Ուսումնական գործի կազմակերպիչը

21-րդ դարի կրթության մարտահրավերներին դիմակայելու միջոցը գտնվել է` սովորողին ընդունել որպես անհատականություն իր դրսևորման բոլոր ձևերով, այսինքն՝ բացի պարտադիր առարկաներից ու ժամաչափերից, ուսումնական պլանը կազմելիս  պետք է հաշվի առնել սովորողների առանձնահատկություններն ու նախասիրությունները: Կրթահամալիրի անհատական ուսումնական պլանը թույլ է տալիս, որ հաշվի առնենք սովորողի նախասիրությունը և կարիքը՝ չշրջանցելով պետական չափորոշիչը, պահանջը:

Սովորողների ուսումնական անհատական պլաններ. առանձնահատկություններ

Առաջին ուսումնական շրջանում 4-5-րդ դասարանների սովորողների հետ կազմում ենք կոնկրետ սովորողի անհատական ուսումնական պլանը: Ուսումնական պլանն իր մեջ ներառում է հանրակրթական առարկաները, ընտրությամբ գործունեության ժամերը, լրացուցիչ կրթությունը, տնային գործունեության կարիքը, առավոտյան պարապմունքը, ֆիզկուլտուրա առարկան, ակումբները, երկարացված օրվա ծրագիրը: Կազմելուց հետո սովորողն այն տեղադրում է իր անձնական բլոգում: Սովորողն իր անհատական ուսումնական պլանը կարղ է փոփոխել 1-ին, 3-րդ, 4-րդ ուսումնական շրջաններում:

Ուսումնական տարին կազմված է չորս ուսումնական շրջանից: 2018-2019ուստարվա ուսումնական շրջաններն են՝

  • առաջին՝ 30.09.2018թ.- 08.01.2019թ. 
  • երկրորդ՝ 09.01.2019թ.-29.01.2019թ.
  • երրորդ՝ 30.01.2019թ.-28.05.2019թ
  • չորրորդ՝ 29.05.2019թ-15.06.2019թ.

Բլոգների ուսումնասիրություն

4-5 րդ դասարաններում յուրաքանչյուր սովորող ունի և կիրառում է իր անհատական ուսումնական բլոգը: Բլոգներն ունեն չափորոշիչ և սովորողի բլոգին համապատասխան ձևաչափ, որը պետք է պահպանել: Բլոգներին հետևում են դասավանդողները՝ յուրաքանչյուրն իր առարկային համապատասխան բաժինը, իսկ դասղեկ-կազմակերպիչը հետևում է բլոգի համապատասխանությունը ուսումնական պահանջներին: Բլոգները վարում են անհատ-սովորողները: Բլոգների հղումները տեղադրված են յուրաքանաչյուր դպրոցի կայքում և բաց են: Սովորողների հետ ես հաճախակի անց եմ կացնում ուսումնասիրություն՝ հասկանալու համար, թե որտեղ են թերանում կամ չեն հասցնում: Ուսումնասիրության ընթացքում ես ավելի լավ եմ ճանաչում նրանց անհատականությունը, նախասիրությունները, կարիքները, կրթության հետ կապված խնդիրները: Ուսումնասիրությունից հետո անհատապես աշխատում եմ սովորողների կամ խմբի հետ: Ինձ օգնում են նաև այն սովորողները, ում մոտ ավելի լավ է ստացվում բլոգավարությունը:

Սովորողների ընտրությամբ գործունեության նախընտրական շրջան

Սովորողներին ծանթացնում եմ ընտրությամբ գործունեության խմբերի հետ, որի համար շաբաթական նախատեսված է 4 ժամ: Պարզաբանում, ներկայացնում եմ, ընտրելիս հաշվի առնում սովորողի նախասիրությունը, կարողությունը: 3-րդ ուսումնական շրջանում ավելացավ նաև քանդակագործությունը: Արևելյան դպրոցի 11 սովորող ընտրեց քանդակագործություն, որը ղեկավարում է Վիգեն Ավետիսը, ուղեկցում -լուսաբանում է Սյուզաննա Սարգսյանը: Ընտրությամբ գործունեության խմբերն են՝

  • մեդիալրագրողի
  • մաթեմատիկոսի
  • հայրենագետի
  • մարզիկի
  • բուսաբան-կենդանաբանի
  • պարտիզպանի
  • դիզայների
  • թատերական գործունեություն
  • բնագիտական-տեխնիկական
  • կինո-ֆոտո
  • երաժշտություն (սոլֆեջիո, երաժշտական կոմպոզիցիա)
  • քանդակագործ

Ֆիզկուլտուրայի ակումբների ընտրություն

4-5-րդ դասարաններում ֆիզկուլտուրայի համար նախատեսված է 3 դասաժամ:4-րդ դասարանում ֆիզկուլտուրա առարկան կազմակերպվում է տրիաթլոնի սկզբունքով ՝ լող-հեծանիվ-վազք:5-րդ դասարանում ֆիզկուլտուրան անցկացվում  է սպորտային ակումբերով: Սովորողներին ներկայացնում եմ ակումբները, և նրանք ընտրում են իրենց նախընտրած սպորտաձևը:

  • նետաձգություն
  • սուսերամարտ
  • մարմնամարզություն
  • ֆուտբոլ
  • բասկետբոլ
  • վոլեյբոլ
  • ձեռքի գնդակ

Ճամփորդություններ, ճամբարներ

Յուրաքանչյուր ուսումնական շրջանում կազմակերպվում են ուսումնական ճամփորդություններ, ճամբարներ: Ճամբարները և ճամփորդությունները նախատեսված են սովորողին խրախուսելու, գնահատելու, ճանաչելու, հմտությունները, կարողությունները զարգացնելու, ինքնուրունություն ձևավորելու համար: Այն ենթադրում է նախնական աշխատանք. սովորողները պատրաստվում, ուսումնասիրում են այն վայրը, որ պետք է այցելեն, գտնում հետաքրքքիր տեղեկություններ, բլոգներում տեղադրում կատարած աշխատանքը: Ճամբարը կամ ճամփորդությունը կազմակերպում է դասավանդող-ջոկատավարը, աշխատանքներին մասնակցում են սովորողները, դասավանդողները, ծնողները:

Մասնակցություն առավոտյան ընդհանուր պարապմունքին

 Առավոտյան ընդհանուր պարապմունքը տևում է 15 րոպե: Սեբաստացիների պարտադիր գործունեության ձև է, և մասնակցում են դասավանդողները, սովորողները, կարող են ընդգրկվել այլ մարդիկ: Առավոտյան պարապմունքին հետևում և մասնակցում են դասավանդողները: Այս կազմակերպման ձևը ևս միջոց է միասին լինելու, իրար լսելու, սովորելու-սովորեցնելու-կիսվելու :

Աշխատանք ծնողական համայնքի հետ

Ծնողական համայնքի հետ աշխատում եմ անհատապես՝ ելնելով կոնկրետ սովորողի կարիքից, անհանգստացնող երևույթից, պահանջից: Ծնողական համայնքը ներառված է նաև  կրթահամալիրի կառավարման խորհրդում: Ծնողները մասնակցում են առավոտյան պարապմունքներին, մեդիաուրբաթներին, կլոր սեղան-քննարկումներին: Կապը պահում ենք էլեկտրոնային հասցեների, հեռախոսակապերի միջոցով: Արագ և մոբիլ տալիս ենք լուծումներ, պարզաբանումներ կոնկրետ սովորողի համար: Հաշվի ենք առնում ընտանիքի առանձնահատկությունը, սովորույթները, կարիքները; Ծնողին դիտարկում եմ որպես գործընկեր:

Էլեկտրոնային հասցեների կիրառում

էլեկտրոնային հասցները օգնում են լինել ավելի մոբիլ, այն միջոց է, կապ սովորողի, գործընկերոջ, պատվիրատու-ծնողի հետ: Այս կապի միջոցով ենք լինում տեղեկացված: Էլեկտրոնային հասցեները կիրառում են դասավանդողները, սովորողները, ծնողները: Հասցեներն անհատական են:

Անհատական աշխատանք սովորողի հետ

 Իմ աշխատանքի ամենասիրելի մասն այն ժամանակահատվածն է, երբ ես սովորողների հետ եմ: Աշխատանքի ամենակարևոր հատկությունը նրանց լսելը, ճանաչելը, սիրելը, ընդունելն է: Յուրաքանչյուր սովորող անհատականություն է ու կարիք ունի իրեն ճանաչելու, որպեսզի կարողանաս ճիշտ ուղղորդել : Ես սովորող-ընկերների հետ եմ թե′ ֆիզիկապես, թե′ մեդիադաշտում: Ճամբարների շնորհիվ հաճախակի ենք միասին օրեր ապրում, և ավելի լավ ենք իրար ճանաչում, սովորում իրարից: Սովորողները միշտ էլ  կարիք են ունենում կիսվելու, խորհուրդներ ստանալու, խրախուսվելու: Ես նրանց հետ եմ դասամիջոցներին, երբ ուղեկցում եմ տրանսպորտում, ճամբարներին, ճամփորդություններին:

Սիրում եմ իմ մասնագիտությունը, սովորողներիս, գործընկերներիս: Ես սովորում եմ իմ սովորողներից, լուսավորվում նրանցով, կիսվում իմ ունեցած հմտություններով:

 

Համար: 
Կրթական աստիճան: 
  • Deutsch
  • 日本語
  • Español
  • Հայերեն
  • English
  • Georgian
  • Русский