Սովորեցի, երբ սկսեցի սովորեցնել

«Յուրաքանչյուր մարդու մեջ կարող են ծաղկել հազարավոր անսպասելի հմտություններ և կարողություններ, եթե նրան համապատասխան հնարավորություն ընձեռնվի»:                                           
Դորիս Լեսսինգ

Մեր նպատակն աշակերտների հետաքրքրությունների հայտնաբերումն է և դրանց զարգացումը: Երեխան ընդունակ է ունենալու խորը մտքեր և զգացմունքներ, կարող է բազմակողմանիորեն և արագ զարգանալ, այդ պատճառով էլ լրագրության դասընթաց – գործունեությունը կազմվում է՝ հաշվի առնելով այդ սկզբունքը: Լրագրությամբ զբաղվող երեխաներն ուզում և փորձում են բացահայտել իրենց շրջապատող աշխարհն ու մարդկանց, իրենց և շրջապատի հետաքրքրություններն ու խնդիրները, նորությունները և ձեռքբերումները:

Շատ կարճ ժամանակահատվածում պարզ դարձավ, որ լրագրությունը պետք է դառնա այն ընտրած երեխաների գործունեության ձև և դուրս գա դասարանային անձկությունից: Բնականաբար գործունեության կազմակերպումն ունի իր առանձնհատկությունները  և խիստ տարբերվում է ավանդական դասապրոցեսից, և գործունեություն ղեկավարող ուսուցիչն էլ պետք է համապատասխան որակներ ունենա և  անհրաժեշտ հմտություններ ձեռք բերի: Եվ ստացվում է այնպես, որ գործունեության ընթացքում սովորում է նաև դասավանդողը։ Սովորում է` ինչպես ճիշտ և արդյունավետ կազմակերպի աշխատանքը, խրախուսի ինքնուրույնությունը, հրահրի նախաձեռնող լինելու և այլն:

Գործունեություն ղեկավարելիս պարզապես անհրաժեշտ է ազատվել ղեկավարի` հրամանատարի բարդույթից: Պետք է հասկանալ, որ այստեղ չեն գործում դասական գնահատումն ու անշարժությունը:  Գործունեությունը ղեկավարում  և ուղղորդում են ներշնչաքը, վստահությունը, ընդհանուր շահերը և սերը:Պետք չէ մտածել, որ ուսուցչի դերն այնտեղ չեզոքանում է, թերևս ընդհակառակն, ավելի է արժևորվում. «ընկեր» լինելն ավելի պատասխանատու աշխատանք է, քան հրամանատար լինելը:

Առաջանում է անհրաժեշտություն սովորելու և օգտագործելու անընդհատ զարգացող տեխնիկական նվաճումները: Լրագրող սովորողները սովորում են աշխատելով. սովորում են, որովհետև անհրաժեշտություն է առաջանում սովորելու: Լրագրող–ղեկավարը սովորում է, որովհետև չի կարող ղեկավարել սովորող–լրագրողի գործունեությունն առանց սովորելու: Անհրաժեշտություն է առաջանում սովորելու համակարգչային ծրագրեր, օգտվելու թվային տեխնիկայից, աշխատելու նկարների հետ:

Շատերի համար թերևս անհասկանալի և անընդունելի է լրագրության դասավանդումը դպրոցում, սակայն մեր աշխատանքի ընթացքում ցույց ենք տվել, որ այդ ոչ միայն հնարավոր է, այլև շատ արդյունավետ: Այս դասընթաց–գործունեությունը հնարավորություն է տալիս խորացնելու և զարգացնելու սովորողների լեզվական, թարգմանական, որոնողական և ստեղծագործական հմտությունները: Սովորողները սկսում են զգալ օտար լեզվի կիրառման անհրաժեշտությունը` սկսում են նյութեր որոնել և թարգմանական աշխատանք կատարել: Հնարավորություն է տալիս  ժամանակակից երեխային ազատ լինելու իր մտքերն արտահայտելիս, ազատորեն շփվելու` հարցազրույց վերցնելու թե՜ տնօրենից, թե՜ անցորդից, թե՜ պաշտոնատար անձից: Սովորող–լրագրողները սկսում են ուշադրություն դարձնել իրենց բանավոր և գրավոր խոսքին, որովհետև զգում են խոսքի կարևորությունը:

Բնականաբար այս գործունեությունը ղեկավարելիս անհրաժեշտություն է առաջանում սովորելու կոնկրետ լրագրական հմտություններ, ծանոթանալու ժամանակակից լրագրությանը, լրագրության մասին բազմաթիվ ձեռնարկներին, էլեկտրոնային թերթի առանձնահատկություններին՝ իրականությունից չկտրվելու համար: Անհրաժեշտություն է առաջանում մշակելու և գործունեության ընթացքում կիրառելու բազմաթիվ առաջադրանք–վարժություններ, որոնց շնորհիվ աշակերտները սովորում են նյութ գրել, վերնագրել դա, հարցազրույց վերցնել, ռեպորտաժ պատրաստել և այլն:

Գործունեությունը ենթադրում է անընդհատ աշխատանք, իսկ աշխատելիս անընդմեջ սովորում ես: Իսկ այս փոփոխական և առաջ սլացող  աշխարհում սովորում ես, որպեսզի կարողանաս ապրել, այլապես մի օր կարթնանաս ու կհասկանաս, որ աշխարհն այլևս չի ընդունում քեզ, որ դու դուրս ես մղվել իրականությունից, որ մնացել ես անցյալում:

Սարգսյան Մարգարիտ
Հակոբյան Ժաննա