Կարինե Մացակյան

Արհեստավորի մասնագիտական և նախամասնագիտական պատրաստություն

Արհեստավորի մասնագիտական պատրաստության ծրագիրը կրթահամալիրում ամեն տարի լրացվում և մշակվում է: Արհեստանոցները, մասնագիտական անհրաժեշտ միջավայրը ստեղծելուց հետո 2008-2009թթ ուստարվա  ծրագրում կատարվեցին որոշ փոփոխություններ. տեղ գտան   հետևյալ  պարտադիր  առարկաները` գծագրությունը, գծանկարը, համակարգչային գրաֆիկան, ընդ որում, վերջինս  միտված է  սովորողներին տալու մասնագիտական ժամանակակից մոտեցում: Վերը նշված  պարտադիր դասընթացները  իրականացվում են հենց արհեստագործական դպրոցի  դասավանդողների կողմից, որոնք  ունեն բավարար հմտություններ և պարբերաբար  վերապատրաստվում  են:

Արդյունքում` սովորողները  սկսել են  տիրապետել  տարածական մտածողությանը,  գունային տեխնիկային և  վիրտուալ  մոդելավորման սկզբունքներին:

Ինչ վերաբերում է  ուսուցիչներին,  նրանք  էլ իրենց հերթին  իրենց սաների  օրեցօր  աճող  մակարդակն ապահովելու համար անընդհատ զբաղվում են  ինքնակրթությամբ և  ինքնակատարելագործմամբ` օգտագործելով համակարգչային տեխնիկան, ինտերնետը, հարակից  դպրոցների  մասնագետների փորձը:

Ամենակիրառական համակարգչային  ծրագիրը «PHOTOSHOP»-ը  սովորել են  բոլոր  ուսանողները և  աշակերտները` այն լայնորեն օգտագործելով  իրենց  արհեստների նմուշները  վիրտուալ  մոդելավորելու համար: Օրինակ` դիմահարդարն  այն  օգտագործում  է մարդու դեմքին փոփոխություններ և շպար անելուց առաջ:

Խոհարարին  «PHOTOSHOP»-ը  օգնում է սեղանը ձևավորելիս, գորգագործը նկարում է  ապագա գորգը և ընտրում  գույները, վարսահարդարը  որոշում է սանրվածքն և  մազերի գույնը, հարմարեցնում դեմքին, ոսկերիչը կատարում է  զարդերի  էսքիզները:

Բայց «PHOTOSHOP» ծրագիրը լինելով լայն պրոֆիլի օգտագործման համակարգչային  ծրագիր, երբեմն  չի բավարարում մասնագիտական  նեղ  պահանջներին: Ճիշտ է, այն  արդեն  տվել է իր դրական արդյունքը, բայց,  օրինակ, ռադիոմասնագետին   իր մասնագիտության մեջ  չի կարող օգնել: Շատ  դեպքերում օգնում է  մինիմալ  մոդելավորման համար: Դրա համար  քննարկելով այս բացը, առաջարկում եմ հաջորդ  ուստարում որպես նեղ  մասնագիտացված  մոդելավորող  ծրագրեր, արհեստագործական դպրոցում ներդնել`
1.Google sketehup (գծագրական 3D  ծրագիր )       
2.JewelaryCD (Զարդերի մոդելավորման 3D ծրագիր)
3.Elektronics Workbench (էլ. սխեմատեխնիկայի լաբորատորիա) և նմանատիպ  ծրագրեր:

Կարծում եմ, որ հերթական վերապատրաստումը ՏՀՏ մասնագետներին կօգնի, որպեսզի նրանք ավելի մատչելի դարձնեն դասապրոցեսները: Ծանոթ լինելով այդ ծրագրերին՝ դասավանդողները հեշտությամբ կփոխանցեն ուսուցանվող նյութը: Ինտերակտիվ գրատախտակի մուտքը կրթահամալիր լուծեց մի շարք խնդիրներ. այսպես, օրինակ` նա վերը նշված էլեկտրոնային ծրագրերը (2D, 3D) ավելի տեսանելի և ցայտուն դարձրեց, ձեռքի գործիքներին փոխարինեցին էլեկտրոնային գործիքները: Եթե սովորաբար գործածում էինք ավանդական քանոնը, մատիտն ու ռետինը, գծագրական հատուկ թղթերը, ապա այժմ դրանք արագորեն փոխարինվեցին էլեկտրոնային գրատախտակի ներսում գտնվող գործիքներով:

Ավելորդ չեմ համարում նշել, որ նորաբաց գծանկարի կաբինետը, որը  ղեկավարում եմ ես, շատ օգնեց  ոսկերիչ ուսանողներին  ձեռք բերելու  իրենց մասնագիտության մեջ  կոնստրուկտիվ մտածելակերպ: Վերը շարադրված  միջոցառումների իրականացման  արդյունքում ստեղծված  միջավայրը նպաստեց  և  նպաստելու է  կենցաղում հասարակական  վայրերում կիրառվող աքսեսուարների ստեղծման այլընտրանքային տարբերակի կիրառմանը: Արդյունքում  ունեցել ենք  մոդեռն ջահեր,  տոնածառ,  դիմակներ,  արդուզարդ,  ներքին ինտերյերի  ձևավորում,  մոդեռն պահարաններ,  հայտարարությունների   ցուցափեղկ գրադարակներ, ծաղկի պատվանդաններ և այլն:

Ուրախալի է  Մեդիա–մշակութային կենտրոնի ստեղծումը: Այն իր մեջ ներառում է կինո-ֆոտո դպրոցը, դիզայն-լաբորատորիան, գործում է ծաղկի խանութ-սրահը: Մեդիա-կենտրոնը հնարավորություն է տալիս ստեղծելու ուսումնառության արդյունքում ստեղծված նյութական արժեքների (այդ թվում՝ արհեստավոր սովորողների ստեղծած) մշտական ցուցադրություն, կազմակերպել դրանց վաճառքը: Այստեղ կատարվում են նկարահանումներ, կազմակերպվում են կրթահամալիրում աշխատող-սովորող և նրանից դուրս աշխատող արվեստագետետների աշխատանքների անհատական և խմբային ցուցահանդեսներ:

Մեդիա կենտրոնը սերտ համագործակցում է կրթահամալիրի բոլոր դպրոցների հետ, օգնում նոր մոդելների ստեղծմանը, ձևավորում և առաջարկում նոր լուծումներ:

Կենտրոնը իր գործունեությամբ նպաստում է, որպեսզի կրթահամալիրում ստեղծված յուրաքանչյուր նյութ, ֆիլմ, արտադրանք վերջնական և որակյալ տեսքի բերվի: