Մարինե Մարտիրոսյան, Լուսինե Վարդանյան
քոլեջ, 2-րդ կուրս

Երկարացված օրվա ծրագիր

Ծնողների զբաղվածությունը, ինչպես նաև կրթահամալիրի մանկավարժների հմուտ մանկավարժությունը, հոգատարությունը և կրթահամալիրի ունեցած բարենպաստ և ժամանակակից տեխնիկայով հագեցած պայմանները, առաջ քաշեցին երկարացված օրվա ծրագրի ստեղծման անհրաժեշտությունը: Ծրագրի ստեղծումը արդյունավետ է ոչ միայն աշխատող ծնողի, այլ նաև բոլորի համար: Այն հանգամանքը, որ երեխան գործ ունի կրթված, զարգացած և հմուտ մանկավարժի հետ, աշխատում է հարմարավետ և գործնական միջավայրում, որտեղ նա ազատորեն կարողանում է արտահայտվել և ինքնահաստատվել` ձեռք բերել ինքնուրույնություն կայուն ապագայի համար, արդեն իսկ խոսում է ծրագրի արդյունավետության մասին:

Միայն այն հանգամանքը, որ ծրագիրը գործում է կրթահամալիրի կրտսեր, միջին և ավագ դպրոցներում, և նրանում ընդգրկված են բազմաթիվ տարբեր տարիքային խմբերի պատկանող երեխաներ, խոսում է ծրագրի առավելությունների մասին:

Ծրագրի առավելություններն են.

1. Ծնողի ունեցած վստահությունը ծրագրի կազմակերպման և արդյունավետության նկատմամբ:
2. Երկարացված օրվա ծրագրում աշխատող երեխաների ոգևորվածությունը:
3. Օրվա ճիշտ կազմակերպումը դասավանդողների կողմից և անմիջական մասնակցությամբ:
4. Ծրագրի անվտանգ իրականացումը` հարմարավետ և կրթական գործի զարգացմանը նպաստող պայմաններ` համակարգչային սենյակ, սպորտդահլիճ, լողավազան, լաբորատորիա:
5. Որակյալ և համեղ սնունդ:
6. Սովորողի լրացուցիչ կրթություն:

Ունենալով այս բոլոր առավելությունները՝ երկարացված օրվա ծրագիրը նպատակ ունի զարգացնելու երեխայի ֆիզիկական և մտավոր կարողությունները: Ունենալով ուսումնական նման հարուստ բազա՝ երեխաները այս ծրագրով դասապրոցեսից դուրս զբաղվում են այլ զարգացնող ուսումնահետազոտական աշխատանքներով:

Լրացուցիչ կրթության համաձայն երեխաները հաճախում են սպորտի, դաշնամուրի, երգեցողության, պարի և լողի դասընթացների:

Այս ծրագրի ճիշտ կազմակերպման և հետագա արդյունավետության առաջին նախապայմանը ուսումնական շենքի ապահովումն է: Անմիջական մասնակիցը լինելով կրթահամալիրի Բ-1 և Բ-4 դպրոցներում իրականցվող երկարացված օրվա ծրագրի աշխատանքներին, կարող ենք հավաստել կրտսեր դպրոցների բարեկարգ շենքի առկայության մասին:

Նշելով անմիջական մասնակցության մասին՝ ասենք նաև այն մասին, որ երկրորդ կուրսի ուսանողներս, երկշաբաթյա փորձաշրջանի ժամանակ երկարացված ծրագրում երեխաների հետ ստեղծելով ռոդարիական խաղերը թեմայով ուսումնական նյութեր, մեր ներդրումն ենք ունեցել այս ծրագրում:

Իսկ այդ ընթացքում երեխաների և ուսուցիչների հետ ունեցած հարցազրույցներից կարող ենք վստահորեն անել այն հետևությունը, որ ծրագիրը գործում է ըստ նպատակի, այսինքն իր գործունեությամբ նպաստում է կրթական գործի զարգացմանը, որը բխում է երեխայի պահանջներից, ցանկություններից և շահերից: