Կրթությո˜ւն…աո˜ւ

Այն ժամերին` նոյեմբերի 13-ի ժամը 10:00-16:15, երբ հանրապետության 1365 (լավագույն դեպքում) դպրոցներում ավտորիտար (մեղմ ասած) մթնոլորտում սովորողները սերտում էին, իսկ դասատուները` անգիրի հաղթարշավն ապահովում, մայրաքաղաքի «Կոնգրես» հյուրանոցի «Պիկասո» սրահում տեղի ունեցավ ժողովրդավարական համաժողով: Այն կազմակերպել էին «Կրթություն հանուն կայուն զարգացման» հիմնադրամը և Կրթության ազգային ինստիտուտը գերմանական EED կազմակերպության ֆինանսական աջակցությամբ: Ներկայացվեցին և քննարկվեցին «Համայնքային ակտիվ դպրոցները` որպես փոփոխության կատալիզատորներ» ծրագրի իրականացման ընթացքն ու արդյունքները:

Մտահոգություններ

«Նպատակաուղղված դաստիարակությունն իսպառ վերացել է դպրոցներում»։ ԿԳ փոխնախարար Մանուկ Մկրտչյան

«Լավագույնը այն դպրոցն է, ուր երեխան սիրով է գնում, իսկ հանրապետությունում այդպիսի դպրոց չկա»: ԿԳՆ ներկայացուցիչ Նարինե Մնացականյան

«Բուհերը պատրաստում են երեկվա մանկավարժներ վաղվա դպրոցի համար», «Դպրոցը ո՛չ երեխայակենտրոն է, ո՛չ էլ նույնիսկ ուսուցչակենտրոն, այն թեստակենտրոն է»: ԿՀԿԶ հիմնադրամի ծրագրերի պատասխանատու Վարդուհի Մուրադյան

«Կրթակարգում քիչ տեղ է հատկացված դաստիարակությանը»: ԿԱԻ դաստիարակության և լրացուցիչ կրթության բաժնի ղեկավար Մելանյա Դավթյան

«Սովորողների հետաքրքրասիրության աստիճանական մարումը կրթական գործընթացի հետևանք է»: «Քայլ առ քայլ» կազմակերպության տնօրեն Ռուզաննա Ծառուկյան

«Մեր կրթական քաղաքականությունը չունի խրախուսման մեխանիզմներ»: «Հայաստանի երեխաներ» հիմնադրամի ծրագրերի պատասխանատու Սերոբ Խաչատրյան

«Կրթական բարեփոխումների տեսլականը բացակայում է. ո՞ւր ենք գնում՝ չգիտենք»: «Քաղաքացիական կրթության խճանկար-Սիվիտաս Հայաստան» ծրագրի ղեկավար Տիգրան Թովմասյան։

«Համայնք-դպրոց համագործակցությունը անձնային բնույթ է կրում, ինստիտուտացված չէ»: ԿՀԿԶ հիմնադրամի աշխատակից Մարինա Գալստյան

«Ամենադժվարը համագործակցությունն է ՏԻՄ-ի հետ»: Գավառի թիվ 3 դպրոցի փոխտնօրեն Ալիտա Բաբասյան

Մտահոգությունները, բնականաբար այսքանը չէին, սակայն մեջբերումները, որոնցից առաջին երկուսի նկատմամբ վերապահումներ ունի տողերի հեղինակը, լիովին բավարար են իրավիճակի ողբերգականությունն ըմբռնելու համար:
 
Հույսի ծվեններ
Համաժողովում ձայն ստացած կազմակերպությունների ներկայացրած արդյունքները` քաղաքացիական գիտելիքներ տվող, քաղաքացիական հմտություններ և դիրքորոշում ձևավորող «Քաղաքացի» նախագծի իրականացմանը մասնակցող դպրոցների թվի ամենամյա ավելացումը։ «Համայնքային ակտիվ դպրոց» նախագծի ծավալումը ԿՀԿԶ բազմաբնույթ աջակցությամբ։ «Հայաստանի երեխաներ» հիմնադրամի ներառած դպրոցների աշակերտական ինքնավարության և ակումբների ուսանելի փորձը և այլ գործնական քայլեր (հատկապես մարզերում` Գեղարքունիք, Արմավիր, Սյունիք), ինչպես նաև հասարակական և միջազգային մի շարք կազմակերպությունների շահագրգռվածությունը վկայում են, որ դեռ ամեն ինչ կորած չէ:

Մենք կարող ենք
Այսօր, երբ «Մխիթար Սեբաստացի» կրթահամալիրը նշում է իր 20-ամյակը, հարկ է, որ գոնե կրթական հասարակությունը մեր փորձը գնահատի ըստ արժանվույն, օգտվի մեր բաց դռներից և համագործակցության նախագծերից: Իսկ մենք շարունակում ենք սովորել գործող մարդկանցից, որտեղ էլ նրանք գործեն և հանուն ինչի էլ գործեն:

13.11.09

Աշոտ Տիգրանյան

ՀԳ Համաժողովը շարունակություն կունենա, որովհետև միայն ՔԱՂԱՔԱՑԻՆ կփրկի ՀԱՅՈՑ ՀԱՆՐԱՊԵՏՈՒԹՅՈՒՆԸ։