Անահիտ Հարությունյան

Դասարանը ուսումնահետազոտական լաբորատորիա

Հանրակրթական դասարանում ուսումնական գործի հիմնական կազմակերպողն ու սպասարկողը ուսուցիչն է: Այսօր անհնար է ուսումնական գործի արդյունավետ կազմակերպումն ու սպասարկումը պատկերացնել առանց մեդիամիջոցների, առանց դրանք դասարանում ունենալու: Դրանք են`

• խելատախտակ
• ինտերնետ (էլեկտրոնային հասցե, skydrive)
• թվային ֆոտոխցիկ, տեսախցիկ, ձայնագրիչ
• նեթբուք, նոթբուք
• մեդիատպագրություն

Ուսուցիչն ու սովորողները զբաղված են որոնողական-ստեղծագործական, հետազոտական աշխատանքով: Որպես հետազոտողի, ուսուցչի աշխատանքը բաժանվում է մի քանի մասի`աշխատանքային (անհատական, ուսուցիչների խմբով, դասարանի սովորողների հետ) նախագծի կազմում, դրա իրականացում, դիտարկում, արդյունքների հավաքում և մշակում: Ողջ ուսումնական տարվա ընթացքում սովորողներն իրենց ուսուցիչների ու ծնողների հետ միասին ստեղծում են ուսումնական նյութեր, մասնակցում են ներկայացումների, ստուգատեսների (անհատական, խմբային, դասարանական, ընտանեկան): Ընթացքում ստեղծված որոշակի չափանիշների համապատասխանող  տեսաֆիլմերը տեղադրվում են youtube-ում, mskh.tv-ում: Տարեվերջում ստեղծված բոլոր նյութերը հավաքվում և ամբողջացվում են, և  դրանք   ունենում են սովորողների և ուսուցչի ստեղծած ուսումնական նյութերի, ֆիլմերի, ներկայացումների CD-ների տեսք:

Կայքի, էլեկտրոնային հասցեի, ինտերնետային ներքին ցանցի (live@edu) միջոցով ուսուցիչն հնարավորություն է ստանում տեսնելու, ուսումնասիրելու և կիրառելու իր գործընկերների կողմից ստեղծված ուսումնական նյութերը, ֆիլմերը, փորձարկելու դրանք, արձագանքելու…, առաջադրանքներ և այլ նյութեր փոխանակելու սովորողների հետ: Առանց դասարանից դուրս գալու ուսուցիչը կարող է շատ արագ ունենալ ինչպես իր ստեղծած նյութերի, այնպես էլ իր գործընկերների կողմից ստեղծված նյութերի տպագիր տարբերակը: Մեդիատպագրության օպերատիվ աշխատանքի շնորհիվ այդ տպագրված նյութերը շատ կարճ ժամանակում հայտնվում են դասարանում:

Սովորողներն ուսուցչի հետ սպասարկում են կայքը, կայքի ընթերցումն ու քննարկումը դարձնում են ուսումնական գործունեություն:

Սովորողների և ուսուցչի անհատական նոթբուքերը, որոնք միացած են ինտերնետային ներքին ցանցով, հնարավորություն են տալիս բոլոր սովորողներին ներգրաված լինելու ուսումնական պրոցեսում: Համացանցին և ինետերնետային ներքին ցանցին միացած սովորողն անկախ ժամանակից և տարածությունից միանում է դասարանական գործունեությանն որպես ակտիվ մասնակից:       

Սովորողներն ուսուցիչների և ծնողների օգնությամբ ստեղծում են էլեկտրոնային անհատական այբբենարաններ, ընթերցարաններ, ֆոտոալբոմներ, տեսաֆիլմեր, ռադիոներկայացումներ….: Ու հենց ուսումնական գործունեության ընթացքում յուրացնում են թվային տեխնիկական միջոցների (թվային ձայնագրիչ, տեսախցիկ, ֆոտոխցիկ)  հետ աշխատելու հմտությունները:

Երբ ձևավորվում էին նոր դասարանները, որտեղ ուսուցումը կազմակերպվելու է թվային տեխնիկական միջոցների ներգրավմամբ, ծնողներին մտահոգում էին հարցեր, որոնք վերաբերվում էին սովորղների  առողջությանն ու անվտանգությանը:  Բացի այն, որ թվային տեխնիկական միջոցների առկայությունն ու գործածումը դասարնում ուսումնական պրոցեսը դարձնում է ավելի հետաքրքիր, ինտերակտիվ, արդյունավետ, սովորղներին  փոխանցում է այդ գործիքներով աշխատելու հմտություններ, այն նաև ուսուցիչների և ծնողների առաջ դնում է խնդիր, բոլոր հնարավոր վտանգները հասցնել նվազագույնի: Իսկ դա հնարավոր է, երբ սովորողների մոտ ձևավորվում են թվային տեխնիկակակն միջոցներով աշխատելու որոշակի կանոններ (աշխատել սահմանաված ժամանակ` չգերազանցելով այն, տիրապետել վարժությունների որոշակի համակարգի, որոնք կօգնեն լիցքաթափվել, հանգստանալ), ինքնակարգավորման և ինքնահսկման կարողություններ: