Windows-ը դասարանում-1

Մասնագիտական զարգացման դասընթացի ներկայացում
Աղբյուրը` Մայքրոսոֆթի «Գործընկերներ ուսուցման մեջ» ծրագիր
1-3-րդ մոդուլները

Փաստորեն ամբողջ աշխարհում էլ հասկանում են,  որ 21-րդ դարի կրթությունը պետք է հիմնովին վերափոխվի: Մայքրոսոֆթի աջակցությամբ լայնածավալ հետազոտություններ են կատարվել կրթական ասպարեզում և առաջարկվում են նորարարական կրթության իրենց եզրահանգումները: Առաջին հարցը, որը որպես պարապմունքի թեմա, հետաքրքրել է նրանց, այն է, թե ինչ հմտություններ, կարողություններ են անհրաժեշտ 21 դարի սովորողների համար: Հարյուրավոր ձևակերպումներից նրանք ընտրել են 7-ը.

1. խնդիրների լուծման և նորարարության կարողությունը
2. տեղեկացված լինելու կարողությունը
3. գիտելիքների կառուցումը
4. հաղորդակցման հմտությունների ձևավորման կարողությունը
5. ինքնակառավարման և ինքնագնահատման կարողությունը
6. համագործակցության կարողությունը
7. ՏՀՏ գործածումը:

Իսկ որո՞նք են այն գործոնները, որոնք կխթանեն այդ նշված կարողությունների զարգացմանը: Մատնանշում են 10 գործոն`

1. փոխադարձ հետադարձ կապը
2. իրական աշխարհի հետ կապված ուսուցումը
3. սովորողներն իրենք են կրկնում և արժևորում իրենց կատարած աշխատանքը
4. խորությամբ արվող նախագծային աշխատանքը
5. սովորողներն անդրադարձ են անում իրենց կատարած աշխատանքին
6. կրթական գործիքների ազատությունը
7. թեմաների ընտրության ազատությունը
8. միջմշակութային կապերը
9. մասնակցություն սեփական աշխատանքի գնահատմանը
10. համընդհանուր փոխկապակցվածության հարցեր:

Նշվում է, որ դեռ վերջնական հստակեցված չեն 21-րդ դարի համար անհրաժեշտ ունակությունները: Դեռ չի հստակեցված այն գաղափարը, թե ինչպես կառուցել տարբեր ուսումնական առարկաների փոխկապակցված ուսուցումը: Նշվում է նաև, որ այժմ շատ ավելի դպրոցներում են գործածում ՏՀՏ միջոցներ ուսումնական գործընթացում, բայց հազվադեպ է լինում, երբ սովորողները դրանք գործածում են ինքնուրույնաբար իրենց ամենօրյա ուսումնական աշխատանքներում, սովորելու պրոցեսում: Մի շատ հետաքրքիր նորություն կա մաթեմատիկա դասավանդողների համար, ովքեր հնարավորություն ունեն կիրառելու OneNote ծրագիրը: Դասավանդողը կարող է գրատախտակի վրա իր արագ ու անփույթ գրած հավասարումը միանգամից փոխակերպել մուտքագրված տպագրական ձևի: Փաստորեն վերանում են բոլոր այն հակափաստարկները, որ համակարգիչով շատ դժվար ու ժամանակատար է մաթեմատիկական ձևակերպումներ մուտքագրելը: Սեմինարի առանցքային նշակետերից է այն, որ 21-րդ դարի սովորողը համակարգիչի օգնությամբ կարող է բովանդակության սպառողից վերածվել բովանդակության ստեղծողի:

Մայքրոսոֆթի OneNote համակարգչային ծրագիրը որպես թվային սևագրության տետր   

 Մայքրոսոֆթի OneNote ծրագիրը շատ հարմար է պլանշետների համար: Այն կարող է գործածվել նաև սովորական նոթբուք-նեթբուքով, ստացիոնար պրոցեսորներով աշխատող համակարգչով աշխատելիս: Ինչի՞ համար է այս ծրագիրը, նախ և առաջ, նախատեսված: Այն փոխարինում է թղթային տետրին: Ունենալով այսպիսի ծրագիր անձնական համակարգչում, կարելի է արագ, նույնիսկ ոտքի վրա, ձեռագիր, մի բառ կամ միտք գրել ծրագրային էջի վրա, որն ավտոմատ պահպանվում է` առանց պահպանող կոճակը սեղմելու: Հետո կարելի է այդ արագ ու անփույթ գրված ձեռագիրը վերածել մուտքագրված տպատառ տեքստի մի քանի վայրկյանում:

Այս ծրագիրը շատ հարմար է ուսանողների համար, երբ ուզում են դասախոսության ժամանակ արագ որևէ նշում անել: Հնարավոր է նաև գրել մաթեմատիկական հավասարումներ և այլ սիմվոլներով ձեռագիր տեքստեր։ Պետք է ավելացնեմ, որ եթե մենք այս տարվա սեպտեմբերի մեկից անցնելու ենք բացառապես նոթբուք-նեթբուքերով ուսուցմանը, ապա այս OneNote ծրագրի ներբեռնումը բոլոր սովորողների և դասավանդողների (հատկապես անգլերենի, մաթեմատիկայի, ֆիզիկայի և քիմիայի) համար անհրաժեշտ է լինելու: Եթե այս ծրագրով չաշխատենք, ապա մաթեմատիկական աշխատանքներ մուտքագրելը շատ աշխատատար և անհարկի ժամանակատար կլինի, և ամենավատն այն կլինի, որ սովորողները մեկընդմիշտ հետ կվարժվեն ձեռագիր գրելուց, որը ցանկալի հետևանքներ չի կարող ունենալ: Ուղեղի աշխատանքը կապված է մեր ձեռքի շարժումների հետ: Մենք կարող ենք սահմանափակել ուղեղի աշխատանքը միայն մատներով միանման սեղմումներ կատարելով: Երեխան ամեն ինչ կանի ձեռքով, որից հետո կատարված աշխատանքը  այս ծրագրի օգնությամբ կվերածվի մուտքագրված տպատառերով և զանազան սիմվոլներով տեքստերի: Այսպիսով անցումը թղթային տետրերից համակարգիչների շատ սահուն կլինի:

OneNote ծրագրով աշխատելիս հեշտանում է նաև տեքստերի և թվային դասագրքերի հետ աշխատելը: Շատ մարդիկ սիրում են մատիտով նշումներ անել գրքերի վրա, առանձնացնել կարևորն անկարևորից: Մենք կարող ենք մեր ուզեցած բառը կամ նախադասությունը գրել տվյալ էջի ցանկացած մասում: Մեր նշումները չեն  սահմանափակվում միայն ամենաձախ, կենտրոն և ամենաաջ մասերով: Մեր գրած բառը մնում է այնտեղ, որտեղ մուտքագրել կամ ձեռագրով գրել ենք` առանց սեղմելու պահպանման կոճակը: Ամեն ինչ ավտոմատ է պահպանվում:

Ծրագիրը կարևոր առավելություն ունի նաև այն պատճառով, որ էջի վրա կարելի է մի որևէ նյութի հղումի փոխարեն դնել հենց դրա ֆայլը, անկախ այն բանից, թե դա սովորական Word office փաստաթուղթ է, տեսանյութ, թե Power Point-ով ներկայացում: Հղումները միշտ էլ անօգնական են լինում, երբ բացակայում է ինտերնետը:

Մի լրացուցիչ հնարավորություն էլ կա անգլերեն սովորողների համար: Այս ծրագրով բացված տեքստի յուրաքանչյուր բառի ճիշտ արտասանությունը կարելի է լսել` ակտիվացնելով բառը և սեղմելով audio կոճակը:

Բովանդակության սպառողից` բովանդակության ստեղծող

Ամերիկացի սեմինարավարն այս թեմային հատկացրել է ընդամենը 24 վայրկյան` տալով միայն հիմնական միտքը: Ցույց տալով իր ձեռքի նոթբուքը` նա  ասում է, որ այս գործիքը հնարավորություն է տալիս սովորողին բովանդակության սպառողից դառնալ բովանդակության ստեղծող, ասել է թե` զբաղվել ստեղծարար աշխատանքով։ Տեսեք ներկայացումը: Այս հարցն այնքան արդիական է, ու խոսելու, արտահայտվելու գայթակղությունն այնքան մեծ, որ չեմ կարող չկապել այն մեր այսօրվա իրողության հետ ու լռել, ինչպես մեր հարգարժան սեմինարավարն արեց:

Մեր կրթահամալիրում 2013-2014 ուսումնական տարին հայտարարված է նախագծային կրթության անցման տարի: Նախագծային կրթության հիմնական էությունն էլ հենց բովանդակության ստեղծումն է սովորողների կողմից: Բացի դրանից` կրթության կազմակերպման հիմնական շեշտը նախագծայինի վրա դնելով մենք ավելի ենք հեշտացնում կրթությունը կառուցողական, առաջադեմ մանկավարժական սկզբունքներով կազմակերպելու գործը: Կառուցողական կրթության սկզբունքներից մեկը երկխոսության մեջ մտնելն է` աովորող-սովորող, դասավանդող-սովորող, դասավանդող-դասավանդող: Սովորական ոչ նախագծային ուսումնական գործունեության կազմակերպման ժամանակ շատ հմուտ դասավանդողի և ուսումնատենչ սովորողի առանձնակի ջանքեր են պետք, որպեսզի կայանա ցանկալի երկխոսությունը տարբեր խմբային աշխատանքների, դերախաղերի, մտածածին իրավիճակների ստեղծման ժամանակ: Նախագծային աշխատանքներ իրականացնելու ընթացքում այդ երկխոսությունը բնական է ստացվում, և հնարավոր չէ որևէ նախագիծ իրականացնել առանց երկխոսության, քանի որ ամեն ինչ արվում է աշխատանքային խմբերով:

Կառուցողական կրթության հիմնական սկզբունքներից է նաև իմաստի որոնումը: Նախագիծն էլ հենց նրանով է նախագիծ, որ կայանում է իմաստի որոնում. Սովորողներն իրենց կատարած նախագծով իմանում են այն ինչ նախկինում չեն իմացել, հետազոտական աշխատանքներով գալիս են այնպիսի եզրահանգման, որ ոչ մի աղբյուրում նշված չէ:

Նախնական գիտելիքով աշխատելը նույնպես կառուցողական կրթության սկզբունքներից է, որը միշտ էլ առկա է նախագծային աշխատանքում: Յուրաքանչյուր նախագիծ սկսելուց առաջ աշխատանքային խումբը դասավանդողի ղեկավարությամբ որոնում և գտնում է նախագծի համար անհրաժեշտ նախնական տեղեկատվություն: Ամեն ինչ արվում է հայտնիից դեպի անհայտը սկզբունքով:

Սովորողի կարծիքը հաշվի առնելը  մի սկզբունք է, որը հնարավոր չէ անտեսել և նախագիծ իրականացնել:

Կառուցողական կրթության ամենակարևոր սկզբունքներից է իմացածի արժևորումը: Յուրաքանչյուր ուսումնական նախագիծ երկու նպատակ է հետապնդում` ուսումնական և գործնական: Եթե իր առարկան անսահման սիրող դասավանդողի համար ուսումնական նպատակը միշտ էլ առաջնայինն է, ապա սովորողի համար ավելի է արժևորվում  գործնական նպատակը տեսաֆիլմերի, ստեղծած էլեկտրոնային ուսումնական նյութերի, կարաոկեների և այլ հոգևոր ու նյութական արժեքների ձևով: Այլ կերպ ասած` սովորողն ավելի հակված է արժևորել իր ստեղծած բովանդակությունը, որը նախագծային աշխատանքի արդյունքն է:  

4-րդ մոդուլ

Աղբյուրը` http://www.pil-network.com/pd/course/wic/