • Русский