Սուսան Դավթյան

5–6 տարեկան երեխաների ուսուցումը

Մարդկանց վերաբերվեք այնպես, կարծես նրանք այնպիսին են, ինչպիսին պետք է լինեն, և դուք նրանց կօգնեք դառնալու այնպիսին, ինչպիսին նրանք կարող են լինել:

Յոհան ֆոն Գյոթե

 5 – 6 տարեկան երեխաների ուսուցման կարևոր խնդիրներից է խոսքի զարգացումը: Խոսքը բազմաֆունկցիոնալ համակարգ է, որի հիմքում ընկած է լեզվի նշանային համակարգի կիրառումը հաղորդակցման ընթացքում: Հայտնի է, որ խոսքը գլխուղեղի բազմաթիվ գոտիների համաձայնեցված գործունեության արդյունք է: Խոսքի համակարգը լինելով հասարակական – պատմական երկարատև զարգացման արդյունք` երեխայի կողմից, սակայն, յուրացվում է համեմատաբար կարճ ժամանակում: Իհարկե այդ կարճ ժանամակում երեխան հասցնում է հաղթահարել խոսքի զարգացման երեք ճգնաժամային փուլ.

1. 1 – 2 տարեկան հասակում, երբ ձևավորվում են խոսքի նախադրյալները և սկսվում է խոսքային զարգացումը.
2. 3 տարեկանում, երբ ինտենսիվ կերպով զարգանում է կապակցված խոսքը և իրադրական խոսքից անցում է կատարվում ենթատեքստային խոսքի.
3. 5 – 6 տարեկանում, երբ սկիզբ է դրվում գրավոր խոսքի զարգացմանը:

Հաշվի առնելով իրար հաջորդող այս ճգնաժամերը, առավել կարևորվում է 5 – 6 տարեկանների ծրագրված գործունեության կազմակերպումը և նրանց առանձնահատկություններին ու ընդունակություններին համապատասխան պարտեզից դպրոց անցումը:

Երեխաները լավ են սովորում այն միջավայրում, որտեղ բավարարվում են նրանց ֆիզիկական և հոգեբանական կարիքները, որտեղ նրանք իրենց պաշտպանված են զգում, գնահատվում են`որպես յուրահատուկ անհատներ և ակտիվորեն ներգրավվում են նոր հմտություններ ու գիտելիքներ ձեռք բերելու նպատակով կազմակերպված խաղերում, աշխատանքներում:

 Նման միջավայրի ապահովմանը նպաստում է նաև երկարացված օրով ուսուցումը, ինչը կրկնակի հնարավորություն է երեխայի անհատական առանձնահակությունները և կենսաբանական ռիթմերը հաշվի առնելով` կազմակերպել նրա ուսուցումը:

«Դեպի հայտնագործություն իսկական ճամփորդությունը ոչ թե նոր տեսարաններ փնտրելն է, այլ նոր հայացք ունենալը»: Մարսել Պրուստ