Աշոտ Տիգրանյան

Հասարակագիտության դասավանդումն ավագ դպրոցում

Պետության, նույնիսկ` ազգի, կայացման գլխավոր գործոնը ՔԱՂԱՔԱՑԻՆ է: Հայաստանյան` առարկայական և ենթակայական պատճառներով բազմափեղկված լեզվական, հոգեկերտվածքային, ազգագրական, քաղաքական, տնտեսական, սոցիալական իրականությունը կարոտ է քաղաքացի անհատի` հասարակական գործընկերության (բացառյալ` սոցիալ-տզրուկները) և ազգային համաձայնության (բացառյալ` ազգի դահիճները) ճարտարապետի և որմնադրի:

Կրթական համակարգում ներդրվող ավագ դպրոցը սոցիալական իրականության այն սեգմենտն է, որտեղ կարող են կայունացվել սովորողի քաղաքացիական որակները և զարգանալ համապատասխան հմտությունները կամ հակառակը` վերջնականապես ձևավորվել խոհանոցային փնփնթանը, մարտնչող ծառայամիտը: Այս պայքարում առանցքային դեր ունեն «Հասարակագիտություն» առարկան և կրթական հաստատությունում ժողովրդավարական արժեքների կենսականությունը:

Ավագ դպրոցի հնացած դասագրքերը հնարավորություն ընձեռեցին համեմատական վերլուծության մեթոդով սովորողներին ընկալելի դարձնել օրենքների փոփոխության տրամաբանությունը և իրականության տրամաբանության հետ զուգակցման մակարդակը:

Պարտադիր տնային աշխատանքների բացառումը և հեռավար ուսուցման որպես առկա կրթության մեթոդի ու համակարգի, ներդրման կարևորության (սովորողների համար նաև հետաքրքրության) գործոնը պարտադրեց դասավանդողներին դասագործընթացի կազմակերպման նոր մեխանիզմների փնտրտուքներ։

Ես ներկայացնում եմ Ձեզ իմ կիրառած մեթոդաբանության երեք հիմնական ուղղությունները`  դասարանական առաջադրանքներ դասագրքային և հեղինակային մոտեցումների համակցմամբ, ՏՀՏ միջոցների կիրառում պահանջող առաջադրանքների անհատական և խմբային կատարում, անհատական հետազոտական աշխատանքներ սովորողի ցանկությամբ: Վերջին ուղղության աշխատանքների արդյունքների ներկայացման ձևն ընտրում է հետազոտական գործունեություն իրականացնողը։

Դասարանական հեղինակային առաջադրանքների մի մասը (մոտեցման մասին պատկերացում տալու նպատակով), էլեկտրոնային առաջադրանքների թեմաները,  անհատական հետազոտական աշխատանքի մի նմուշ կցվում են:

Ես համոզված եմ, որ քաղաքացիական դիրքորոշումը կպահպանի երրորդ հանրապետությունը, և յուրաքանչյուրս, իսկ հասարակագիտություն դասավանդողներս առաջին շարքերում,

ՍԱՀՄԱՆԱԴՐՈՒԹՅԱՆ ԱՌԱՋԻՆ ԵՎ ԵՐԿՐՈՐԴ ՀՈԴՎԱԾՆԵՐԻ պահապաններն ենք:

22.04.09