Ամենակարևոր բաները հենց ամենափոքրերից ենք սովորում

Մարդը, որն ուզում է հաջողություների հասնել իր աշխատանքում, պետք է անընդհատ ու ամենքից սովորի և ինքնակրթությամբ զբաղվի: Երբ աշխատանքդ պահանջում է ստեղծագործական մոտեցում, և փորձում ես նորամուծություններ անել դասն ավելի հետաքրքիր դարձնելու համար, պարզվում է, որ քո պլանավորած աշխատանքները կատարելու համար քեզ հարկավոր են նորանոր տեղեկատվություն, գիտելիքներ, կարողություններ և հմտություններ:

Երբ «Օժտված երեխաների հայտնաբերում և ուսուցում»  ծրագրի շրջանակներում  մի քանի դասվարներով  սկսեցինք կազմակերպել ստուգատեսներ, օժտվածության և դրան առնչվող հարցերի վերաբերյալ որքան հնարավոր է շատ տեղեկատվության կարիք ունեցանք: Անհրաժեշտ էր նաև ծանոթանալ այլ դպրոցների և ծրագրերի փորձին, ինչում մեզ շատ օգնեց  ինտերնետը և կրթահամալիրի «Տիգրան Հայրապետյան» գրադարանը։ Անհրաժեշտ էր նաև տիրապետել կազմակերպական որոշ հմտությունների (մշակել օրակարգ, հաշվարկել բյուջե, լուծել սննդի հետ կապված հարցեր, տարբեր միջոցներով տեղեկատվություն ապահովել): Արդյունքում մեկ տարի շարունակ ամիսը 2 անգամ, իսկ ամառային և ձմեռային արձակուրդին՝ ավելի հաճախակի,  կազմակերպվեցին ստուգատեսներ 6-11 տարեկան 100-150 երեխաների համար: Ստեղծվեցին աշխատանքային տարբեր տարատարիք խմբեր (խմորագործներ, նկարիչներ, լրագրողներ, բնագետներ և այլն…), և անհրաժեշտ եղավ մշակել, ստեղծել այնպիսի առաջադրանքներ, որոնց կատարման ընթացքում հնարավոր լիներ ներգրավել  այդ տարիքային խմբին պատկանող յուրաքանչյուր երեխայի (6-11տ.), որպեսզի նրանցից յուրաքանչյուրը սովորեր և սովորեցներ մյուսին` մեծը փոքրին և հակառակը: Այդ ժամանակ կարևոր դիտարկումներ և հայտնագործություններ արեցինք մենք` ուսուցիչներս, համագործակցային ուսուցման կազմակերպման հետ կապված շատ նոր գաղափարներ ծնվեցին, որոնք փորձարկվեցին ինչպես ստուգատեսների ժամանակ, այնպես էլ դասարաններում: Խնդիր ունեինք բացի երեխաների մեջ որևէ  օժտվածություն հայտնաբերելուց (իսկ մենք համոզված ենք, որ յուրաքանչյուր մարդ որևէ կոչում ունի), նրանց  սովորեցնենք միասին աշխատել` իրար լսել, հարգել, օգնել: Համագործակցելով աշխատել սովորեցինք նաև մենք:
Մեր ուսուցիչների համագործակցության արդյունքում ծնվեցին «Գրատախտակ» ամսագրի 2 համարները, առաջադրանքների ամառային և ձմեռային փաթեթները, որոնք շատ դուր եկան և երեխաներին և ծնողներին: Կազմակերպվեցին նաև սեմինարներ ծնողների համար, որոնց ժամանակ քննարկվեցին նրանց և մեզ հուզող շատ հարցեր:
Մարդն իր կյանքում սովորում է անընդհատ` կամա թե ակամա, փոքրից թե մեծից, և հաճախ ամենակարևոր բաները սովորում ենք հենց ամենափոքրերից, քանի որ նրանք ավելի զգայուն ու նրբանկատ են:

Լուսինե Փաշայան
Նաիրա Դալուզյան