Սոնա Թորոսյան

Ցանկացած դասապրոցես արդյունավետ է, եթե…

Ցանկացած դասապրոցես արդյունավետ է, եթե այդ ընթացքում յուրաքանչյուր աշակերտ հետաքրքրված է, ուշադիր է, ցանկանում է լսել ուսուցչի հարցադրումները: Էլեկտրոնային գրատախտակը մեզ` դասավանդողներիս և աշակերտների համար մեծ հնարավորություն է ստեղծում իրականացնելու հետաքրքիր և կազմակերպված դասապրոցես: Ուսուցման այս եղանակով բարձրացնում ենք ուսումնառության արդյունավետությունը, հնարավորություն ենք ստանում իրականացնելու նոր մոտեցումներ, ստեղծել նոր աշխատանքներ` էլեկտրոնային տարբերակով: Ցանկացած աշակերտի և դասավանդողի համար գրավիչ են գրատախտակի վառ գույները, դիպչող սենսիտիվ էկրանը: Ուստի ես իմ առջև խնդիր եմ դրել ստեղծելու էլեկտրոնային առարկայական ուսումնական նյութեր, որոնք ավելի գրավիչ, հետաքրքիր, հետևապես ավելի ընկալելի կլինեն աշակերտների կողմից: Երբ «Երկրաչափություն» առարկայից ստեղծեցի «Անկյուններ» թեման և ներկայացրի աշակերտներին, տեսա նրանց ակտիվությունն ու դասապրոցեսին մասնակցելու մեծ ցանկությունը: Որոշեցի շարունակել ստեղծել տեսողական երկրաչափության էլեկտրոնային տարբերակը: Ինձ օգնության եկավ համացանցն իր բազմաթիվ և բազմատեսակ ուսումնական նյութերի առատությամբ, որոնք սակայն ներկայացված են օտար լեզուներով: Իմ նպատակն էր ունենալ գունեղ, հետաքրքիր, գրավիչ ուսումնական նյութ հայերեն: Յոթերորդ դասարանում «Երկրաչափություն» առարկայից ուսումնասիրվող թեմաներ հիմնականում ներկայացվում են միայն թեորեմների, աքսիոմների տեսքով` առանց ապացույցների: Որոշեցի փորձել ստեղծել յուրաքանչյուր թեմայի պարզագույն մոդել:

Այս աշխատանքի մեջ ներգրավեցի յոթերորդ դասարանի աշակերտներին: Նրանց մի մասը մեծ ցանկություն ունեցավ մասնակցելու այս աշխատանքներին: Աշակերտներից ոմանք բավականին հմուտ կերպով սկսեցին աշխատել: Նախընտրելով խմբային աշխատանքը` 4-5 աշակերտների հանձնարարեցի նախ և առաջ մուտքագրել թեորեմները, սահմանումները և համապատասխան գծագրերը: Յուրաքանչյուր թեմա ստեղծվում է իմ և ՏՀՏ մասնագետի խորհրդվատվությամբ: Աշակերտը մշակում է նյութը, ես ստուգում եմ, որից հետո աշակերտն է որոշում այն ծրագիրը, որով ուզում է պատրաստել ուսումնական նյութը: Համակարգչով աշխատելիս աշակերտներին օգնում է նաև ՏՀՏ մասնագետ Սոնա Խաչատրյանը: Միևնույն թեման հանձնարարել եմ մշակելու 7-րդ դասարաններում սովորող աշակերտների տարբեր խմբերի: Նախընտրելի կլինի այն աշխատանքը, որն ավելի գրագետ, ճշգրիտ և գեղեցիկ կլինի ներկայացված: Աշակերտները հաճույքով են ստեղծում այս աշխատանքները: Առաջին հերթին` նրանք սիրում են զբաղվել համակարգչով, երկրորդ հերթին` այդ աշխատանքները գնահատվում են ուսուցչի կողմից, և դրանք կարող են դառնալ ուսումնական էլեկտրոնային նյութ իրենց իսկ ընկերների համար: Եվ երրորդն այն է, որ աշխատելու ընթացքում ծանոթանում են համակարգչային հետաքրքիր և նոր հմտությունների հետ: Այս նյութերը ստեղծելու նպատակն է ունենալ աշակերտներին ավելի տեսանելի, հասկանելի, պարզ, գունազարդ և հետաքրքիր թեմաներ: Սրանք աշակերտների և իմ համատեղ աշխատանքի արդյունք կլինեն:

Համացանցում երբ ուսումնասիրում էի SMART տեխնոլոգիաներով ստեղծված ուսումնական տարաբնույթ նյութերը, տեսա, թե որքան պարզ, ըմբռնելի, հետաքրքիր և գունեղ են այդ աշխատանքները: Իսկ ինչո՞ւ մենք չստեղծենք և չունենանք նմանօրինակ աշխատանքներ, եթե ունենք այդ հնարավորությունը:

Ես պետք է իմ շնորհակալությունը հայտնեմ մեր սիրելի տնօրեն տիար Բլեյանին, որը ստեղծել է մեզ համար այս հնարավորությունը`ստեղծագործելու, զարգանալու և ավելի հետաքրքիր դարձնելու մեր մանկավարժական աշխատանքը։