Յուրա Գանջալյան

Հանրապետական օլիմպիադայի համայնքային փուլից

Առարկայական օլիմպիադայի անգլերենի հարցաշարերը, ինչպես նաև նրանք, որոնք տրվում, են ավարտական և միասնական քննությունների ժամանակ, ստուգում են միայն աշակերտների ընկալելու կարողությունները: Աշակերտը միայն պասսիվ ընտրողի դերում է: Այստեղ նույնիսկ որոշակի դեր է խաղում բախտը:

Անցյալ տարի ես փորձելու համար նմանատիպ մի իտալերենի հարցաշարի պատասխանեցի: Չնայած, որ ես իտալերեն ոչ մի բառ չգիտեմ, հարցերի 48%-ին ճիշտ պատասխանեցի: Ընդամենը 12% չբավականացրեց, որպեսզի համակարգիչը գրանցեր իտալերենի իմ բավականին լավ իմացությունը: Դա անհեթեթ է:

Իմ կարծիքով օլիմպիադայի, ինչպես նաև ավարտական ու միասնական քննությունների հարցաշարերում պետք է տեղ գտնեն նաև ստեղծագործական առաջադրանքներ: Օրինակ`

ա/ Ուղղորդվող շարադրություն. Տրվում են բառեր և բառակապակցություններ, որոնցով պետք է որոշակի թվով նախադասություններից բաղկացած կապակցված խոսք գրել: Ստուգվում է աշակերտի գրելու կարողությունը:

բ/  Ազատ շարադրություն, բայց ոչ թե աշնան դեղնած տերևների մասին, այլ ստուգվի մի որևէ վիճահարույց հարցի մասին աշակերտի սեփական կարճիքը արտահայտելու կարողությունը:

գ/ Իրավիճակային առաջադրանքներ. « ի՞նչ կանես, եթե..»

դ/ Թարգմանություն մայրենի լեզվից օտար լեզու:

Օլիմպիադայի կազմակերպման մասին

Ես այդպես էլ չիմացա համայնքային օլիմպիադայի կազմակերպման կարգի մասին: Չկա այդպիսի մի խելամիտ կարգ: Ամենակարևոր հարցը, թե ով է իրավունք ստանում մասնակցելու մարզային փուլին, շատ մշուշոտ է և անհամոզիչ:

Օրինակ` մեր տասներորդ դասարանցի Շուշան Բլեյանը համայնքում երկրորդն էր իր արդյունքով, բայց իրավունք չստացավ շարունակելու իր պայքարը: Ութերորդցի Արտակը առաջին տեղն էր գրավել, և նույնպես անարդյունք:

Մի քանի ամիս առաջ իմ դասարանի երկու Շուշանները կատաղի, բայց արդար մրցակցությունում հաղթահարեցին ԱՄՆ-ի դեսպանատան կողմից կազմակերպված մրցույթի առաջին փուլը, իսկ Սողոմոնյան Շուշանը նույնիսկ հաղթահարեց երկրորդ` ստեղծագործական փուլը: Հարյուրավոր իր հասակակիցների մեջ ընդգրկվեց 30 լավագույնների մեջ: Սողոմոնյան Շուշանին չեն զիջում Առաքելյան Լիաննան, Սուքիասյան Սոնան, Ավանեսյան Հայարփին ու առավել ևս` մյուս Շուշանը: Ես չեմ կարծում, որ Մալաթիա-Սեբաստիա համայնքում կա այդպիսի մեկ այլ դասարան, ուր    այսպիսի գիտելիքներ են ստացել միայն շնորհիվ դպրոցում ճիշտ կազմակերպված ուսումնական պլանի, որը նոր տիպի ավագ դպրոցի խորհուրդն է կրում իր մեջ: Եվ եթե այս դասարանից որևէ մեկը չի ներկայացնելու մեր համայնքը մարզային փուլում, ապա ինչպես Սարոյանը կասեր իր հերոսի՝ մանկան անմեղ շուրթերով. «Ինչ-որ տեղ ինչ-որ մի բան սխալ է»: Պետք է ուղղել այդ սխալը: