Մաթեմատիկա սովորենք Նիկիտա Պողոսյանի օգնությամբ

«Մխիթար Սեբաստացի» կրթահամալիրի մաթեմատիկայի և ծրագրավորման ոսումնական կենտրոնի ղեկավար Նիկիտա Պողոսյանը հրատարակել է իր հերթական գիրքը` «Սովորենք մաթեմատիկա» (օժանդակ ձեռնարկ, V-IX դասարաններ): Չնայած վերնագրից երևում է, որ այն նախատեսված է մաթեմատիկա սովորելու և ոչ թե սովորեցնելու համար, բայց դասավանդողներն էլ կարող են ձեռնարկը հաջողությամբ օգտագործել իրենց սաներին մաթեմատիկա սովորելիս օգնելու համար: Ձեռնարկը բաղկացած է 14 բաժիններից.

• բնական թվեր,
• կոտորակային թվեր,
• ռացիոնալ թվեր,
• փոփոխականներով արտահայտություններ,
• բնական ցուցիչով աստիճան,
• կրճատ բազմապատկման բանաձևեր,
• անհավասարություններ,
• ռացիոնալ արտահայտություններ և դրանց ձևափոխումը,
• քառակուսի արմատ և դրա հատկությունները,
• քառակուսային եռանդամ, քառակուսային հավասարում, քառակուսային անհավասարում,
• հավասարումներ, հավասարումների համակարգեր, անհավասարումների լուծման միջակայքերի եղանակ,
• n-րդ աստիճանի արմատ, ռացիոնալ ցուցիչով աստիճան,
• թվաբանական և երկրաչափական պրոգրեսիաներ,
• ֆունկցիաներ և ֆունկցիաների գրաֆիկներ:

Յուրաքանչյուր բաժնի սկզբում համառոտ ներկայացված է տեսական նյութ, լուծված են տիպական առաջադրանքներ և բերված են առաջադրանքներ ինքնուրույն կատարելու համար: Ձեռնարկի վերջում բերված են բոլոր առաջադրանքների պատասխանները: Շատ եմ կարևորում, որ ձեռնարկում ընդգրկված առաջադրանքների հիմնական մասը հեղինակը փորձարկել է մաթեմատիկա դասավանդելիս: Նիկիտա Պողոսյանը իրեն հատուկ համեստությամբ նշում է, որ ձեռնարկը կատարյալ չի համարում և դիտողություններն ու առաջարկությունները խնդրում է ուղարկել անմիջապես իրեն [email protected] էլեկտրոնային հասցեով կամ զանգահարել (093)711015 հեռախոսահամարով:
Շնորհավորում եմ մաթեմատիկայով բոլոր հետաքրքրվողներին այս ձեռնարկի հրատարակման առիթով:

Գևորգ Հակոբյան