Գրիգոր Խաչատրյան
հրատարակչական գործի ղեկավար

Հաղորդակցություն
Խոսք` նվիրված հրատարակչատան բացմանը

Գրավոր և բանավոր խոսքի մեջ սարեր ու ձորեր կան, նույնիսկ անդունդներ, որտեղ կարելի է հանդիպել բազմատեսակ կենդանիների` ընտանի և վայրի: Գիրը սպանում է, խոսքը կենդանացնում, և հենց այդ պատճառով էլ, չնայած կարելի է ասել հավանաբար, գրավոր խոսքի վարպետին ասում են գրող, իսկ նրա ծոցն էլ անվանում են գրողի ծոց, և գրադարանը, որտեղ այսօր գտնվում ենք, իսկական գրողի ծոց է:

Չնայած այդ թերություններին՝ այն մարդկային հաղորդակցության կարևորագույն միջոցներից մեկն է: Գիտեք՝ ինչպես է կարևորվում և նշվում գրերի գյուտը, ինչպես են պահպանվում ազգային հպարտություն հանդիսացող գրավոր մատյանները, առաջին տպագիր գիրքը, որի հեղինակը դարձավ Մեղապարտ:

Մեր կրթահամալիրը, հանրապետությունում մեկ սովորղին ընկած համակարգիչների թվով ամենաառաջավորը լինելով հանդերձ, կարևորում է տպագիր հաղորդակցության ձևը, որի փորձը ունեցել է «Շաղիկ» հրատարակչության տեսքով, որտեղ դպրոցի ուսուցիչների միջոցով բազմաթիվ գրքեր և դասագրքեր է պատրաստել ժամանակին: Այսօր մենք, վերազինված արդեն նորագույն տեխնոլոգիաներով, վերադառնում ենք տպագրությանը՝ լրացնելու համար այն բացը, որ չեն կարող լրացնել գիտելիքի ֆիքսման, փոխանցման էլեկտրոնային միջոցները՝ դրա մասնակիցը դարձնելով դպրոցի ոչ միայն ուսուցիչներին, այլև սովորողներին, որոնք (ծնողների հետ միասին) կրթահամալիրում կարող են իրենց հետաքրքրություններն ու նախասիրությունները բավարարող բազմաթիվ գործունեությունների մեջ ներգրավվել և հանդես գալ նախաձեռնություններով, առաջարկներով. դա մենք համարում ենք ընդամենը հասարակական պատվեր, որի իրագործմանն էլ լծված ենք: