Թ. Ղահրամանյան, Մ. Գաբանյան

Ուսումնա-հետազոտական ճամփորդություն – դաս
համագործակցային աշխատանք Փարաջանովի տուն-թանգարանում

Դասապրոցեսի ընթացքում կատարվող ամեն մի աշխատանք առավել արդյունավետ և ամբողջական է դառնում, երբ համատեղվում է մեկ ուրիշ դասարանի նույնանման աշխատանքի հետ: Այն, ինչ պիտի ներկայացնեմ, դասարանների համագործակցության լավագույն օրինակ է: Այս ընթացքում դպրոցի շատ դասարաններ են այցելել Ս. Փարաջանովի տուն-թանգարան: Բայց ահա 9-1 դասարանի այցելությունը տ. Մարիի գլխավորությամբ դարձել էր նյութ` նվիրված Փարաջանովի կյանքին, ֆիլմերին, կոլաժներին և մյուս ստեղծագործություններին: Այն ներկայացվել էր ուսումնական նյութերի պրեզենտացիայի «ուրբաթներից» մեկի ժամանակ, դիտել էին նաև Լուսավորչական դպրոցում:

Երբ 7-2 դասարանն էր գնում թանգարան, 9-1-ի ուսումնական այս նյութը շատ տեղին էր` նախապես պատրաստված թանգարան գնալու համար: 7-2-ում Փարաջանովի մասին նախնական զրույցից հետո մենք տ. Մարիի առաջարկությամբ դիտեցինք 9-1-ի նյութը, և պարզվեց, որ այն թերություններ ունի, լրացման, ամբողջացման կարիք կա: Սա մեզ ստիպեց թանգարանում ավելի ուշադիր լինել, լսել զբոսավարի ինֆորմացիան, նկարել անհրաժեշտ նյութերը:

Մենք թանգարան էինք գնացել լուսանկարչական ապարատներով, գրիչներով և նոթատետրերով: Երեխաները գրառում էին ամեն մի մանրուք, ինֆորմացիա, ինչը կարող էր օգտակար լինել նյութի լրացման համար: Երեխաները հրաշալի տիրապետում են թվային տեխնիկային: Բերված նկարները երեխաները իրենք են անցկացրել համակարգչի մեջ, խմբավորել: Հետո նրանք թղթին հանձնեցին իրենց տպավորությունները: Իմ կողմից խմբագրվելուց և սրբագրվելուց հետո իրենք` երեխաները, դրանք մեքենագրեցին և ձևավորեցին համակարգչի վրա:

Հետո եկավ եղած և նոր նյութը համեմատելու, համադրելու և համատեղելու աշխատանքը: Երեխաները, որոնցից շատերը շատ լավ տիրապետում են Word, PowerPoint, Photoshop և այլ ծրագրերի, իրենք էին մեծ հմտությամբ անում այդ աշխատանքը: Այստեղ տեղին է առանձնացնել Զարուհու և Լիլիթի աշխատանքը, ովքեր վարժ համադրում էին նկարները, գտնում, թե որ նկարն է առավել հաջող, զետեղում այն և ձևակերպում ամեն մի կոլաժի, նկարի ինֆորմացիան: Այս ամբողջ ընթացքում ես և տ. Մարին մեր խորհուրդներով օգնում էինք նրանց և կազմակերպում աշխատանքը: Նյութը ներկայացվել է, և ցանկություն կա այն ֆիլմի վերածելու:

Ասեմ նաև, որ մեր ուսումնական ճամփորդությունը` նյութերով, նկարներով և տպավորություններով, զետեղվել է նաև համալիրի ինտերնետ կայքում: