Նունե Մովսիսյան
Ստելլա  Մնացականյան
Լիանա Հակոբյան

Հեռավար, համագործակցային ուսուցում
                                              

1. «Հիմնական կրթական ծրագրերի հեռավար (դիստանցիոն) և դրսեկությամբ (էքստեռնատով) ուսուցման կարգերը հաստատելու մասին» Հայաստանի Հանրապետության կառավարության որոշում (06 սեպտեմբերի 2007թվականի N 1028-Ն)
2. ՀՀ ԿԳՆ Երևանի «Մխիթար Սեբաստացի» կրթահամալիրի 2009-2012 թթ Զարգացման ծրագիր.   «Այս տարվանից փորձարկվում է հեռավար ուսուցումը  որպես ստացիոնար ուսուցման մեթոդ, երբ սովորողը և դասավանդողը բացի անմիջական շփումներից հաղորդակցվում են նաև ինտերնետային կապի միջոցով: Իրականցվող մշակումներն օգտակար կլինեն մյուս դպրոցներում կիրառելու համար»:

Այս ուսումնական տարում փորձել ենք հեռավար ուսուցման մեթոդը հետևողական կիրառել մեր գործունեության մեջ, այդ թվում՝ ուսումնական-հայրենագիտական ճամփորդություններ կազմակերպելիս: Սկզբում հայկական, ապա նաև ռուսալեզու ինտերնետային էջերում  մենք բավական երկար փնտրեցինք ` փորձելով տեղեկատվություն քաղել հեռավար ուսուցմամբ իրականացվող կրթական ծրագրերի մասին. հայկական էջերում գտանք միայն ՀՀ  կառավարության վերոհիշյալ որոշումը, իսկ ռուսական ինտերնետային էջերում տեղեկություններ կային միայն այն մասին, որ հեռավար ուսուցմամբ կրթական ծրագրեր իրականցվում են միայն բուհական ուսուցման ոլորտում:

Կառավարության որոշմանը կից կարգը, որ վերաբերում էր բարձրագույն ուսուցմանը, փորձեցինք հարմարեցնել մեր նպատակներին: Ստացվեց, որ հեռավար ուսուցման ուսումնական գործընթացն իրականացվում է հետևյալ ձևերով:  

Հեռավար ուսուցում լարանում դասախոսի (դասավանդողի) և ուսանողի (սովորողի) անմիջական հաղորդակցման կամ էլեկտրոնային կապի միջոցների օգտագործման միջոցով: Հայրենագիտական ճամփորդությունը նախապատրաստելու համար սովորողներին հանձնարարվում է տեղեկատու աղբյուրներից (հանրագիտարաններ, համացանց) տեղեկություններ հավաքել տվյալ վայրի, հուշակոթողի մասին: Այնուհետև, արդեն տեղում, սովորողները պատմում են այն ամենը, ինչ կարողացել են նախօրոք իմանալ:
Ճամփորդության վերջում փորձում ենք  պարզել` ինչ գիտեինք և ինչ նոր բան իմացանք:

Ուսումնական նյութերի հետ ուսանողի (սովորողի) ինքնուրույն աշխատանք: Որպես կանոն, սովորողները հաջորդ օրերի ընթացքում կայքի միջոցով պատմում են իրենց տպավորությունների մասին և սկսում ուսումնական նյութեր պատրաստել: Այս դեպքում սովորողի համար գործող միակ դասագիրքը սպառում է իրեն և տարբեր տեղեկատվական աղբյուրների անհրաժեշտություն է զգացվում: Ինչպես Ֆրենեն էր պնդում` որտեղ կա մեկ դասագիրք, անհատականության մասին խոսելն ավելորդ է: Սովորողները նյութերը հավաքում են ծնողներից, հարազատներից, տեղեկատու գրականությունից, համացանցից: Լինում են դեպքեր, երբ ճամփորդությունից հետո սովորողները պատրաստում են ոչ թե մեկ, այլ`երկու-երեք տեսանյութ:
Տեսանյութերի ցուցադրությունից հետո փորձում ենք  պարզել` ինչ գիտեինք, ինչ նոր բան իմացանք, էլ ինչ կուզեինք իմանալ:

Լսարանում մեթոդիստի և ուսանողի (սովորողի) անմիջական հաղորդակցման կամ էլեկտրոնային կապի միջոցների օգտագործման միջոցով: Հաշվի առնելով սովորողների հարցապնդումները և խորհրդակցելով տիար Տիգրանյանի հետ՝ որոշեցինք փորձել կազմել առաջադրանքներ, որոնք միաժամանակ կներառեին երեք` հայրենագիտություն, մայրենի լեզու,  մաթեմատիկա առարկաները:   

Առաջադրանքները կազմելուց հետո, սովորողներին էլեկտրոնային կապի միջոցով ուղարկվում են առաջադրանքները, թեման, օգտագործվող գրականության ցանկը: