ԴՈՒՄԱՆ ՆԱԽԱՊԱՏՐԱՍՏՈՒՄ Է ՄՊՔ (1) ԲԱՐԵՓՈԽՈՒՄ

Պետական դումայի կրթության կոմիտեն մտադիր է նախապատրաստել միասնական պետական քննության (ՄՊՔ) համակարգը բարեփոխող օրենքի նախագիծ:

«Մենք վաղուց ենք առաջարկում միասնական պետքննության մասին օրենքի տարբեր տեսակի ուղղումներ և արդյունքում այնքան առաջարկություններ կուտակվեցին, որ հնարավոր դարձավ քննարկման նախապատրաստել նոր օրինագիծ»,- Մոսկվայում անցկացվող տաղանդավոր երիտասարդության համառուսաստանյան համագումարում հաղորդել է Պետդումայի կրթության կոմիտեի նախագահի տեղակալը:

Պատգամավորը նշել է, որ նոր փաստաթղթի գլխավոր իմաստը պետք է դառնա աշակերտների կամավոր մասնակցությունը ՄՊՔ համակարգում: Օլեգ Սմոլինը պարզաբանել է, որ խոսքն առաջին հերթին հումանիտար առարկաների` գրականություն, պատմություն, ռուսաց և օտար լեզուների թեստային քննության մասին է: «Այդպիսով մենք երիտասարդ սերնդին զրկում ենք մտածելու և իրենց մտքերը շարադրելու հնարավորությունից»,- նկատել է նա:

Պատգամավորն իր դիրքորոշման հաստատումը գտել է նաև անտիկ մանկավարժների և իմաստասերների աշխատություններում, որտեղ պնդվում է, որ «կրթությունն անհատի բազմակողմանի զարգացումն է»:

«ՄՊՔ-ն մեզ դրանից հեռացնում է և ուսուցիչներին ստիպում երեխաներին «պահել թեստերի վրա»,- ամփոփել է պատգամավորը՝ վստահություն հայտնելով նաև, որ «միասնական քննության շրջանակում առաջարկվող ոչ մեծ ակնարկը թույլ չի տալիս բացահայտել դպրոցականի վարպետությունն ու տաղանդը»:

ՌԴ նախագահ Դմիտրի Մեդվեդևը Դաշնային ժողովին ուղղված իր Ուղերձում արտահայտվել է ՄՊՔ-ի՝ որպես գիտելիքների ստուգման գլխավոր, բայց ոչ միակ եղանակի պահպանման օգտին, հիշեցնում է ԻՏԱՌ-ՏԱՍՍ-ը:

«Вести.Ru»

Թարգմանությունը Աշոտ Տիգրանյանի

1) ՄՊՔ – Ռուսաստանի Դաշնությունում միասնական պետական քննությունները