Աշոտ Տիգրանյան
Դավիթ Մինասյան

ՀԱՄԱԿՑՎԱԾ ԱՌԱՋԱԴՐԱՆՔՆԵՐ

Իրականությունը մեկն է: Նրա բաղկացուցիչները` բազմաթիվ: Գիտությունը մեկն է` իմաստասիրություն: Ըմբռնման ոլորտներն են տարբեր:
 
Տիեզերքի, մարդկության, էթնոսի և հասարակության պարույրաձև զարգացումը 21-րդ դարում պարտադրում է աստիճանաբար վերադառնալ իրականության ամբողջական ընկալմանը, յուրացմանը և կենսագործունեության օբյեկտիվացմանը:

Ելնելով վերոշարադրյալ հիմնադրույթներից` մենք «Հասարակագիտություն», «Օտար լեզու» և «ՏՀՏ» դասընթացների ժամանակ սովորողների ձեռք բերած գիտելիքների, հմտությունների և արժեքային համակարգի մակարդակների ստուգման գործընթացների միավորման ճանապարհով խնդիր դրեցինք առավելագույնս կենսականացնել կրթական իրականությունը:

Հիմնային չափանիշ վերցնելով «Հասարակագիտություն» առարկայի պետական ծրագիրը և Բ մակարդակի չափորոշիչները` «Օտար լեզու» և «ՏՀՏ» դասընթացների հեղինակային ծրագրերի միջին նպատակայինը ներկայացվող առաջադրանքների հեղինակները ցուցաբերել են ներքոշարադրյալ մոտեցումները:

Առաջադրանքերի կառուցվածքն այսպիսին է. տրվում է լրացուցիչ տեղեկություն հասարակագիտական որևէ հիմնախնդրի մասին (հայերեն և օտար լեզուներով), որը դասագրքում լիարժեք բացահայտված կամ կարևորված չէ, այնուհետև «Հուշող հարցեր և առաջադրանքներ» բաժնում արվում են հարցադրումներ, որոնք յոթ բնույթի են`1. որոնողական, 2. վերլուծական, 3. թարգմանական, 4. գեղարվեստական, 5. հռետորական, 6. հետազոտական, 7. զուտ կենսափորձային:

«Հուշող հարցեր և առաջադրանքներ» բաժնի բովանդակությունը հետապնդում է չորս գլխավոր նպատակ`սովորողների համակցված գործունեության պատրաստվածության մակարդակի բացահայտում, մտավոր-սոցիալական և գեղարվեստական հմտությունների իրացում, օտար լեզուների իմացության կենսականացում և հասարակագիտական խնդրի լուծման ուղղորդում:

Առաջադրանքի երրորդ բաղկացուցիչը`խնդիրը, սովորողի առարկայական, այսինքն`հասարակագիտական, ստուգման բարձրագույն մակարդակն է, որը միաժամանակ լուծողի, առաջին հերթին`սովորողի, սոցիալականացմանը նպաստելու նպատակ է հետապնդում: Խնդրի լուծումը պահանջում է համակարգված գիտելիքներ բոլոր հանրակրթական առարկաներից և մտածական հմտություններ ու կարողություններ:

Առաջադրանքի չորրորդ բաղկացուցիչը`ՏՀՏ միջոցների կիրառումը, ամրապնդում է թվային տեխնիկա օգտագործելու`սովորողների ունակությունը, համակարգչային նոր ծրագրեր յուրացնելու մոտիվացիան, ինչպես նաև ցանկացած տեխնիկական միջոց որպես գործիք դիտարկելու մոտեցումը:
 Հարկ ենք համարում ընդգծել այն հանգամանքը, որ համակցված առաջադրանքի բազմաշերտությունը խթանում է սովորողների հետաքրքրասիրությունը և օժանդակում խմբային գործունեության ծավալմանը:

Իրականության բարեփոխման գլխավոր ճանապարհը սկսվում է իրականության իրական իմացությունից: Կրթությունը սկսվում է իրականության ուսումնասիրման գործիքների և յուրացման միջոցների տրամադրմամբ: Համակցվածության մեթոդաբանությունն այդ մոտեցման առանցքն է (միջուկն է):

26.12.09թ.