«Մխիթար Սեբաստացի» կրթահամալիր
Սովորողների հունիսյան ուսումնահետազոտական ճամբար 2007թ.

«Մխիթար Սեբաստացի» կրթահամալիրի ուսուցողական ծրագրերի 1-7-րդ և 9-րդ դասարանների բոլոր սովորողների, ինչպես նաև այլ դպրոցների նույն դասարանների սովորողների համար 2007թ. հունիսի 1-ից 15-ը կազմակերպվում է ամառային ճամբար: Ճամբարը կազմակերպվում է կրթահամալիրի ՀԱԹ Բ-1 դպրոց պարտեզի, ՀԱԹ Բ-4 դպրոց պարտեզի, մայր դպրոցի, գեղարվեստի վարժարանի, արհեստագործական դպրոցի, Մ. Գանյանի դպրոցի տարածքներում: Տեղերում ճամբարի պատասխանատուները նշանակվում են կրթահամալիրի տնօրենի հրամանով: Նրանք ապահովում են ճամբարի մասնակիցների ամենօրյա անվտանգ աշխատանքների կազմակերպումը:

Ճամբարի ամենօրյա աշխատանքներն սկսվում և ավարտվում են տողանով:
Առավոտյան տողանը սկսվում է երաժշտությամբ: Ճամբարի ղեկավարը ողջունում է ճամբարի մասնակիցներին: Նա տեղեկացնում է ճամբարի նախորդ օրվա աշխատանքի մասին: Ջոկատների ղեկավարները ճամբարի պետին զեկուցում են աշխատանքներին ջոկատի պատրաստության մասին՝ նշելով բացակաների անունները և պատճառը:
Երեկոյան տողանը սկսվում է ճամբարի պետի ողջունով: Ջոկատների ղեկավարները զեկուցում են այդ օրը կատարած աշխատանքների մասին: Տողանն ավարտվում է երաժշտությամբ:

Ճամբարի աշխատանքներն ընդգրկում են՝

• երգի, պարի ուսուցում,
• հանրօգուտ աշխատանք,
• ստեղծագործական, հետազոտական աշխատանք, այդ թվում՝ ամառային արշավախմբերի աշխատանքների նախագծում և նախապատրաստում, նոր ուսումնական տարում ուսումնական գործունեության կազմակերպում, համակարգչի միջոցով ուսուցման կազմակերպում, ամառային հեռավար ուսուցման դպրոցի կազմակերպում,
• սպորտային պարապմունքներ,
• հանգիստ,
• սնունդ:

Ամառային հայրենագիտական արշավախմբի աշխատանքը նախագծող խումբը պետք է ընտրի արշավի վայրը, կազմի արշավի ծրագիրը, ֆինանսական նախահաշիվը, անհրաժեշտ միջոցները գտնելու ճանապարհները, արշավի արդյունքի ներկայացման ձևը:

Նոր ուսումնական տարում ուսումնական գործի կազմակերպումը պարտադիր քննարկման նյութ է ճամբարի բոլոր մասնակիցների հետ: Քննարկումների արդյունքում բոլորը պետք է ծանոթանան 2007-2008 ուստարվա ուսումնական պլանին՝ իր պարզաբանումներով, ուսումնական գործի կազմակերպման առանձնահատկություններին, ուսումնառության մասին պայմանագրին: Այս քննարկումներին ներգրավվում են ուսուցողական ծրագրերի ղեկավարները, կրթահամալիրի տնօրենը և մասնաժողովի նախագահը: Քննարկումները սկզբում կազմակերպվում են ջոկատներում, հետո ըստ տարիքային խմբերի՝ 30-40 հոգիանոց խմբերով:

Համակարգիչների միջոցով ուսուցման կազմակերպումը պարտադիր քննարկման նյութ է ճամբարի բոլոր մասնակիցների հետ: Քննարկման ընթացքում բացատրվում է ուսումնական գործի կազմակերպման այդ ձևը: Քննարկման արդյունքում ենթադրվում է այդպիսի դասարանի կայացում:
Ամառային հեռավար (էլեկտրոնային) դպրոցի մասին քննարկումները պարտադիր են ճամբարի բոլոր մասնակիցների համար: Քննարկումների արդյունքում ենթադրվում է այդպիսի խմբերի ձևավորում, որոնք կարող են սկսել իրենց աշխատանքը հենց ճամբարի գործունեության ընթացքում:

Սպորտային պարապմունքների ժամանակ խրախուսվում է մրցումների, մրցաշարերի կազմակերպումը: Ցանկալի են միջճամբարային ընկերական հանդիպումներն ու խաղերը:

Ուսումնական ճամփորդության մասին հայտը ճամբարի ղեկավարը երկու օր առաջ ներկայացնում է կրթահամալիրի տնօրենին՝ նշելով մեկնելու վայրը, օրը, մասնակիցների ցուցակը, ճամփորդության ղեկավարին և նրա տեղակալին: Ճամբարի ղեկավարը չի կարող մասնակցել ուսումնական ճամփորդությանը: Ուսումնական ճամփորդության գնացող խմբում լրագրողների մասնակցությունը պարտադիր է: Ուսումնական ճամփորդության հաջորդ օրը ճամփորդության ղեկավարը հաշվետվություն է ներկայացնում «Պատանի ստեղծագործողի և հետազոտողի» հեռակա դպրոցի ղեկավարին (ցանկալի է էլեկտրոնային՝ ընդգրկելով նկարներ):

Մասնակիցների հաշվառումը պարտադիր է:
Ճամբարի աշխատանքներն ամեն օր սկսվում են 9.00 և ավարտում 16.00: Վերջին օրը աշխատանքները ավարտվում են 20.00-ին` հրաժեշտի խարույկով:

Ճամբարի մասնակիցները բաժանվում են 5-6 հոգիանոց աշխատանքային ջոկատների և ստեղծագործական հետազոտական աշխատանքներ կատարող խմբերի: Յուրաքանչյուր դասավանդող մասնակցում է երկու-երեք ջոկատների աշխատանքներին: Ստեղծագործական հետազոտական աշխատանքների ընթացքում դասավանդողները կա՛մ ընդգրկվում են խմբերում, կա՛մ կազմում են առանձին խումբ:

Ճամբարի աշխատանքների վերջին օրը աշխատանքային ջոկատները և հետազոտական խմբերը ներկայացնում են իրենց կատարած աշխատանքները:

Ճամբարի աշխատանքների ընթացքում յուրաքանչյուր մասնակից մեկ անգամ մասնակցում է ուսումնական ճամփորդության` առանց գիշերելու:

Մարզերից եկած սովորողների գիշերակացը կազմակերպվում է երևանցի սովորողների ընտանիքներում կամ կրթահամալիրի հյուրատանը:

Ճամբարի պատասխանատուները մինչև 2007թ. մայիսի 26-ը կրթահամալիրի տնօրենին են ներկայացնում կատարելիք աշխատանքների ցանկը, դրանց կատարման համար անհրաժեշտ  գործիքների ցուցակը, այն սովորողների ցուցակը, ովքեր կարող են իրենց տանը ընդունել մարզերից եկած սովորողների: