Գայանե Յազիչյան

Օտար լեզուները որպես ուսումնահետազոտական աշխատանքի միջավայր

Հնարավոր է, որ մեր ժամանակակիցներից շատերի համար դպրոցը ընդամենը հասարակական ինստիտուտ է, որի խնդիրը նոր սերնդի ուսուցումն է: Բայց մեր ուսուցիչների, սովորողների, և ինչու չէ, ծնողների համար դպրոցը դարձել է յուրահատուկ մթնոլորտով մի տուն, տիեզերք, որը բաց է համամարդկային արժեքների առաջ. հաջողություններ, իմացումի հրճվանք, ստեղծագործական երևակայության թռիչք: Մեր նպատակն է ձևավորել այնպիսի անհատ, որը կլինի ազատ, մարդասեր, կունենա անկախ մտածողություն, կկարողանա ինտեգրվել, ապրել և գործել ժամանակակից հասարակության մեջ: Սա է պատճառը, որ կարևորում ենք օտար լեզվի հնարավորինս լավ իմացությունը: Ըստ կրթակարգի, միջնակարգ հանրակրթական դպրոցի շրջանավարտը պետք է կարողանա հաղորդակցվել առնվազն երկու օտար լեզուներով, օգտվել հաղորդակցական ժամանակակից տեխնոլոգիաներից, ճանաչի համամարդկային քաղաքակրթության նվաճումները, հարգի համամարդկային արժեքները:

Սա շատ կարևոր պահանջ է, քանի որ այսօրվա սոցիալական իրավիճակը շրջանավարտից պահանջում է տիրապետել այնպիսի միջոցների, որոնք  կօգնեն նրան պաշտպանել իրեն և զարգանալ, որպես անհատի:

Օտար լեզուների ուսուցումը ուղղված է ոչ միայն գիտելիքների ձեռքբերմանը, այլ հոգևոր ու ներդաշնակ մարդու ձևավորմանն ու զարգացմանը: Այդ իսկ պատճառով օտար լեզուները մեր կրթահամալիրում դիտվում են որպես գործիք, որի միջոցով սովորողը կատարում է ուսումնահետազոտական աշխատանք, հաղորդակցվելով  այլ երկրների և ժողովուրդների քաղաքակրթությանն ու մշակույթին, յուրացնում լավագույն արժեքները և ներկայացնում հայ մշակույթը այլ ժողովուրդներին: Ուսումնահետազոտական աշխատանքները, որոնք կատարվում են օտար լեզվի ուսուցիչների և սովորողների համատեղ ջանքերով, թույլ են տալիս հասնելու այս նպատակներին: Ուսումնահետազոտական աշխատանքը օտար լեզուների կիրառությամբ իրականացվում է կոնկրետ նախագծերի միջոցով` իրենից ներկայացնելով ուսումնառության մի նոր փուլ: Այն հնարավորություն է տալիս սովորողների ուսումնական գործընթացը ուղղորդել, նպաստել աշխարհընկալման ընդլայնմանը, ներգրավել յուրաքանչյուր դպրոցականի, որը ուսումնասիրում է, հետազոտում և վերափոխում շրջապատող աշխարհը իր մասնակցության հնարավորությունների չափով: Այս աշխատանքները էլեկտրոնային ցուցադրությունների տեսքով ներկայացվում են ուրբաթօրյա հանդեսներին: Օգտագործվում են թվային տեխնիկայի տարբեր միզոցներ` համակարգիչ, էլեկտրոնային գրատախտակ, ֆոտո և տեսախցիկներ, ձայնագրիչ և այլն: Ստեղծվում են և ներկայացվում նաև ֆիլմեր, որտեղ արտացոլվում են աշակերտներին հուզող ժամանակակից  խնդիրներ:

Գաղտնիք չէ, որ կրթության հաջողությունը անմիջականորեն կապված է լեզուների իմացության և լեզվական հաղորդակցության մշակույթի հետ: Այսօր մենք չունենք այն միջավայրը, որը կապահովեր հաղորդակցական հմտությունների (բանավոր խոսքի) զարգացումը. աշակերտները ստանում են անհրաժեշտ տեղեկատվությունը հիմնականում տպագիր և մեդիա աղբյուրներից, որոնում, գտնում և թարգմանում են անհրաժեշտ նյութերը, որոնք օգտագործվում են նաև այլ առարկաների դասաժամերին: Այս գործունեությունը նպաստում է և օտար լեզուների կիրառության հմտությունների ձեռքբերմանը, և մայրենի լեզվի մշակույթի զարգացմանը և գիտելիքների հարստացմանը:

Սովորողների նախասիրությունների զարգացման հանրապետական ստուգատեսները և ամառային, ձմեռային բաց ուսումնահետազոտական ճամբարները հնարավորություն են տալիս մեր աշակերտներին ներկայացնելու իրենց ձեռքբերումները:

Օտար լեզուների ուսուցիչները  ևս կատարում են հետազոտական աշխատանք, որը նրանց  մասնագիտական գործունեության կարևոր բաղկացուցիչն է: