Կարո Մանդալյան

Ուսումնահասարակական նախագիծ. կենդանաբանի դպրոց

Սեպտեմբեր ամսին մշակվեց նախագիծ` արհեստագործական դպրոցում կենդանաբանի դպրոց հիմնելու մասին: Դպրոցական ակումբի անդամներով քննարկեցինք, աշխատանքի բաժանում արեցինք և անցանք գործի: Այդ ուղղությամբ կատարվել են հետևյալ աշխատանքները.
ներքին բակում փորվել է ձկնավազանի փոսը,
վերանորոգվել են կենդանիների վանդակների համար նախատեսված սենյակները,
փոխվել են բոլոր դռներն ու լուսամուտները,
և աշխատանքները շարունակվում են:

Կենդանաբանի դպրոցում սովորողը ձեռք կբերի նոր հմտություններ, այդ թվում՝ ՏՀՏ հմտություններ: Կենդանաբանության ուսուցումը հիմնականում լաբորատոր ուսումնասիրությունների և գործնական աշխատանքների հիման վրա կկազմակերպվի:

Կենդանաբանի դպրոցը սովորողին կարող է տալ ինչպես ընտանի, այնպես էլ վայրի կենդանիների, էկզոտիկ թռչունների պահվածքի, կերակրման, բազմացման, բուժման, սանիտարահիգիենիկ վիճակի մասին գիտելիքներ, նրանց խնամքի և բազմացման համար անհրաժեշտ հմտություններ: Սովորողները մասնակցում են ազատավանդակների պատրաստման աշխատանքներին և ձևավորմանը, նոր գիտելիքներ են ձեռք բերում ոճի ու դիզայնի առումով: Այս և այլ ուսուցանվող գիտելիքները նրանք կարող են օգտագործել սեփական փոքր գյուղատնտեսական ֆերմաներ, ակվարիումային տնտեսություններ, էկզոտիկ թռչունների բուծարաններ հիմնելու համար:

Այս ուսումնական կենտրոնը ենթադրում է սովորողների ամենօրյա և անվտանգ շփում կենդանիների ու թռչունների հետ, արթնացնում է սեր դեպի վայրի բնությունը: Կենտրոնի աշխատանքին մասնակցում են ոչ միայն արհեստագործական, այլև կրտսեր դպրոցների՝ «Տեխնոլոգիա» առարկայի շրջանակում կենդանիների խնամք, «Բույսերի և կենդանիների խնամք» ընտրությամբ գործունեություն սովորողները: Դպրոցական այս տարիքում սովորողները, մոտիկից ճանաչելով վայրի բնությունը, սկսում են հասկանալ և սիրել այն, դառնում են ավելի բարի ու հոգատար:

Մեր դպրոցում յուրաքանչյուր սովորող կուսումնասիրի Հայաստանի և համաշխարհային «Կարմիր գիրքը», որն ավելի մանրամասն տեղեկություններ կտա նրան:

Կենդանաբանի դպրոցում  կարող են ընդգրկվել բոլոր դպրոցահասակ երեխաները, և նրանք, ովքեր ընտրել են մեր կրթահամալիրի ծրագիրը:   

Նոր ուսումնական տարում կենդանաբանի դպրոցը,  պատրաստ կլինի տալու նաև կենդանաբույծի մասնագիտական կրթություն, և գիտելիքների այդ իմացությամբ սովորողը  կարող է ունենալ կայուն աշխատատեղ: Դպրոցը կարող է նաև կողմնորոշել սովորողին շարունակելու կրթությունը բարձրագույն ուսումնական հաստատություններում: