Հեռավար-առցանց մանկավարժական աշխատող

Ներկայացնում եմ առցանց-հեռավար աշխատանքի իմ փորձը։ 

Հիմա, երբ հանրապետությունով մեկ արտակարգ դրություն է հայտարարված, երբ ուսուցիչներն ու դպրոցները ազատ են, «Մխիթար Սեբաստացի» կրթահամալիրում այլ իրականություն է։  Կրթահամալիրի ուսուցիչները, սովորողներն անցել են հեռավար-առցանց ուսուցման՝ փորձարկելով առցանց ուսուցման տարբեր հարթակներ, առաջադրելով նոր խնդիրներ, գտնելով նոր լուծումներ։

Այս տեքստում չեմ խոսի այն մասին, թե որքան կարևոր ու գտնված տարբերակ է հեռավար ուսուցումը սովորողների համար․ դրան կանդրադառնամ այլ տեքստում։ Այստեղ ուզում եմ խոսել այն մասին, թե ինչ առավելություն ունի առցանց ուսուցումը, ինչ է տալիս այն մանկավարժական աշխատողին։ 

Առանձնացնենք, նշենք հեռավար-առցանց ուսուցման, հեռավար-առցանց աշխատանքի՝ ուսուցչին ընձեռած հնարավորությունները՝

  • աշխատելու, վարձատրվելու,
  • աշխատանքային ռիթմից չընկնելու,
  • սեփական աշխատանքին կողքից նայելու,
  • գործընկերների աշխատանքին կողքից նայելու,
  • աշխատանքը, աշխատաոճը, ձեռքբերումները վերարժևորելու,
  • նոր հարթակներ փորձարկելու չձանձրանալու,
  • ինքնակազմակերպվելու,
  • ժամանակն արդյունավետ օգտագործելու,
  • ինքնակրթության։

Այս բոլոր առավելությունները ես տեսել եմ երկու տարի հեռավար-առցանց աշխատանքիս արդյունքում։ mskh.am-ի խմբագրի, հեռավար ուսուցման ծրագրի ուսուցչի առցանց աշխատանքն ինձ՝ երկու տարեկան Դավթի մայրիկիս, հնարավորություն տվեց ոչ միայն աշխատելու, վարձատրվելու, այլև՝ չկտրվելու կրթական իրականությունից, ինչն իմ տեսակի համար անչափ կարևոր է։ Կարծում եմ որ 21-րդ դարն՝ իր արագությամբ, կտրուկ զարգացումներով, այլ մոտեցում է պարտադրում․ երկու-երեք տարի տանը նստող մայրիկը շատ հմտություններ կարող է կորցնել, նորերը ձեռք չբերել, դժվար մտնել աշխատանքային իրականություն։ Գոնե իմ տեսակի մարդու համար աշխատանքը, ռիթմից, ընթացքից չընկնելը կարևոր է։ Կարևոր է տեղեկացված լինելն ու աշխատելը․ աշխատանքը զարգանալու հնարավորություն է։ Իմ մոտեցումն աշխատանքի հանդեպ էդպիսին է՝ զարգանալու, շարժվելու հնարավորություն։

Իհարկե, կարող եք չհամաձայնել, բերել հակափաստարկներ, բայց իմ փորձը, նաև համոզմունքը, ներկայացրի-ներկայացնում եմ՝ կարևորելով փորձի տարածումը․ համաձայնել-չհամաձայնելը թողնում եմ ընթերցողին։

Ինչպես կազմակերպել առցանց աշխատանքը

  • Էստեղ կարևորը՝ չմտածես է, թե լավ՝ մի ժամից կսկսեմ, մի քիչ էլ պառկեմ, այլ գործ անեմ, նոր։ Կարևոր է աշխատանքը սկսել սահմանված ժամին։
  • Սահմանված ժամին աշխատանքը սկսելը թույլ է տալիս մարդուն առավել արդյունավետ կազմակերպել ոչ միայն աշխատանքային, այլև ընտանեկան-անձնային օրը։
  • Կարևոր է հստակ իմանալ, թե այդ օրն ինչ ես նախատեսել անել։ Կարևոր է, որ նախատեսած աշխատանքն իրատեսական լինի։
  • Կարևոր է հստակ իմանալ, որ սա աշխատանքային ժամ է, և աշխատանքային ժամերին ստացած նամակներին, առաջարկներին պետք է հնարավորինս արագ արձագանքել։
  • Երբ օրակարգդ հստակ է, աշխատանքը ստացվում է, գիտես, որ աշխատանքային ժամին որևէ անձնական բան չես կարող պլանավորել, այնպես, ինչպես, եթե աշխատավայրում լինեիր։
  • Եթե անձնական որևէ անհետաձգելի խնդիր է ծագում՝ տեղեկացնել բացակայության մասին։
  • Առցանց աշխատանքը առավել կոնկրետություն ու բարեխղճություն է պահանջում, որովհետև ամեն ինչ տեսանելի է, արձանագրված։
  • Առցանց աշխատանքի ժամանակ գործունեությունդ առավել բաց է, տեսանելի, հասցեական։

Ինքս աշխատել եմ՝ հետևելով վերը նշված կետերին, ու աշխատանքս ստացված եմ համարում։ Իմացել եմ, որ իմ աշխատանքին հետևում են շատ մարդիկ՝ սովորողներ, ուսուցիչներ, որ մարդիկ սպասում են կայքի խմբագրի արձագանքին, դիտարկումներին, ըստ այդմ աշխատել եմ կոնկրետ լինել։ Կարծում եմ՝ կփաստեք՝ որևէ անարձագանք նամակ, դիտարկում պահանջող նամակ, նախագիծ, առաջարկ, բաց չեմ թողել։

Ինչ առավելություներ ունի առցանց աշխատանքը

  • Աշխատում ես քեզ հարմար՝ ընտանեկան միջավայրից։
  • Առավել ազատ ես սննդային, ընտանեկան ռեժիմդ կարգավորելու հարցում (կարող ես երեխային կերակրելու ընթացքում էլ աշխատել․․․)։
  • Օրվա պլանավորումդ կախված է ինքնակազմակերպումից (սա իմ տեսակի մարդու համար կարևոր է՝ սիրում եմ ինքս գծել իմ օրակարգը)։
  • Ժամանակն ավելի արդյունավետ է ծախսվում՝ ավելորդ հույզերի, խոսակցությունների վրա ժամանակ չի ծախսվում։
  • Կարող ես ավելի լայնորեն հետևել գործընկերներիդ աշխատանքին։
  • Սովորողների, գործընկերների հետ առավել կոնկրետ ու հասցեական աշխատել։

Ինչ թերություններ ունի

  • Սահմանափակում են սոցիալական շփումները։
  • Ավելի շատ ժամանակ կարող է պահանջել, քան եթե կոնկրետ աշխատատեղում արվեր։
  • Deutsch
  • 日本語
  • Հայերեն
  • English
  • Georgian
  • Русский