Սոնա Աբրահամյան

Ֆիտոդիզայնը տեխնոլոգիայի բաղկացուցիչ և մասնագիտական գործունեություն

Ես աշխատում եմ կրթահամալիրում որպես տեխնոլոգիա, դիզայն դասավանդող՝ ֆիտոդիզայներ:  «Ֆիտո» բառը հունարենից թարգմանաբար նշանակում է բույս:  Հիմա ֆիտոդիզայնը  նորաձև մասնագիտություններից մեկն  է համարվում: Գուցե դրանով է պայմանավորված սովորողների ակտիվ մասնակցությունը այս գործունեությանը և հետաքրքրվածությունը բույսերի, թփերի, նրանց ձևավորման խնդիրներով: Հիմա կրթահամալիրում ֆիտոդիզայնը տեխնոլոգիայի բաղկացուցիչն է: Իմ սաներն են միջին դպրոցի աշակերտները, ավագ արհեստագործականի, նաև` ուսուցիչներ, որոնք ցանկանում են ավելին իմանալ բույսերի խնամքի և նրանց ձևավորման մասին:  Ծրագրի իրականացման նպատակն է  սովորեցնել  ծաղիկների, թփերի մշակումն ու պահպանումը՝ սկսած սերմնադրման պահից մինչև ծաղկման շրջանը: Բույսերի հետ աշխատելիս մարդը դառնում է համբերատար, մեծանում է նրա պատասխանատվության զգացումը, դառնում է ավելի  ուշադիր և հոգատար: «Տեխնոլոգիա» առարկայի դասաժամերին   աշակերտները սովորում են սենյակային բույսերի խնամքը` ջրել, մշակել, կտրոններից բազմացնել և ստանալ նոր բույսեր, պայքարել սնկային հիվանդությունների և միջատների  դեմ:  Սովորողները հստակ կտարբերեն խոնավասեր բույսերը  սուկուլենտներից և հստակ կկարողանան ինտերյերում  ճիշտ տեղադրել բոլորը:  Մյուս նպատակը այգիների տեսակները, այնտեղ տեղադրվող բույսերի տեսականին,  փշատերև բույսերի տեսականին, խնամքը, ինչպես նաև թփերի տեղադրումը, խնամքը և բազմացումը իմանալն է:  Թեև բոլորին այս գործունեությունը գրավում է, սակայն արդեն սովորողների մի խումբ դասաժամերից դուրս էլ զբաղվում է բույսերի հետ կապված մի քանի հետաքրքիր աշխատանքներով: Նրանք ուզում են ավելին կարողանալ, մասնագիտանալ: Հաջորդ ուսումնական տարվա համար ծրագրում ենք իրականացնել բուսաբույծի-այգեգործի մասնագիտական ուսուցում:

Արդեն սովորողների հետ կատարել ենք  ծառատունկ, և´ ներքին բակում, և´ արտաքին բակում փխրեցրել ենք հողը ու նոր տնկիներ դրել, էտել ենք ծառերը և կրապատել, ծաղիկների նոր տեսակներ ենք բերել, տնկել ենք բազմամյա թփեր, որոնք խնամում ենք մեծ սիրով: Իսկ ամենօրյա աշխատանքների շնորհիվ մեր այգին միշտ խնամված և մաքուր է:

Արտաքին բակի մի հատվածի  ասֆալտահանումը ունի մեկ նպատակ` այն դարձնել յուրահատուկ կանաչ գոտի` հետաքրքիր ձևավորումով և հազվագյուտ ծաղկատեսակներով: