Նաիրա Դալուզյան

Էլեկտրոնային գրատախտակը դասարանում

 Ուսուցումը պետք է լինի կենդանի, հետաքրքիր, գունավոր և ուրախ: Եթե մենք ուզում ենք, որ մեր երեխաները սովորեն, հետազոտեն և հաճույք ստանան ուսումնական գործընթացից, պետք է ոչ մի ջանք չխնայենք դրան հասնելու համար: Երեխային առաջ մղողը հետաքրքրությունն է, խաղը և խաղի միջոցով նոր հմտություններ ձեռք բերելու պահանջը:
Թվում է, թե դասարանում էլեկտրոնային գրատախտակ ունենալը  մեծ շռայլություն է դպրոցի և ծնողի համար: Բայց եթե հաշվի առնենք, թե որքան արդյունավետ է այն դարձնում ուսումնական գործնըթացը, մնացած բոլոր մտահոգությունները անհետանում են:

Երբ գրատախտակը հայտնվեց մեր դասարանում, ծնողներին անհանգստացնում էր, թե արդյոք այն չի վնասի երեխաների տեսողությանը: Շուտով համոզվեցինք, գրատախտակը ճառագայթ չի արձակում և անվնաս է տեսողության համար: Բացի այդ, մենք ունենք աչքերի համար նախատեսված մի շարք վարժություններ, որոնք կատարում ենք դասերի ընթացքում: Գրատախտակի և դրա հետ դասարանում դրված համակարգչի օգնությամբ մեր դասարանի երեխաները գործնականում տիրապետում են համակարգչային անհրաժեշտ ծրագրերի, կարողանում են օգտվել համացանցից, իրենց ինտերնետային հասցեներից, գիտեն Notebook ծրագիրը: Նրանք այս ամենը սովորել են այն ժամանակ, երբ ես կամ երեխաներից մեկը ինչ-որ աշխատանք է արել էլեկտրոնային գրատախտակով, իսկ մյուսներն այդ ամենին հետևել են մեծ էկրանի միջոցով: Նրանք այդ ամենը սովորել են աննկատ և անընդհատ գործունեության մեջ, քանի որ ուսումնական գործընթացը հիմնականում կազմակերպվում է էլեկտրոնային գրատախտակով: Երեխաները տեսողական հիշողության շնորհիվ կարողանում են ընկալել, հիշել և սովորել մի շարք համակարգչային ծրագրեր և դրանք կիռարել ուսումնական գործունեության ընթացքում:

Օտար լեզուների ուսուցման համար էլեկտրոնային գրատախտակը ամենաարդյունավետ միջոցն է: Կան շատ on-line խաղեր, դասեր, որոնք հնարավորություն են տալիս  ոչ միայն տեսնել և կարդալ բառերն ու արտահայտությունները, այլ նաև լսել օտար լեզվով արտասանվող բառեր:

Էլեկտրոնային գրատախտակով կազմակերպվող խաղ- դասերը բազմաբնույթ են, բազմաբովանդակ, գունավոր, կենդանի երեխաների մեջ առաջացնում են մեծ հետաքրքրություն և սեր  դասավանդվող առարկաների հանդեպ: Գրատախտակով ուսուցանվող դասերի  ընթացքում երեխաները բավականին ակտիվ են, քանի որ իրենք ինքնուրույն գտնում են առաջադրանքի լուծումը և հնարավորություն ունեն մատիկներով գրատախտակի էկրանին սեղմելով` ստուգելու պատասխանները, կարողանում են տեղաշարժել պատկերները, դասավորել  բառերը, թվերը: Այս ամենի շնորհիվ երեխաները հեշտությամբ և արագ յուրացնում են ուսուցանվող նյութը:

Էլեկտրոնային գրատախտակով ուսուցումը հնարավորություն է տալիս դասարանում կազմակերպել խմբային աշխատանքներ, հաճախ ինքնուրույն օգտվել համացանցից, նայել կրթահամալիրի կայքը և այն դարձնել ուսումնական նյութ: Notebook ծրագիրն ունի հետաքրքիր  պատկերներ, խաղեր և դասեր, որոնց օգնությամբ կարելի է կազմակերպել ինտեգրված դասընթացներ: