Աշոտ Բլեյան

Գլխավորը` իրական հետազոտական աշխատանքի անընդհատ ընթացքն է

Կրթահամալիրում իրականացվող (մշակվող ու ներդրվող) մանկավարժական ծրագրերի հեղինակների (դասավանդողներ, սովորողներ ու նրանց ծնողներ) հերթական (չորրորդ) Հավաքը սկսվեց… Հիմա`

• երբ հնգօրյա Հավաքի յուրաքանչյուր օրվա հինգժամյա աշխատանքի բովանդակությունն ու կարգը հայտնի են.
  
• երբ հրապարակված են Հավաքին ներկայացված բոլոր զեկուցումները (տե՛ս «Դպիր» ամսագրի հատուկ թողարկումը).
• երբ Հավաքի աշխատանքային նիստերի և ցուցադրության վայրը` կրթահամալիրի մեդիա-մշակույթային կնտրոնը այնքան սիրով և խելամիտ պատրաստված է.
• երբ մեդիա - մշակույթային կենտրոնում այսքան խնամքով ցուցադրված են մեր ուսուցման արդյունքում ստեղծված իրերն ու էլեկտրոնային նյութերի նմուշները.
• երբ ամեն  Հավաք մի կարևոր, այո՛, ծիսական նշանակություն ստացող, ավելի ու ավելի կարևորվող հանգրվան է դառնում.
• երբ Հավաքին ներկայացված վեց տասնյակից ավելի զեկուցումները, կրթահամալիրի  հեղինակների աշխատանքներից ցուցադրված մոտ 150 ցուցանմուշը, ինը բեմական ելույթը,  տասը ֆիլմը Հավաքի կողմից, վստահ եմ, կարժանանան պատշաճ վերաբերմունքի.

ի՞նչ է մնում ինձ ավելացնել այս ամենին, որպես մեր ավանդական հավաքի ավանդաբար ասվող կրթահամալիրի տնօրենի բացման–ողջույնի, միով բանիվ՝ Հավաքի գլխավոր խոսք:

Կեցցենք մենք, որ այսքան լուրջ ենք մոտենում մեր ստեղծական - հետազոտական աշխատանքի ներկայացմանն ու գնահատմանը: Մեր Հավաքի այսպիսի կազմակերպումն, այո՛, մեր հավաքական ուժի յուրատեսակ ցուցադրություն է,  երբ առանց ուսումնական բնական գործունեությունը վնասելու, թվում է, բոլորս ենք Հավաքի ակտիվ մասնակից (կազմակերպիչ): Ինձ հուզեց ձեր` հեղինակների ու հեղինակային խմբերի ներկայացման (ցուցադրության ջանքերը) քննարկումները,  աջակցությունը մեդիա կենտրոնի շիննորոգման, բարեկարգման  աշխատանքներին, ցուցադրությունը որպես կոլեկտիվ նախագիծ իրականացնելը... և այս ամենը՝  գործընկերության մշտական ռեժիմում: Ինչպես մեր սիրելի Գայանե Վաղարշակովնան երեկ ասաց ինձ հասկանալի օտար լեզվով` мне это всë будоражыло. Շնորհակալ եմ, ու կեցցե՜ք:

Գլխավորը` իրական, հետազոտական աշխատանքի ընթացքն է` անընդհատ, իր բնական   հանգրավաններով: Հաջորդ հանգրվանը ուսումնահետազոտական ճամբարների գործունեությունն է`հունիսի 1-ին սկսվող, «Ժանգոտ դդում» փառատոնն է` հունիսի 10-ին սկսվող, տեխնիկական ստեղծագործության ստուգատեսը` հունիսի 17-ին սկսող, Կարինե Մացակյանի ստեղծագործական ցուցադրությունը` հունիսի 10-ին սկսվող:  Մեր հետազոտական- ստեղծական աշխատանքն իրական է ու անընդհատ, քանզի կրթահամալիրում իրականացվող կրթական ծրագիրը մեր կյանքն է`սովորողների և սովորեցնողների համատեղ ուսումնահետազոտական աշխատանքի պայման է և արդյունք: Եվ ինչպես ինքը` կյանքը, անընդհատ է և իրական: