Հերբերտ Գևորգյան

Լուսանկարչի մասնագիտական պատրաստություն

Մեր ընտրած մասնագիտական դասընթացների մեջ կա նաև ֆոտոլրագրությունը, որը դասավանդվում է  «World Press Photo - միջազգային ֆոտոլրագրություն» ծրագրով: Այն հիմնված է պրակտիկ պարապմունքների վրա: Թեմաները լինում են ինչպես զուտ տեխնիկական`

• կոմպոզիցիա,
• էքսպոզիցիա, օպտիկա,
• գրաֆիկա,
• ֆոտոյի նկարագրություն,
• լույս և այլն,

այնպես է լ ստեղծագործական`

• մարդը աշխատանքի մեջ,
• դիմանկար, դիմանկար շրջապատում,
• աբստրակտ լուսանկարներ,
• հարաբերություններ,
• պահեր,
• լուրեր և այլն:

Բացի դրանից առանձին ուսումնասիրում ենք հայտնի լուսանկարիչների գործունեությունը` Կառտյե Բրեսսոն, Մարտին Փարր, Լոուրեն Գրինֆիլդ և այլն:

Ծրագրային աշխատանքը բաժանվում է շաբաթական հատվածների: Առաջին հերթին մեզ բացատրվում է տվյալ շաբաթվա թեման, օրինակ, այս շաբաթ դա « դիմանկար շրջակա միջավայրում» էր: Տեխնիկական մանրամասներից և տվյալ թեմայի առանձնահատկություններից հետո մենք դիտում և քննարկում ենք այդ թեմային վերաբերող տարբեր լուսանկարիչների ֆոտոներ՝ ակնարկելով դրանց տեխնիկական լուծումները, կոմպոզիցիան, կոնցեպցիան և այլն:

Այնուհետև 1 կամ 2 շաբաթվա ընթացքում մենք լրացնում ենք այդ թեմայով մեր ֆայլը՝ դասերի ընթացքում քննարկելով մեր առած լուսանկարների թերությունները, տեղի ընտրությունը, առավելությունները, թեման և այլն: Մեր աշխատանքները ցուցադրում ենք ստուգատեսների ժամանակ, կազմակերպում ենք ընթացիկ ցուցադրություններ, բացում ենք էջեր կայքի «Տեսասրահ» բաժնում:

Քննություններ կամ ստուգարքներ հանձնելուց հաշվի է առնվում բոլոր անցած թեմաներով առկա կամ բացակայող ֆայլերը: Պակասության դեպքում մենք պետք է լրացնենք դրանք: