Սրբուհի Աղաբաբյան
  
1-2-րդ դասարանների օտար լեզվի ուսումնական նյութեր ՏՀՏ-ի օգտագործմամբ

2004 թվականից «Մխիթար Սեբաստացի» կրթահամալիրում սկսեցին գործել օտար լեզուների և համակարգչային ծրագրերի խորացված ուսուցմամբ  դասարաններ, որոնց հաջողությունը հետագայում կանխորոշեց ամբողջ կրտսեր դպրոցի ուղղվածությունը: Նպատակը մեկն էր` օտար լեզուները և համակարգչային ծրագրերն երեխայի ուսումնառության ընթացքում օգտագործել որպես միջոց` արդիական կրթություն ստանալու, համացանցից օգտվելը` որպես ժամանակակից ինֆորմացիոն դաշտում մուտք ունենալու հնարավորություն:

1-2-րդ դասարաններում  խնդիր էր դառնում մատուցել լեզվական այն անհրաժեշտ մինիմում բառապաշարը և լեզվական կառույցները, որոնցով նա կկարողանար պարզ նախադասություններով մտքեր ձևակերպել, և որը կօգներ նրան օտար լեզվի հետագա` աստիճանաբար խորացող ուսուցման համար: Այս դասարաններում ուսուցումը կատարվում է բանավոր ձևով և ուսումնական նյութերի բացակայությունը անհրաժեշտություն առաջացրեց ստեղծել իր տեսակի մեջ նոր` գունեղ և զվարճալի նյութեր, որոնք ավելի հետաքրքիր և մատչելի են դարձնում օտար լեզվի ուսուցումը:

Այս ուսումնական նյութերը պարունակում են երեխայի տարիքին և հետաքրքրություններին համապատասխան լեզվական նյութ, որը հնարավորություն է տալիս նրան օտար լեզվով պատմելու իր աշխարհի մասին: Նյութը ներկայացնում է ուսուցանվող անհրաժեշտ լեզվական կառույցները և բառապաշարը: Այնտեղ ընդգրկված թեմաներն ամբողջությամբ կապվում են երեխային շրջապատող աշխարհի հետ (ընտանիք, դպրոց, ընկերներ, խաղալիքներ, գույներ, մարմնի մասեր, կենդանիներ, հագուստ, ուտելիքներ և այլն):

Երեխաները օտար լեզուն սովորում են ակտիվ գործունեության ընթացքում` այդ տարիքի երեխաների աչքին հաճելի պատկերներով, բառային արտասանությունները լսելով, խաղալով, ուրախ երգելով: Մենք միշտ օգտագործել ենք համակարգչային անգլերեն ծրագրերը, online խաղերը: սակայն նոր նյութերի ստեղծման մեջ մեծ դեր խաղաց այս տարի ձեռք բերված էլեկտրոնային գրատախտակը: Այն հնարավորություն տվեց կիրառելու նոր, ավելի մատչելի և ավելի գրավիչ  ուսուցման մեթոդ, որն ավելի արդյունավետ  է դարձնում ուսումնառությունը, որովհետև ավելի հետաքրքիր է երեխաների համար:

Էլեկտրոնային ուսումնական նյութերով ուսուցումը կատարվում է հետևյալ ձևերով:

Բառային աշխատանք
Բառային աշխատանքը օտար լեզվի ուսուցման կարևորագույն բաղկացուցիչն է: Բանավոր աշխատանքի բոլոր ձևերը իրենց մեջ այս կամ այն չափով ներառում են բառային աշխատանքը:
ա. լսում է բառը և միաժամանակ տեսնելով այն գրատախտակի վրա, կրկնում է.
բ.   նայում է նկարին և ասում է բառը` առանց լսելու այն:

Երգ և բանաստեղծություն
Երգերն ու բանաստեղծությունները շատ օգտակար են լեզվի ուսուցման համար: Դրանք դյուրին ընկալվող, կրկնություններ պարունակող, հեշտությամբ մտապահվող, ռիթմիկ ստեղծագործություններ են: Երեխան երգերն ու բանաստեղծությունները սովորում է բնական-գործնական ճանապարհով` տեսնելով երգի կամ բանաստեղծության հերոսներին կամ առարկաներին գրատախտակին, անընդհատ  լսելով և ի վերջո միանալով  դրան: