Մինասյան Սոնա

Ինքնակրթությունը կրթահամալիրում

Դպրոցը ինձ (և մեզ բոլորին) հնարավորություն է ընձեռել զբաղվելու իմ սիրած` իմ կյանքի նպատակի իրականացմամբ` ուսումնասիրելու իմ սիրած լեզուն, Չինաստանի մշակույթը, պատմությունը: Հնարավորություն ընձեռել ասելով՝ նկատի ունեմ.

1. դպրոցում ձեռք բերած համակարգչային գրագիտությունը, և այն, որ մեզ մղում են համացանցում որոնումներ անելու ամենատարբեր առարկաների համար նյութեր փնտրելիս,
2. օտար լեզուների ուսուցման մոտեցումները,
3. կրտսեր դպրոցից սկսած՝ մեր սիրած գործունեությամբ զբաղվելու հնարավորությունը.
4. ավագ դպրոցում անհատական ուսումնական պլանով աշխատելու կարգը:

Ես 1-ին դասարանից ուսումնասիրել եմ համակարգչային ծրագրեր, ինչն էլ խթան հանդիսացավ, որ կարողանամ ինտերնետային ցանցով գտնել ինձ հետաքրքրող երկրին` լեզվին, պատմությանը, մշակույթին վերաբերվող հարցերի պատասխանները:
 
Դեռ մանկուց ես երազել եմ լինել Չինաստանում, բայց առանց լեզվի իմացության հնարավոր չէ ճանաչել երկիրը: Ես ունեցել եմ այնպիսի ուսուցիչներ, որոնք այնպես են կարողացել մատուցել իրենց առարկան, որ ինձ մոտ սեր առաջացավ դեպի լեզուները: Դրա համար էլ ես 7-րդ դասարանից սկսեցի մասնակցել հայոց լեզվի, ռուսաց լեզվի, անգլերենի և պատմության մասնագիտական դասերին: Բացի դրանից հաճախում էի նաև Հեռակա դպրոց` աշխարհագրություն, կենսաբանություն, պատմություն, անգլերեն, հ.լեզու, ռ.լեզու առարկաների ստուգումներին, ինչն օգնեց ավելի խորացնել իմ գիտելիքները:
 
Ինքնուրույն, իհարկե, հնարավոր չէ սովորել այդքան բարդ լեզուն, ինչպիսին չինարենն է: Որոշեցի հաճախել Հումանիտար համալսարան, որտեղ դասավանդում են չին ուսուցիչներ: Ինձ ժամանակ էր հարկավոր այնտեղ սովորելու համար: Ավագ դպրոցում մեզ հնարավորություն տրվեց դպրոց հաճախելու անհատական ուսպլանով:
 
Անհատական ուսումնական պլանով ես սովորում եմ և՛ չինարեն, և՛ ռուսերեն, և՛ անգլերեն լեզուները, քանի որ շփումը ուսուցչիս հետ հիմնականում այդ լեզուներով է:
 
Դրան զուգահեռ չինացիներին ծանոթացնում եմ Հայաստանի մշակույթի և պատմության հետ` հենց այդ լեզուներով:
 
Ես կարծում եմ, եթե յուրաքանչյուր  մարդ ընտրի այն մասնագիտությունը, որը նա սիրում է և ունենա կողքին այնպիսի մարդ, որը ճիշտ ժամանակին կօգնի իրեն, ապա երջանիկ, օգտակար և կայացած մարդկանց թիվը աշխարհում շատ ավելին կլինի: