Կրթահամալիրի ՙՆոր դպրոցի՚ 5-րդ դասարանի առաջադրանքների փաթեթի ստեղծումը նպատակ ունի լուծել մի շարք կարևոր խնդիրներ:

1. ՙՀայոց լեզվի՚ և ՙՄայրենիի ընթերցարան՚ դասագրքերը դիտարկվում են որպես մեկ միասնական առարկա: Ընդ որում, ՙՄայրենիի ընթերցարանում՚ զետեղված գրական ստեղծագործությունները որպես ուսումնասիրման նյութ են ծառայում ՙՀայոց լեզվից՚ ստացած քերականական գիտելիքները ամրապնդելու և գործնականում կիրառելու համար:
2. Բառարաններից և տեղեկատու գրականությունից օգտվելու հմտություն է զարգացնում:
3. Մայրենիի դասաժամերին համակարգչի կիրառումը դարձնում է անհրաժեշտություն:
4. Խթանում է երևակայությունը և ստեղծագործական միտքը:
5. Նպաստում է համագործակցային կարողությունների զարգացմանը:

Քայլերը`
- Նախ աշակերտները ծանոթանում են գրական նյութին:
- Կատարում են ընթերցարանում տրված առաջադրանքները:
- Այնուհետև իրենք են կազմում առաջադրանքներ`
-լեզվագործունեության
-գեղարվեստական մտածողության
- գրադարանային աշխատանք` բառարանային և հանրագիտարանային
-համակարգչային
-ստեղծագործական:

Յուրաքանչյուր աշակերտ իր կազմած առաջադրանքը քննարկում, ամբողջացնում է զույգի հետ:
Խմբով քննարկում են ու ներկայացնում:
Դասարանի բոլոր աշակերտները ի մի են բերում գրված առաջադրանքները, հավելում նորերը, միացնում կրկնվող հարցադրումները, խմբագրում են ու վերջնական տեսքի բերում:
Արդյունքում ստացվում է առաջադրանքների փաթեթ, որն էլ հետո, կիսամյակի վերջում, որպես ստուգարքային աշխատանք փորձարկվում է:

ՙՆոր դպրոց՚
5-րդ դասարան, ուսուցիչ`
Նունե Մովսիսյան

Մայրենիի առաջադրանքների փաթեթ

Ամփոփաթերթ երրորդ

Նմուշ
1. Գործնական քերականություն-թեմա` հնչյունաբանություն
Բանաստեղծությունից դուրս գրիր`
ա. ուղղագրական բարդություն ունեցող բառեր
բ. գրիր քանի հնչյուն, քանի տառ ունեն այդ բառերը
գ. վանկատիր:

2. Հանրագիտարանային աշխատանք
ա. Դուրս գրիր ՙԱշնան օր՚ բանաստեղծության հեղինակի` Վահագն Դավթյանի մասին պատմող տողերը:
բ. Դասագրքից կամ նրա բանաստեղծությունների գրքից ընտրիր քեզ դուր եկած բանաստեղծությունը և դասարանում ընթերցիր:

3. Բառարանային աշխատանք:
ա. Բացատրական բառարանի օգնությամբ բացատրիր ծավի բառի իմաստը:
բ. Հոմանիշների բառարանից դուրս գրիր կապույտ բառի հոմանիշները:
գ. Արմատական բառարանի օգնությամբ բացատրիր լաջվարդ բառը:

4.Համակարգչային աշխատանք
Ինտերնետից գտնել աշնան թեմայով բացիկներ կամ ստեղծել նորը:

5. Ստեղծագործական
ՙՀեքիաթ Կապույտի բալիկների` Լաջվարդի, Լազուրի, Մավի և Ծավի երկվորյակ քույրերի և փոքրիկ Բիլի մասին՚

Փորձարկել են`
Աննա Մելքումյանը
Գևորգ Թորոսյանը

1.
ա. թևեր, թախծագին, խորհրդավոր, օրոր, մամուռ, հեռացող
բ. թևեր-4տառ, 5 հնչյուն
գ. թե-վեր, թախ-ծա-գին, խոր-հըր-դա-վոր, օ-րոր, մա-մուռ, հե-ռա-ցող:

2. Դավթյան Վահագն Արմենակի: Ծնվել է 15. 8. 1922թ-ին, Արաբկիր, Արևմտյան Հայաստան: Բանաստեղծ, թարգմանիչ, հրապարակախոս: 1926-ին ընտանիքով Արաբկիր գյուղաքաղաքից փոխադրվել է Սովետական Ռուսաստան: Մասնակցել է Հայրենական մեծ պատերազմին:
Գրել է ՙԱնկեզ մորենի՚ բանաստեղծությունների ժողովածուն: Թարգմանություններ է կատարել Շ. Պետեֆիից:

3. Կապույտ-ծովագույն, երկնագույն
փխբ-թույլ, աղոտ
ծավի-լազուր, լաջվարդ, մավի, բիլ
լաջվարդ-թանկարժեք քար, որի հանքերը գտնվում են Պարսկաստանում:

4 . ՙՀեքիաթ Կապույտի բալիկների` Լաջվարդի, Լազուրի, Մավի և Ծավի քույրերի և Բիլի մասին՚
Տիեզերքում ապրում էր Կապույտ անունով մի կին: Նա ուներ հինգ երեխա` Լաջվարդը, Լազուրը, Մավին, Ծավին, Բիլը: Լաջվարդը երկինքն էր, Լազուրը` երկիրը, Ծավին բնությունն էր, Մավին`օվկիանոսը, իսկ Բիլը կրակի նման անընդհատ թռվռում էր: Ամենագեղեցիկը Լաջվարդն էր: Նա այնքան չքնաղ էր, որ մարդիկ ժամերով կանգնում էին և հմայված նայում վերև: Եղբայրները և քույրերը սկսեցին նախանձել Լաջվարդին: Լաջվարդը շատ տխրեց ու լաց եղավ, այնքան լաց եղավ, որ ջուրը հեղեղեց աշխարհը: