Նաիրա Դալուզյան

Առաջադրանքների փաթեթ հատուկ կարիքով սովորողների համար

Վերջին տարիների ընթացքում Կրթական օրենքի համաձայն հատուկ կարիք ունեցող երեխաները հայտնվեցին հանրակրթական դպրոցներում: Փաստն ինքնին շատ ողջունելի է, քանի որ չի կարելի մարդուն մեկուսացնել շրջապատող աշխարհից և նրան փակել տանը կամ հատուկ դպրոցում: Բայց…Դպրոցները պատրաստ չէին ընդունելու այդ երեխաներին ո’չ իրենց շենքային պայմաններով և ոչ էլ մեթոդական պատրաստվածությամբ:

Դպրոցների մեծ մասը մինչև հիմա էլ չունեն աստիճանահարթակներ, չունեն հոգեբան, լոգոպեդ, հատուկ մանկավարժ: Չկան ուսումնական նյութեր և մեթոդական ձեռնարկներ այդ երեխաների հետ աշխատող ուսուցիչների համար: Ուսուցիչները չունեն անհրաժեշտ պատրաստվածություն:
Քանի որ մեր կրթահամալիրում օր – օրի շատանում է հատուկ կարիք ունեցող երեխաների թիվը, և  նրանց անհատական ուսուցման  համար անհրաժեշտ են ուսումնական նյութեր, որոնք դժբախտաբար չկան, մենք որոշեցինք ստեղծել տառուսուցման փաթեթ:

Փաթեթը նախատեսված է թույլ մտավոր հետամնացություն ունեցող և մանր մոտորիկայի խնդիրներ ունեցող  երեխաների համար: Նաև այն երեխաների, որոնք չեն կարողանում տառերը հիշել: Փաթեթը կազմված է երկու մասից` աշխատանքային գիրք – տետր  և էլեկտրոնային խաղեր:
Աշխատանքային գիրք – տետրը  նախատեսված է տառուսուցման, ինչպես նաև գույները սովորելու կամ ամրապնդելու համար:  Էլեկտրոնային խաղերը օգնում են ամրապնդելու սովորածը: Պետք է նշել նաև, որ էլեկտրոնային խաղերը երեխաները ավելի մեծ հաճույքով են խաղում, քանի որ դրանք շատ գունավոր են և հետաքրքիր:

Բառերի վերևում կան համապատասխան տառով սկսվող կամ այդ տառը պարունակող  նկարներ, որոնք երեխան ներկում է: Դրանք նաև հուշարարի դեր են կատարում: Երեխան, նկարին նայելով և բառը հեգելով, գտնում է իրեն պետք եկած տառը: Բառերը գրված են այնպիսի տառատեսակով, որ երեխան կարողանա դրանք ներկել: Հաճախակի ներկելով տառերը` զարգանում է երեխայի մանր մոտորիկան, և նա սկսում է հասկանալ տառի գրելաձևը: Սկզբում գրված են միավանկ բառեր, և դրանք հաճախակի կրկնվում են, ինչն էլ նպաստում է, որ երեխան կարողանա մտապահել տառը: Փաթեթը փորձարկվել է կրթահամալիրում, որի ադյունքում կատարվել են որոշակի փոփոխություններ և  լրացումներ: Մի քանի տառ ուսուցանելուց հետո կա կրկնողության համար նախատեսված էջ, որտեղ գրված են բառեր, որոնք երեխան պետք է ոչ միայն ներկի, այլև կարդա:
Փաթեթը կարելի է օգտագործել նաև հինգ տարեկան երեխաների տառուսուցման համար: