Քրիստինե Ասատրյան

Աշխարհագրության ուսումնական նյութեր էլեկտրոնային գրատախտակի համար

«Մխիթար Սեբաստացի»  կրթահամալիրում դասավանդման գործընթացում լայնորեն կիրառվում են թվային տեխնիկական միջոցները, որոնք առավել հետաքրքիր և արդյունավետ են դարձնում ուսումնական գործընթացը:  9-րդ դասարանում այս տարվա ծրագրով նախատեսված է ուսումնասիրել Հայաստանի Հանրապետությունը և Հայկական լեռնաշխարհը: Որոշեցինք էլեկտրոնային դասեր պատրաստել 9-1 դասարանի սովորողների  հետ: Հաշվի առնելով այն հանգամանքը, որ դասարանում իրականացվում է նոր ծրագիր` նոթբուքը և էլեկտրոնային գրատախտակը դասարանում, համագործակցելով միջին դպրոցի ՏՀՏ մասնագետ Սոնա Խաչատրյանի հետ` սկսեցինք պատրաստել էլեկտրոնային ուսումնական նյութեր: Դասարանը բաժանեցինք  խմբերի` յուրաքանչյուր խումբը կազմված է 2-3 սովորողներից: Խմբերը  կազմելիս նկատի  ունեցանք սովորողների համակարգչային ծրագրերի իմացությունը, աշխարհագրական գիտելիքները և իրար հետ համագործակցելու կարողությունները: Աշխատանքը բաժանվեց խմբերի միջև: Խմբերի ներսում նույնպես կատարվեց աշխատանքի բաժանում: Տարբեր խմբերի աշխատանքների արդյունքում պետք է ստեղծվեին ամբողջական ուսումնական նյութեր:

Այս խմբային հետազոտական աշխատանքի արդյունքում մենք առաջին կիսամյակում  պատրաստել  ենք  Հայկական  լեռնաշխարհի  մասին էլեկտրոնային ուսումնական նյութ: Այն  իրենից  ներկայացնում  է.

• տեղեկություններ    ընդհանուր  լեռնաշխարհի  մասին
• Google Earth ծրագրի միջոցով  տիեզերքից  ստացված  հայկական լեռնաշխարհի  պատկերներ
• Fotoshop ծրագրի  միջոցով խաղ` լեռնաշղթաների վերաբերյալ:

Խաղի էությունը հետևյալն  է.  քարտեզի վրայից հանել ենք բոլոր լեռնաշղթաները, տեղադրել ենք ներքևում:  Notebook ծրագիրը   հնարավորություն  է տալիս ներքևում  տեղադրված լեռնաշղթաների  անվանումները տեղադրել  քարտեզի  վրա:
Հաջորդ ուսումնական նյութը վերաբերում է հայկական  լեռնաշխարհի գետերին և լճերին:

• PawerPoint ծրագրով  ստացել  ենք նյութ` հայկական  լեռնաշխարհի գետերի և լճերի  մասին
•  օգտվել  ենք  ինտերնետից` տեղադրելով  համապատասխան  նկարներ
•  գետերի  և  լճերի  համար ստեղծել ենք  նույնատիպ  խաղ,  ինչ որ լեռնաշղթաների համար էինք ստեղծել
•  նյութը հարստացրել ենք`  ներկայացնելով հայկական բնօրրանի մասին տեղեկություններ:

Մյուս խաղը կենդանական աշխարհին է վերաբերում: Գրված են մի շարք կենդանիների անուններ, որոնք կան հայկական լեռնաշխարհում: Ներքևում երկու պտտվող շրջանակներ են, որոնցից առաջինում գրված է` կանհայկականլեռնաշխարհում, երկրորդինում` չկան: Եվ երբ սովորողը ինքնուրույն տեղադրում է կենդանիների անունները շրջանակներում, պարզ է լինում` ճիշտ է ինքը, թե ոչ: Ուսումնական նյութն ավարտել ենք հայկական սփյուռքի մասին նյութերով:

Տեխնոլոգիաները դարձրել են ուսուցումը հետաքրքիր, բովանդակալից, արդյունավետ, ինչը հնարավորություն է տալիս կարճ ժամանակում մեծ ինֆորմացիա ստանալ  (մեկ  դասաժամի  ընթացքում ամբողջությամբ ծանոթանալ հայկական լեռնաշխարհի   հետ) և որ ավելի կարևոր է` այդ ինֆորմացիան ձեռք բերել ինքնուրույն հետազոտական աշխատանքի միջոցով:

Երկրորդ կիսամյակի ընթացքում սկսեցինք աշխատել  Հայաստանի Հանրապետության մասին էլեկտրոնային ուսումնական դասընթացի պատրաստման վրա: Այն  ստեղծվել է աշխատանքի կազմակերպման ներկայացված սկզբունքով: Այստեղ օգտվել ենք Excel-ծրագրից, որն ավելի հարմար էր սեռատարիքային և ազգային դիրագրամաներ կազմելու համար:

Քանի որ դասագրքային նյութերի և´ լեզուն, և´ բովանդակությունը  շատ խրթին են, էլեկտրոնային ուսումնական նյութեր ստեղծելու համար  օգտագործում ենք ինտերնետային և ոչ ինտերնետային  լրացուցիչ աղբյուրներ: Այժմ ընթացքի մեջ է, և մինչև մայիսի վերջ իր ավարտին կհասցնենք Հայաստանի Հանրապետության մարզերի և Լեռնային Ղարաբաղի վերաբերյալ էլեկտրոնային ուսումնական դասընթացը: