Համակարգչային ծրագրեր և ինտերնետ սովորելու իմ պատմությունը

Իմ կարծիքով յուրաքանչյուրս իր առօրյայում, քիչ թե շատ, առնչվում է  տարբեր տեղեկատվական  տեխնոլոգիաների միջոցների հետ,որոնց թվում մեծ դեր են խաղում ինտերնետն ու համակարգիչը:
Աշխատելով «Մխիթար Սեբաստացի»  կրթահամալիրում՝ ուսուցանելիս անհնար է դոփել տեղում,կենտրոնանալ միայն դասագրքերի  և ընդունված,գոյություն  ունեցող  մեթոդների վրա: Կարծում եմ, որ դասավանդողը անընդհատ պետք է առաջ գնա, փորձի բավարարել այն պահանջներն ու խնդիրները, որոնք ծագում են ժամանակի հետ դասապրոցեսի  ընթացքում:  Լինելով այլընտրանքային մանկավարժության կրող, հետազոտող ուսուցիչ՝ ինձ մոտ   անհրաժեշտություն առաջացավ ուսումնասիրել համակարգչային ծրագրեր, կարողանալ օգտվել ինտերնետից:  Ու ես մոտեցա համակարգչին: Նախ նշեմ, որ ինձ օգնեցին կրթահամալիրում կազմակերպվող  համակարգչային  ծրագրերի դասընթացները  դասավանդողների համար, որոնք  ինձ  համար  և´ հետաքրքիր էին, և´ արդյունավետ: Մասնակցել եմ համակարգչի մասնագետ Սոնա Խաչատրյանի, ֆոտոլրագրության մասնագետ Մարինե Մկրտչյանի, սովորողներ Սարգիս Մարկոսյանի, Շանթ Խլղաթյանի, Արսեն Սիրոյանի վարած դասընթացներին: Վերջին դասընթացները շատ հետաքրքիր էին. ես հայտնվել էի աշակերտի կարգավիճակում, աշակերտներն էլ` դասավանդողի: Հետո գործընկերներիս  օգնությամբ սովորեցի օգտվել  ինտերնետից, որտեղ որոնողական աշխատանքների շնորհիվ գտա մանկավարժությանը  վերաբերող  բազմաթիվ   կայքեր: Մնացածը արել եմ ինքնուրույն աշխատանքով: Ինտերնետում կային  հետաքրքրաշարժ նյութեր, որոնք  բացի թարգմանում, մուտքագրում, խմբագրում-ձևափոխում էի: Այդ նյութերը դարձան լրացուցիչ ուսումնական նյութեր, որոնք այժմ  օգտագործում են  գործընկերներս  տարրական  դասարաններում:

Համակարգչային Macromedia Dreamweaver ծրագիրն ինձ սովորեցրեց ավագ դպրոցի աշակերտ  Սարգիսը: Ես սովորեցի  իմ դասարանի մասին տարբեր նյութեր   տեղադրել  կրթահամալիրի ինտերնետային կայքում:

Ուսումնառության ընթացքում դասարանում  օգտագործելով   թվային ֆոտոխցիկ՝  նախաձեռնեցինք  տարեվերջին յուրաքանչյուր աշակերտի տալ   անհատական նկարների սկավառակ, որը պետք է պատրաստվեր   համակարգչային հատուկ  ծրագրի` Movie Maker-ի միջոցով: Տվյալ   համակարգչային ծրագիրը սովորելու  համար  դիմեցինք մեր դպրոցի համակարգչի մասնագետ Արմինե Խաչատրյանին, որի օգնությամբ սովորեցի և ինքս  ամեն աշակերտի համար պատրաստեցի անհատական CD:
Այսպիսով դեռ չի ավարտվել իմ սովորելու գործընթացը. այն անընդհատ է: Ես մեծ սիրով կշարունակեմ ուսումնասիրել նորանոր  համակարգչային ծրագրեր:

Անահիտ Ավագյան