Եթե համարձակվել ես սովորեցնել

Դժվար է իմանալ,  թե որքան բան դեռ չգիտենք: Փորձում ենք իմացածը ամբողջական և արդյունավետ փոխանցել, սովորեցնել ուրիշներին: Եվ ամբողջ կյանքում սովորում ենք` լավ կամ վատ,  ինքնուրույն կամ ուրիշների օգնությամբ, երբեմն` մեծ հաճույքով և խանդավառությամբ, երբեմն էլ …

Ուրիշ բան է, երբ համարձակվում ես սովորեցնել նրանց, ովքեր ունեն մեծ փորձ, և ումից ինքդ սովորելու շատ բան ունես: Այդ դեպքում պարտավոր ես և պետք է մեկ անգամ ևս ուսումնասիրես բոլոր այն նյութերը, որոնք սովորել ես և հիմա ուզում ես փոխանցել ուրիշներին:

Կրտսեր դպրոցում  դասավանդողի աշխատանքը դժվար է, հետաքրքիր և պատասխանատու, միևնույն ժամանակ,  հեշտ, քանի որ քո դասարանում  քո աշակերտների համար դու մեկն ես, ով ամեն ինչ կամ գրեթե ամեն ինչ գիտի:  Նրանք քեզ վստահում են: Այլ է, երբ սովորողի դերում քո ընկերներն են, գործընկերները, մարդիկ, ովքեր քեզ նման դասավանդող են: Այս դեպքում պետք է այնպես անես, որ քեզ վստահեն:

Վերապատրաստումներին նախապատրաստվելիս սովորեցինք մոդուլներ կազմել, լրացուցիչ գրականությունից օգտվեցինք, ծանոթանացանք մյուսների փորձին` միևնույն ժամանակ փորձելով չկրկնվել և նոր, հետաքրքիր լուծումներ գտնել: Այն փաստը, որ ինքներս մի շարք վերապատրաստումների էինք մասնակցել, որպես սովորող, օգնեց մեզ  ավելի ճշգրիտ և արդյունավետ տնօրինել վերապատրաստումներին հատկացվող ժամանակը, անել այնպես, որ վերապատրասվողը սիրով ու պատրասակամությամբ պասիվ սովորողից վերածվի ակտիվ, հետազոտող, ստեղծագործող սովորող-սովորեցնողի:

Յուրաքանչյուր ուսուցիչ` փոքրերի թե մեծերի, աշխատանքի ընթացքում անընդհատ պարտավոր է հիշել Ջ. Փոյայի տասը պատվիրանները ուսուցչին:

Ի լրացում դրանց` համարձակվում ենք ավելացնել.

• Ուսուցչությունը Աստծուց տրված շնորհ է. գ նահատի'ր:
• Ինքդ քո առջև ամենաբարձր ու մեծ խնդիրները դի'ր, սակայն արժևորի'ր, կարևորի'ր ամենափոքրն անգամ:
• Եղի'ր պատասխանատու նրանց հանդեպ, ում ընտելացրել ես:
• Պատկերացրո'ւ հաջողությունդ: Հավատա´ դրան և մեկ վայրկյան իսկ մի' կասկածիր:
• Պարբերական  կամ տևական անհաջողություններդ, ձախողումներդ կարող ես օգտագործել` որպես ուժգին խթան թռիչքային հաջողությունների համար:
• Քննի'ր սովորելու և սովորեցնելու առումով քո ամենահաջող  դեպքերը, վիճակները:
• Առաջարկի'ր, բայց երբեք մի' պարտադրի'ր:
• Կարողացի'ր զարմացնել:
• Սովորեցրո'ւ հավատալ հրաշքներին և հրաշագործել:

Լուսինե Փաշայան, Նաիրա Դալուզյան